OUMAN IN RASUL MITA 18 - Alkitab Singog In Mongondow Masa In Tanaa

Kon Korintus

¹ Onda intua ki Paulus in nonaḷámaidon kon Atena bo minayá in Korintus.

² Kon Korintus sia in noyodungkuḷ in tobatú intau Yahudi inta ki Akwila in tangoinea, intau inta nongkon butá in Pontus. Ki Akwila naa bagu namangoi nongkon Italia takin ki buḷoinea ki Priskila. Sin bayongan intau in Yahudi inta nogutun kon Rum in nodaitdon sinoko untun i Kaisar Klaudius. Dá ki Paulus in minayá noyodungkuḷ i nayadua,

³ bo nogutun takin monia poḷat nogaid noyotakin monia sin totayak monia notongkai doman in totayak i Paulus, momomia kon ḷoḷaigan.

⁴ Táe aka kon singgai in Sabat, yo tantúbí in ki Paulus mayá in baḷoi pososambayangan bo moyoyosingoganmai in bayongan intau Yahudi andeka intau mita in Yunani, sinbá mopirisaya in mosia kon i Yesus.

⁵ Naonda in noiangoidon nongkon Makedonia in ki Silas bo ki Timotius, diádon mogoga-gogai in ki Paulus in mopoyaput in Habar Mopia inta nongkon i Allah kon bayongan intau in Yahudi. Sia nopoyaput in habar kon ki Yesusbí tuata in Datu Mopoposaḷamat inta pinodandi i Allah.

⁶ Táe barang intau mita kon tua umuran moḷawang poḷat moningkuḻemai kon inia, dá sinoko topiranneadon in ḷobud kon ḷambungnea mita, saḷaku tanda mobogoi in tompoingat kon taḷá mita monia. Bo sia in noguman, “Aka mobodito in moiko, yo dongka bidon taḷá monimu tontaní! Pomayáku bidon mako! Tanaa mako akuoi in mayádon kon intau mita inta deeman Yahudi.”

⁷ Bo sinaḷáanmaidon i Paulus in mosia bo minayádon nogutun kon baḷoi inta kon diug in baḷoi pososambayangan tatua. Baḷoi tatua in baḷoi intau inta deeman Yahudi táe mopirisaya kon i Allah. Ki Titius Yustus in tangoi intau tatua.

⁸ Táe ki Krispus, itoi in baḷoi pososambayangan bo takin bayongan ginaḷumnea mita, komintan nopirisaya kon i Tuhan Yesus. Bo nobayong doman in intau mita in Korintus ibanea in nokodongog kon habar inta pinotaau i Paulus in nobaḻí nopirisaya kon i Yesus poḷat binaptis.

⁹ Kon doḷom tobatú ki Paulus nokoontong kon tobatú oontongon, ki Tuhan in namangoi kon inia bo noguman nanaa, “Dikabí moondok! Umuran popotaau in Habar Mopia, dika tongá kibio-biómai.

¹⁰ Sin Akuoi in umuranbí kotaki-takinmu. Bo diábí tobatúmai in motaau momogutú kon inimu, sin noantó bidon in intau kon naa in mopirisaya kon i-Nakó.”

¹¹ Tuamai in ki Paulus nogutundon totaong bo onom nobuḷan kon Korintus bo umuran doman nopotaau in pirman i Allah kon i monia.

¹² Naonda in ki Galio nobaḻí gubernur kon Akhaya, intau mita in Yahudi, notobatú kon gina bo nomayow kon i Paulus poḷat dinia monia pinobayá in pongadilan.

¹³ Mosia in nopongadu nanaa, “Intau tanaa monongganut totok kon intau moantó sinbá mosumba kon i Allah táe diábí notongkai in hukum i Musa!”

¹⁴ Bagu in ki Paulus motubag, indoianmai ki Galio in munadon nosingog kon intau mita in Yahudi tatua, kainia, “Ei intau mita in Yahudi! Aka inta pinongadu monimu naa bo totu-totuu taḷá andeka oaid inta diá mopia, yo tantú indongogankubí.

¹⁵ Táe naa bo tongábí bobayowan kon soaḷ onu in sinundú andeka hukum agama inta pinaké kon sigad monimu, dá tua in urusanbí monimu tontaní, akuoi in doíbí mobaḻí hakim kon soaḷ mita natua!”

¹⁶ Bo nodait inuntun i Galio in mosia pinoḷuai.

¹⁷ Dá dinomok monia in ki Sostenes, itoi in baḷoi pososambayangan tatua bo iḷuntá monia kon tayowon in meja pongongadilan tatua. Táe diábí ihiraumai i Galio in soaḷ tatua.

Ki Paulus nobui kon Antiokhia

¹⁸ Onda intua ki Paulus nogutunpa kon Korintus tongonumai nosinggai. Diá noonggot kon tua sia in nogumandon kon intau mita inta mopirisaya kon tua kon mayádon takin i Priskila bo i Akwila kon Siria in sia. Kon Kengkrea, ki Paulus nokibangkuḷugdon in buoknea sin mogintompod kon dandinea kon i Tuhan.

¹⁹ Naonda in noiyaputdon kon Epesus, sinaḷáanmaidon i Paulus in ki Priskila bo ki Akwila, bo sinumuot in baḷoi pososambayangan mososiritaanmai in intau mita in Yahudi kon tua.

²⁰ Poḷatpa sinahang monia kon tua in sia, táe doí in sia.

²¹ Táe umpaka natua, wakutu in mobuatdon, sia in noguman kon i monia, “Aka umuranpa totabion i Allah dá moiangoibí bui kon naa in akuoi.” Naonda in noguman mako kon natua, minayádon in sia nongkon Epesus.

²² Naonda in noponag kon Kaisarea, sia in minayá in Yerusalem nopoyaput in salam kon bayongan jamaat kon tua bo iyumaput kon Antiokhia.

²³ Naonda in nogutun tongonumai nosinggai kon tua, sia in minayá doman in bayongan ḻipú kon Galatia bo Prigia noginrigon kon pirisaya in intau mita inta mopirisaya kon i Tuhan kon tua.

Ki Apolos kon Epesus bo kon Korintus

²⁴ Wakutu intua, noiangoi domandon kon Epesus in tobatú intau in Yahudi inta nongkon Aleksandria, ki Apolos in tangoinea. Sia naa in intau inta totok mopandoi mosingog bo totok in nonotaau kon bonu in Buk Motusi,

²⁵ bo nonotaau domandon kon soaḷ totundú i Yesus, umpaka bagu binaptis i Yohanes. Táe moḷoben domandon totok in ibognea nopotaau in Habar Mopia soaḷ ki Yesus.

²⁶ Takin kabaranian moḷoben ki Apolos nopotaau in Habar Mopia kon bonu in baḷoi pososambayangan. Naonda in dinongog i Priskila bo i Akwila in totundúnea mita tatua, dinia nayadua kon baḷoi monia in ki Apolos. Bo nodait monia sinarangkan kinopira kon inia in bayongan tomayá i Allah moposaḷamat kon bayongan intau pinodoyon kon i Yesus.

²⁷ Onda intua ki Apolos nonomayádon kon mayá in Akhaya. Dá intau mita mopirisaya kon i Yesus kon Epesus in noromais kon surat sin ogoi kon bayongan utat inta nopirisayadon kon i Yesus kon Akhaya sinbá tarimaan monia kon tua in ki Apolos. Bo naonda in noiyaputdon kon Akhaya in sia, totuḷungnea totokbí in nokobaraguna kon bayongan intau inta nopirisaya kon i Yesus sin popisí totabi i Allah.

²⁸ Sin takin totundú inta mokobangkaḷ tatua, ki Apolos nokobayow kon intau mita in Yahudi kon tayowon in intau moantó. Nodaitnea pinoontong in tontagá mita inta pinais kon Buk Motusi kon ki Yesus tua in totuubí Datu Mopoposaḷamat inta pinodandi i Allah.