OUMAN IN RASUL MITA 11 - Alkitab Singog In Mongondow Masa In Tanaa

Lapuran i Petrus kon jamaat Yerusalem

¹ Rasul mita bo bayongan intau kon Yudea nokodongogdon kon habar kon intau inta deeman agama in Yahudi ain notarima kon Habar Mopia.

² Dá naonda in ki Petrus minayá in Yerusalem, sinorúan monia in sia.

³ Kai monia, “Iko aindon sinumuot kon baḷoi mita in intau inta diá sinunat? Bo nongaan domandon takin monia!”

⁴ Tuamai ininsilangan i Petrus kon i monia onu inta ain nobaḻí tatua. Kai-nia:

⁵ “Wakutu in akuoi yogot mosambayang kon kotá in Yope, daḻíbí bo kinawasa in Roho i Allah in akuoi bo nokoontong kon naonda bo daing mobanat noituntun monag nongkon ḷangit, noibambé kon sikunea opat bo nogogai kon kiḻidkumai.

⁶ Naonda inindoianku in bonunea, dá inontongku in mahaḷuk mita inta opat in sioḷnea, bo mahaḷuk mita inta kaḻig, mahaḷuk mita inta ḷumandai in mayá bo ḷagapan doman mita inta ḻindong.

⁷ Bo dinongogku in singog in noguman kon inakó nanaa, ‘Ei Petrus, pobangondon! Ratádon mita intua bo kaan!’

⁸ Táe akuoi in notubag, ‘Doíbí in akuoi, Tuhan! Sin diápabí kon dodai in onda akuoi in nokaan kon mahaḷuk inta haram bo nonajis.’

⁹ Táe buiku dinongog in singog nongkon ḷangit tatua in noguman, ‘Onu inta kai Allah motaau kaanon, yo donaaibí kai monimu in haram.’

¹⁰ Singog tatua in kotoḷuku dinongog, onda intua noisintakdon monik bui kon soroga intua komintan.

¹¹ Kon dodai doman tuata noiangoi kon inakó, in intau taya toḷu kon baḷoi inta pinogutunanku. Mosia in namangoi nongkon Kaisarea.

¹² Bo Roho i Allah nopotabá kon inakó mayá moyotakin monia takin diá mohawatir. Dá taya onom tanion in dinumuduidon doman kon inakó minayá in Kaisarea, bo sinumuot in kami komintan kon baḷoi i Kornelius.

¹³ Bo kon tua nodait inouman i Kornelius kon inami kon sia in nokoontong kon malaekat sinimindog kon baḷoinea bo noguman, ‘Potabádon in intau mayá in Yope mogoiní kon tobatú intau inta ki Simon Petrus in tangoinea.

¹⁴ Sin sia in mopotaau kon inimu in Habar Mopia inta mokosaḷamat kon inimu bo mokosaḷamat doman kon bayongan in ginaḷummu.’

¹⁵ Bo naonda in akuoi nomangkoidon nongonguman, Roho i Allah in noponag bo nongawasa kon i monia komintan ná inta nobaḻí kon inaton koḻipod.

¹⁶ Dá kinotoropankudon in singog i Tuhan nanaa, ‘Ki Yohanes mobaptis in tubig, táe moiko in baptison in Roho i Allah.’

¹⁷ Dá tantú notarang bidon kon ki Allah in mobogoibí doman in totabi-Nea kon intau inta deeman Yahudi, ná totabi inta inogoi-Nea kon inaton wakutu in kita bagu nopirisaya kon i Tuhan Yesus Kristus. Tuamai, diábí doman inta ampaganku in ki Allah!”

¹⁸ Naonda in dinongog monia intua, nopiadon in gina monia komintan poḷat nodayow kon i Allah. Kai monia, “Aka natua, dá intau mita inta deeman Yahudi inogoianbí doman i Allah in kasampatan mogogai in mogaid kon dosa mita bo mokouḻí kon kobiagan mononoi!”

Jamaat kon Antiokhia

¹⁹ Naonda in iḻimodon in ki Stepanus, intau mita inta nopirisaya kon i Yesus Kristus nongoirangkap in noḷagui sin tokodomokon bo tokopogutúon in intau mita inta diá mopirisaya. Oyúon in noibayá kon Penisia, bo oyúon doman noidapot in Siprus bo Antiokhia. Kon tua in mosia nopoyaput in Habar Mopia kon intau mita in Yahudi.

²⁰ Táe kon sigad in intau mita inta mopirisaya tatua, inta nongkon Siprus bo Kirene, oyúon doman in minayá kon Antiokhia bo nopoyaput in Habar Mopia kon bayongan intau inta deeman agama Yahudi doman.

²¹ Kawasa i Tuhan umuran kotaki-takin monia, sahingga in nobayongdon in intau in nopirisaya bo moposarakan in kobiagannea kon i Tuhan.

²² Ouman mita tatua noiyaput kon jamaat mita inta kon Yerusalem. Manangka intua pinotabá monia in ki Barnabas minayá in Antiokhia.

²³ Naonda in noiyaput kon tua in ki Barnabas, bo nokoontong kon naonda in Allah nomarakat kon i monia, nopia totok in ginanea. Bo sia in nopoigum domandon kon bá mosia in totu-totuudon mopirisaya bo motoindudui kon i Tuhan.

²⁴ Ki Barnabas naa in intaubí mopia, inta umuran kinawasa in Roho i Allah bo intau inta totok in mopirisaya kon i Tuhan sahingga moantódon in intau in dinumudui kon i Tuhan.

²⁵ Noiduduimai kon tua ki Barnabas minayádon in Tarsus notayak kon i Saulus.

²⁶ Naonda in noyodungkuḷnea in ki Saulus, dinianea minayá in Antiokhia nogutun totaong kon tua bo noyobiag takin jamaat kon tua poḷat doman notundú kon mobarong in intau. Kon Antiokhia tuata in intau mita inta mopirisaya kon i Yesus muna-munamai sinangoian Keresten.

²⁷ Wakutu intua oyúon in tongonumai in nabi in namangoi nongkon Yerusalem mopobayá in Antiokhia.

²⁸ Kon sigad monia tua oyúon in ki Agabus in tangoinea. Sia in kinawasa in Roho i Allah bo sinimindog nopotaau kon mobaḻí in malarat moḷoben kon dunia naa. (Bo totuubí nobaḻí kon sempo ki Kaisar Klaudius in nomarenta.)

²⁹ Dá dumodudui mita in notobatú kon gina bo nosipun kon totuḷung podudui in komampuan tobatú bo tobatú. Totuḷung tatua in inogoi monia kon utat mita inta kon Yudea.

³⁰ Dá notobatú doman kon gina in mosia, bo nosipun kon totuḷung ogoi kon penatua mita. Totuḷung mita tatua inogoi pinoki dia monia kon i Barnabas bo kon i Saulus.