OUMAN IN RASUL MITA 12 - Alkitab Singog In Mongondow Masa In Tanaa

Pinomogutúan moḷoben

¹ Kon wakutu intua ki Datu Herodes nomangkoidon momogutú kon bayongan jamaat.

² Sia in nomarenta nokiratá kon i Yakobus inta ki utat i Yohanes

³ Naonda in kinotaauannea kon oaidnea tatua mokosanang kon gina in bayongan intau Yahudi, dá umurannea bo inaidan in onu inta diá mopia tatua; sia in nokidomok domandon kon i Petrus sin bonuon kon ponjara. Wakutu intua Singgai Poramean in Roti Diá Koragi.

⁴ Kon bonu in ponjara tatua ki Petrus iḷukadan in tontara opat norogu. Kon torogu opat in tontara. Sin makusud monia aka mopaḷutdon kon singgai in Paska, yo adilondon i Herodes in sia kon tayowon intau moantó.

⁵ Dá ki Petrus in sinahang kon bonu in ponjara, táe umuran sambayangan in bayongan jamaat sinbá tantú in sia tuḷungan i Allah.

Ki Petrus pinoḷuai in malaekat i Tuhan

⁶ Doḷom wakutu in diápa dinia i Herodes in sia kon tayowon intau moantó, ki Petrus in sinokig in rante bo pinoposiug kon sigad in tontara doyowa inta moḷukadmai kon inia. Bo ḷoḻingkop in ponjara tatua iḷukadan doman in tontara mita ibanea.

⁷ Indoianmai noisindogbí magí malaekat i Tuhan kon tua bo nonimbayag kon bonu in ponjara. Malaekat tatua in noguḷung kon i Petrus dá noibangon. Bo malaekat tatua in noguman, “Ei, ḷagidon pobangon!” Dá kon dodaipa doman intuata bo notontak in rante uatoi inta pinotokig kon ḻimanea.

⁸ Onda intua malaekat tatua in noguman, “Pakédon in ḷambung bo sapatumu.” Dá pinaké doman i Petrus in ḷambung bo sapatunea. Malaekat tatua bui noguman, “Paké domandon in jubahmu bo koḻigai dudui kon inakó.”

⁹ Bo dinumudui in ki Petrus kon malaekat tatua iḷumuai nongkon ponjara tatua. Táe diábí kinotaauannea kon onu inta inaidan malaekat tatua in totu-totuubí nobaḻí. Kainia kamai dá tongábí ná oyúon in noiḷabotmai kon matanea.

¹⁰ Bo naonda in kinotaḻiban monia in tampat poḷoḷukadan inta muna bo induanea mosia noidapotdon in ḷoḻingkop uatoi. Ngara tatua in daḷan mopobayá in kotá. Ḷoḻingkop tatua in nobukat tontaní, bo iḷumuai in mosia nongin lorong. Bo malaekat tatua in baḷúdon nonaḷámai kon i Petrus.

¹¹ Bain nopaḷut mako kon tua bo kinotaauannea in onu inta bagupa nobaḻí kon inia, bo sia in noguman, “Tanaa mako in kinotaauankudon kon ki Tuhan in totu-totuubí nopotabá in malaekat-Nea moposaḷamat kon inakó nongkon kawasa i Herodes bo nongkon rupa-rupa inta moraat inta popoaid in intau in Yahudi kon inakó.”

¹² Bo naonda in kinomangaḻeanneadon intua komintan, sia in minayá in baḷoi Maria, ki iná i Yohanes inta dinonoi ki Markus. Kon tua mobarong totok intau in noyosipun bo mosambayang.

¹³ Noiyaputmai kon tua, sia in nonangkokó kon ḷoḻingkop, dá inangoi bo inindoian in tobatú bobantung bobay inta ki Rode in tangoinea. Munapabí sinarapnea mongo ki ine in nonangkokó tatua.

¹⁴ Táe baḷúneadon kinotaauan kon ki Petrus intua. Tongá popisí in kinoḻiuan in pia in ginanea, dá diápabí binukatannea in ḷoḻingkop tatua, minayápabí in sia bo noguman kon bayongan intau inta noyosipun kon tua kon ki Petrus in tua kon ḷuai.

¹⁵ Intau mita kon tua in diábí nopirisaya nodapotbí in siningog monia nanaa in sia, “Degá bo binombuḷowbí in iko nion!” Táe ki Rode in umuran moguman kon totu-totuubí ki Petrus intua kon ḷuai. Dá kai monia doman, “Malaekatneabí intua!”

¹⁶ Bo tantúdon in ki Petrus nonangkokó. Dá naonda in binukatan monia in ḷoḻingkop, bo nokoontongdon kon i Petrus, mosia in komintan nongoherang.

¹⁷ Táe ki Petrus in nonuḷadá in noguman kon bá mosia kibio-biómaidon, onda intua inoumanneadon kon ki Tuhanbí in nodia kon inia iḷumuai nongkon ponjara. Bo sia noguman doman, “Oumanpa kon i Yakobus bo kon i utat mita naton onu inta ain nobaḻí tanaa kon inakó.” Onda intua iḷumuaidon in sia bo minayá in tampat ibanea mako.

¹⁸ Nobangon monik doḷo-doḷom nodowawádon mako in tontara mita inta noḷukad kon inia. Mosia in notoboḻingo totok bo nosiḻibóan mongo onu in nobaḻí kon i Petrus.

¹⁹ Bo pinoki tayak i Herodes kon intau mita tatua in ki Petrus, táe diá nouḻí monia. Dá pinoki pirikisadon i Herodes in tontara mita inta moḷoḷukad, nopaḷut mako bo pinoki ḻimod nodait in mosia. Onda intua ki Herodes minayádon nongkon Yudea bo nogutun tongonumai nosinggai kon Kaisarea.

Kinopatoian i Herodes

²⁰ Ki Herodes in totokdon sinumorú kon intau mita in Tirus bo Sidon. Manangka intua mosia in noyotakin minayá kon tayowonnea. Muna in mosia nodondouḷug kon i Blastus, inta nobaḻí itoi kon komaḻig i Herodes, dá sinuḷungannea in mosia. Onda intua minayá in mosia kon i Herodes bo nopoigum sinbá moyodamedon, sin kaanon intau mita kon ḻipú monia in tongábí mouḻí nongkon butá inta kon bonu in kawasa i Herodes.

²¹ Kon singgai tobatú inta ain sinantú, ki Herodes in nogiḷambungdon, in ḷambung datu bo iḻimitú kon tampat pomomarentaannea bo nosingog kon tayowon in intau mobarong tatua.

²² Dá intau mita moantó kon tua in totok momaḷú in moguman, “Singogbí in dewa naa, deemanbí singog in intau!”

²³ Bo kon dodaipa doman intua sinokap in malaekat i Allah in sia sin totokdon mopoompámai kon i Allah. Pangabisannea minatoi in sia bo kinaan in oḷuasi mita.

²⁴ Dá totokdon noihabar magí mako in pirman i Allah sahingga in nobayongdon totok in intau nopirisaya.

²⁵ Naonda in nopaḷutdon in oaidan i Barnabas bo i Saulus, mosia in nobuidon nongkon Yerusalem bo nodia kon i Yohanes Markus noyotakin i monia.