OUMAN IN RASUL MITA 21 - Alkitab Singog In Mongondow Masa In Tanaa

Ki Paulus minayá in Yerusalem

¹ Naonda in nogumandon mako kon i monia komintan, kami in sinumakoidon kon kapaḷ nopobayá in pulau Kos; nopoikoḷomai kon singgai kami in nodapotdon in pulau Rodos. Nongkon tua kami minayá in polabuhan Patara.

² Kon Patara nokouḻí in kami kon kapaḷ inta mayá in Penisia. Dá kami in sinumakoidon kon kapaḷ tatua bo minayá.

³ Kami iḷumeag bo inontongdon in pulau Siprus kon dotá in koḷoigi; táe kami in sinumaḻib bo nopobayá in Siria. Táe kapaḷ inta sinakoian nami in sinumububí kon Tirus, sin mopoponag in datog in kapaḷ kon kotá tatua.

⁴ Kon tua kami in minayá nokipodungkuḷ kon intau mita inta mopirisaya kon i Yesus bo poḷatpa nogutun kon tua pitu nosinggai. Roho i Allah ain noguman kon intau mita inta mopirisaya kon i Yesus sinbá moguman kon i Paulus kon donaaidon mayá in Yerusalem.

⁵ Táe naonda in nodaitdon in wakutu nami kon tua, minayádon in kami nongkon tua bo nongingguputdon kon bobayáan nami. Intau mita inta mopirisaya takin buḷoi bo adí monia nogatod kon inami nodapot kon ḷuai in kotá. Noidapotmai kon bingkí in pintad, kami in sinumungkud bo nosambayang.

⁶ Bo noguman mako kon mayádon, kami in sinumakoidon kon kapaḷ bo mosia in nobuidon kon baḷoi monia.

⁷ Nongkon Tirus kami in minayá in Ptolemais. Dapotdon intua in kapaḷ inta sinakoian nami. Kon tua kami in minayá nokipodungkuḷ kon intau mita inta mopirisaya kon i Yesus kon ḻipú tatua, sin nopoyaput in salam kon i monia. Kami in nogogaipa tosinggai kon sigad monia kon tua.

⁸ Nopoikoḷomai kon singgai kami in nobuat nongkon tua bo minayá in Kaisarea. Kami minayá in baḷoi i Pilipus. Ki Pilipus naa in intau inta mopopoyaput doman in Habar Mopia. Sia in noidugang kon dumodudui pitu inta piniḻí kon Yerusalem. Kami in nogutunpa kon baḷoinea.

⁹ Ki Pilipus in kogadí kon mongodeaga opat. Ki adínea mita tatua ain inogoian i Allah in komampuan mopotaau in Habar Mopia nongkon i Allah.

¹⁰ Naonda in tongonumaidon nosinggai kon tua in kami, ki Agabus in namangoi. Sia tua in tobatú nabi nongkon Yudea.

¹¹ Sia in namangoi kon inami bo nogamá kon togot in ogotan i Paulus. Togot in ogotan tatua pinakénea pinotokig kon sioḷ bo ḻimanea tontaní bo nosingog, “Naadon inta pinoguman in Roho i Allah: Ki togi togot in ogotan tanaa in togoton nanaa in intau mita in Yahudi kon Yerusalem bo posarakan kon intau mita inta deeman Yahudi.”

¹² Naonda in nokodongogmai kon natua, dá kami bo bayongan utat inta nogutun kon Kaisarea koomba-ombaḷ nongampag kon inia sinbá diádon in sia mayá kon Yerusalem.

¹³ Táe ki Paulus in noguman kon i monia, “Nongonu sin mongombaḷbí in moiko naníon, bá kotaauan monimu kon ombaḷ monimu nion totokbí in mokororiga kon ginaku! Akuoi in diá bidon moondok, deemanbí tongá togoton, umpakabí modapot in matoi kon Yerusalem sin mopotaau in Habar Mopia nongkon i Tuhan.”

¹⁴ Tongá sia bo doíbí nokidongog kon tonggina nami, dá dinududuiandon nami in ibognea tatua takin noguman: “Kobaḻídon onu inta kinoibog Tuhan.”

¹⁵ Naonda in tongonumaidon nosinggai kon Kaisarea, kami in nobasadiadon sin mayá in Yerusalem.

¹⁶ Bo tongonumai in intau mopirisaya kon i Yesus nongkon Kaisarea dinumudui kon inami nogatod minayá in baḷoi i Manason, (Ki Manason naa in nongkon Siprus táe sia ain noonggot in nopirisaya kon i Yesus.)

Ki Paulus minayá nokipodungkuḷ kon i Yakobus

¹⁷ Naonda in kami noiyaputdon kon Yerusalem. Kami in sinomu takin pia in gina in intau mita inta mopirisaya kon tua.

¹⁸ Bo nopoikoḷomai kon singgai ki Paulus bo kami in minayá nokipodungkuḷ kon i Yakobus; bayongan in intau inta ain binaḻí itoi kon jamaat ain noyosipun kon tua.

¹⁹ Naonda in noyaput, ki Paulus in nohoromat kon i monia, onda intua ki Paulus in nongonguman kon bayongan inta ain inaidan i Allah pinongin inia kon sigad in intau mita inta deeman Yahudi.

²⁰ Nokodongogmai kon ouman i Paulus tatua, mosia in nodayow kon i Allah. Bo mosia in noguman kon i Paulus nanaa, “Utat, indoiaika dá aindon kon ribuannea in intau Yahudi in nopirisaya kon i Yesus. Mosia tua in intaubí mita inta totok in motoindudui kon hukum i Musa.

²¹ Mosia ain nokodongog kon ki utat aindon notundú kon bayongan intau in Yahudi inta nogutun kon ḻipú intau ibanea bo ki utat in moibog doman monginggamá kon hukum i Musa. Bo iko ain nongampag kon i monia sinbá mosia in diádon mokisunat kon i adí mita monia bo bá diádon mobiag podudui in adat naton.

²² Bo tanaa mako intau mita in Yahudi inta ain nopirisaya kon i Yesus tantú nokodongog bidon kon iko ain namangoi in naa, dá naonda degá?

²³ Maníka uḻe duduiaipa in singog nami naa. Opatdon in intau kon naa ain nomia kon dandi kon i Tuhan.

²⁴ Dá, bayádon in ki utat poyotakin monia mayá mogaid kon upacara pondaritan kon awak, bo uboḻiaidon in ponggonsingan kon buok monia tua, sinbá mosia in motaaudon gonsingan. Sahingga in kotaauandon in bayongan intau kon habar inta dinongogdon monia tua in diábí totuu, sin ki utat tontaní in dinumudui doman kon hukum i Musa.

²⁵ Táe aka intau mita deeman Yahudi inta ain nopirisaya kon i Yesus, aindon pinoki diaan nami in surat in mosia, ain pinais nami kon tua in bayongan inta diá motaau aidan monia. Mosia in diábí motaau in mokaan kon kaanon inta ain pinosumba kon berhala mita, diá doman motaau in mokaan kon dugú andeka mahaḷuk inta minatoi sinagangan; bo diá doman motaau in mogaid kon inta mokotor.”

²⁶ Dá kon singgai noiduduimai ki Paulus noyotakin i nayaopat bo minayá nondarit kon awak takin i monia. Nopaḷut mako kon tua mosia in sinumuot kon Baḷoi Tuhan sin mopotaau kon tongonupamai nosinggai moiduduimai bo upacara pondaritan kon awak in mopaḷutdon bo mahaḷuk inta posumba monia in ogoi monia tontaní.

Ki Paulus dinomok kon Baḷoi Tuhan

²⁷ Naonda in wakutu pitu nosinggai inta ain sinantú monia motoyongdon mopaḷut, intau mita in Yahudi inta namangoi nongkon Asia in nokoontong kon i Paulus kon bonu in Baḷoi Tuhan, dá mosia in nonongganut kon bayongan in intau kon tua bo minayá nodomok kon inia.

²⁸ Mosia sindaḷan doman momaḷú nanaa, “Ei intau mita in Israel tuḷungaipa! Sin naadon in intau inta maya-mayá mako bo motundú kon bayongan intau sinbá diádon mokidongog kon i naton bo doí doman dumudui kon hukum i Musa bo momayow kon Baḷoi Tuhan. Bo tanaa sia in nodia domandon kon intau mita inta deeman Yahudi bo mongotor kon tampat motusi tanaa!” (

²⁹ Mosia in nosingog natua sin mosia ain nokoontong kon i Tropimus intau in Epesus tatua kon kotá noyotakin i Paulus, bo kai monia kamai in diniabí i Paulus in intau tatua sinumuot kon Baḷoi Tuhan tatua.)

³⁰ Dá notombaukdon in bayongan intau kon kotá tatua, bo bayongan in intau namangoi noyosipun. Mosia in nodomok kon i Paulus bo pinoḷuai monia nongkon Baḷoi Tuhan bo kon dodaipa doman tatua bayongan in ngara in Baḷoi Tuhan sinokoḻingkopan.

³¹ Naonda in mosia monomayá moḻimod kon i Paulus, intau mita minayá nopoyaput in habar kon itoi in tontara in Rum, kon Yerusalem in nokacau.

³² Dá itoi in tontara tatua ḷagi nosipun bo nodia kon anggotanea mita pinangkoipamai kon pangkat inta noompá modapot in pangkat inta noḷantud. Mosia in ḷagi minayá in tampat inta pinoropatoian tatua. Naonda in intau moantó kon tua nokoontong kon itoi in tontara in Rum tatua takin anggotanea mita, nogogaidon in mosia in nomongkug kon i Paulus.

³³ Itoi in tontara tatua dinimiug kon i Paulus bo nodomok poḷat pinoki tokig in rante. Onda intua itoi in tontara tatua noḻibó kon i monia mongo onu inaidannea.

³⁴ Táe diábí notampuimai in tubag monia tua, sin oyúon in nopomaḷú nanaa, oyúon doman in nopomaḷú natua. Tuamai in diábí kinotaauannea mongo onu in nobaḻí. Dá pinoki dianeadon in ki Paulus pinobayá in tampat monia.

³⁵ Naonda in nodapotdon in tukad dá intau mita moantó inta dinumudui kon i monia tua in sinumorúdon totok sahingga in ki Paulus pinakisadon pinotaan in tontara mita.

³⁶ Intau mita inta mongongacau tua in dumuduianmai kon tumi monia bo momaḷú, “Ḻimodon in sia!”

Ki Paulus nopoigum nosingog

³⁷ Naonda in ki Paulus diaandon kon bonu in tampat monia tatua, sia in noḻibó kon itoi in tontara tatua, “Motaau degá in akuoi in moyosingog motoyong takin i Tuang?” Dá itoi in tontara tatua in noḻibó, “Eta motaau tumon bahasa in Yunani in iko?”

³⁸ “Aka natua deemanbí naanta intau in Mesir in iko inta nobagumai naa nogaid kon kakacauan bodongka nodia noḷagui kon intau opat noribu takin ḷoḷutam monia bo minayá in padang gurun?”

³⁹ Ki Paulus in notubag, “Akuoi naa intaubí in Yahudi inta nongkon kotá in Tarsus, tobatú kotá inta moponting totok kon Kilikia. Akuoi in mopoigum kon i Tuang sinbá ogoipa in akuoi mosingog kon tayowon in intau moantó tatua.”

⁴⁰ Dá naonda in ki Paulus inogoian kasampatan nosingog, sia in sinimindog kon tukad bo nonuḷadá in noguman bá intau mita kon tua in kibio-biópamai. Dá intau mita tatua in kibio-biómaidon. Onda intua ki Paulus nosingog kon i monia takin bahasa Ibrani, kainia,