OUMAN IN RASUL MITA 10 - Alkitab Singog In Mongondow Masa In Tanaa

Ki Petrus bo ki Kornelius

¹ Kon Kaisarea oyúon in tobatú ḷoḷaki, tangoinea in ki Kornelius. Sia naa in itoi in “Tontara in Rum”.

² Intau inta totok in mopia. Sia bo tombunu in baḷoinea komintan motoguondok kon i Allah. Moibog motuḷung kon intau mita in Yahudi inta nongobogá, bo morajing mosambayang.

³ Kon singgai tobatú, degá jam intoḷuneadon ḷoḷabungnea, inontongnea notarang in tobatú malaekat sinumuot kon baḷoinea bo nokuuk kon inia nanaa, “Kornelius!”

⁴ Dá takin ondok, nobobui in sia kon malaekat tatua bo noḻibó, “Nongonu Tuang?” Dá malaekat tatua in noguman, “Bayongan inta pinoigummu kon sambayang bo oaidmu inta mopia kon intau mita bogá, aindon noiyaput kon i Allah bo iko in umuran kon bonu in gina-Nea.

⁵ Tuamai tanaa mako in potabápa intau mayá in Yope, mogoiní kon i Simon inta donoionmai ki Petrus.

⁶ Sia in nogutun kon pintad kon baḷoi i Simon, intau inta mororubus kon kuḻit.”

⁷ Naonda in minayádon malaekat inta noguman kon i Kornelius tua, ki Kornelius in nogoiní kon bobantungnea doyowa bo tontara tobatú inta totok in motoindudui.

⁸ Naonda in inoumannea kon bobantungnea mita tatua onu inta bagu nobaḻí kon inia tua, pinotabáneadon in mosia minayá in Yope.

⁹ Nopoikoḷomai kon singgai, kon wakutu in bobantungnea mita tatua kon daḷanpa bo motoyongdon moyaput in Yope, degá jammaidon mopuḷú bodoyowá tusinggainea, ki Petrus in noponikdon kon baḷoi sin mosambayang.

¹⁰ Sia in ginogoy, bo moibogdon mongaan. Bo naonda in koyogot mogoḷud kon kaanon, daḻí in sia kinawasa in Roho i Allah.

¹¹ Inontongnea in ḷangit nobukat bo oyúon in naonda bo daing nooḷad noituntun monag kon butá, bo noibambé kon opat nosudut.

¹² Kon bonunea noyagi-yagimai in mahaḷuk inta opat in sioḷnea. Mahaḷuk inta ḷumandai in mayá bo ḷagapan mita inta kaḻig.

¹³ Bo oyúon in singog in noguman kon inia nanaa, “Petrus, pobangon! Dait ratá in naa mita bo kaan!”

¹⁴ Ki Petrus in notubag, “Doí in akuoi, Tuhan! Sin diápabí dodai onda in akuoi in nokaan kon inta pinoton, andeka onu inta monajis.”

¹⁵ Táe bui oyúon in singog in dinongog noguman, “Onu inta aindon sinantú i Allah motaau kaanon, dikabí anggapon monimu haram intua.”

¹⁶ Singog tatua in kotoḷu dinongog, bo onda intua buidon noisintak monik kon ḷangit intua komintan.

¹⁷ Ki Petrus in umuran korai-rai mongo onu degá in mangaḻe inta inontongnea tatua. Koyogot in noraimai kon tua, bobantung mita inta pinotabá i Kornelius, kon munamaidon in ḷoḻingkop in baḷoi i Simon.

¹⁸ Bo mosia in nogoiní kon intau bo noḻibó, “Degá kon naa in pinogutunan i Simon Petrus?”

¹⁹ Koyogotpa in ki Petrus morai mongo onu degá in mangaḻe inta inontongnea tatua, Roho i Allah in noguman kon inia, “Ei Petrus, oyúon intau taya toḷu in notayak kon inimu.

²⁰ Ḷagidon poponag bo bayádon takin i monia, dikadon moondo-ondok in iko sin Akuoibí in nopotabá kon i monia namangoi.”

²¹ Dá noponagdon in ki Petrus bo noguman kon intau mita tatua, “Akuoibí naa inta sinayak monimu. Mamangoi mongonu in moiko?”

²² Dá mosia in notubag, “Kami naa in namangoi sin pinotabá i Kornelius, tobatú itoi in tontara Rum, inta totok mopia bo motoindudui kon i Allah bo ihoromat in bayongan intau in Yahudi. Tobatú malaekat i Allah in namangoi kon inia bo nopotabá mogoiní kon i Tuang sinbá ki Tuang in mamangoi in baḷoinea, saḷaku tubag i Tuhan kon bayongan inta pinoigumnea kon doa. Sia in pinoki indongogan kon onu in poguman i Tuang kon inia.”

²³ Dá inoinídon i Petrus in mosia bo sinumuot kon bonu in baḷoi poḷat sinahangneapa bo pinoki siugandon kon tua. Nopoikoḷomai kon singgai, ki Petrus in nobangon bo minayá noyotakin monia takin tongonumai in intau inta mopirisaya.

²⁴ Bain nopoikoḷomai kon singgai bo noiyaput in mosia kon Kaisarea. Ki Kornelius takin bayongan in ginaḷum bo yobayatnea mita inta ain inoinínea dongkadon mogoḷat mako.

²⁵ Naonda in noiyaput in ki Petrus, baya-bayá sinomu i Kornelius poḷat sinumungkud in sia kon tayowonmai i Petrus.

²⁶ Táe sinuḷungan i Petrus binuat pinoki sindogan poḷat noguman, “Sindogdon! Sin akuoi naa in intaubí doman biasa.”

²⁷ Koyogotpa mongonguman takin i Kornelius, ki Petrus in sinumuotdon kon baḷoi. Kon tua inontongneadon in nobayong intau in noyosipun.

²⁸ Bo sia in noguman kon i monia, “Utat mita, kinotaauan bidon monimu kon ilarangbí in agama Yahudi in mamangoi mokipodungkuḷ andeka moyobayat in intau mita ibanea. Táe aindon pinoguman i Allah kon inakó kon diábí in motaau monganggap kon ibanea tua in najis andeka haram.

²⁹ Tuamai wakutu in ki Tuang nopoigum sinbá akuoi in mamangoi, nosanangbí in ginaku. Dá tanaa in ḻibóonkudon mongo nongonu sin pinoki oiníbí i Tuang in akuoi.”

³⁰ Dá ki Kornelius in notubag, “Opatdon nosinggai naa, degá orasmaidon nanaa jam intoḷunea moḷoḷabung akuoi in nosambayang kon baḷoiku. Indoianmai yo oyúonbí in ḷoḷaki tobatú in sinimindog kon tayowonkumai. Ḷambungnea in mopouḻi-uḻinag.

³¹ Sia in noguman nanaa, ‘Kornelius! Sambayangmu in sinarimadon i Allah bo kinotaauan-Nea domandon in kopopia in ginamu.

³² Dá potabádon intau mayá in Yope mogoiní kon intau inta tangoinea in ki Simon Petrus. Sia in nogutun kon baḷoi i Simon inta mororubus kon kuḻit. Tua kon pintad in baḷoinea.’

³³ Tuamai baḷuku pinotabá in intau mayá mogoiní kon i Tuang. Bo namangoi domandon in ki Tuang takin pia in gina. Bo tanaa kami in noyosipundon kon tayowon i Allah sin mokidongog kon bayongan inta pinoki potaau i Allah kon i Tuang poguman kon inami.”

Singog i Petrus

³⁴ Bo ki Petrus in noguman, “Bain naa bo kinotaauanku kon naanta pinoyotongkaibí i Allah in bayongan intau.

³⁵ Intau kabí nongkon onda, asaḷ bo moibog in mogaid kon inta kinoibog-Nea, yo tuabí in kinosanang in gina-Nea.

³⁶ Pirman inta pinoki poyaput-Nea kon intau mita Israel, tuata in Habar Mopia inta nopotaau in dodamean inta inaidan i Yesus Kristus, Tuhan in bayongan intau.

³⁷ Kinotaauan bidon monimu in bayongan inta nobaḻí kon butá in Yudea, pinangkoi kon Galilea inta nopaḷut mako pinobaptisan inta pinoki aid i Yohanes.

³⁸ Bo kinotaauanbí domandon monimu kon ki Allah ain nomiḻí kon i Yesus intau in Nazaret tua bo nobogoi kon i-Nia in Roho i Allah bo kawasa. Kinotaauan domandon monimu kon ki Yesus tuata inta minayá in ḻipu-ḻipúannea bo nogaid kon inta mopia poḷat nongundam kon bayongan in intau inta kinawasa in Ibilis, sin ki Allah in umuran kotaki-takin-Nea.

³⁹ Kamibí naa inta ain nokoontong tontaní kon onu in pinomia-Nea kon butá in intau Yahudi bo kon Yerusalem. Táe umpaka natua pinopopakúbí monia in Sia kon kayu pinoyotaḻempang bo iḻimod.

⁴⁰ Táe kon singgai intoḷunea, Sia in bui biniag i Allah nongkon kinopatoian-Nea bo Sia in nokipogontong kon intau;

⁴¹ tongá deemanbí kon bayongan intau, táe tongábí kon inami inta piniḻí-Nea muna mobaḻí sakusi-Nea mita. Kami ain nongaan bo nonginum noyotakin-Nea wakutu in Sia nobiagdon bui nongkon kinopatoian-Nea.

⁴² Bo kami in pinarenta-Nea mopotaa-taau mako kon bayongan in intau bo moguman kon Siabí tua inta piniḻí i Allah mobaḻí hakim kon intau mita inta nobiagpa bo kon inta minatoidon.

⁴³ Bayongan in nabi komintan bidon nongonguman kon soaḷ Sia tua. Mosia in noguman, kon bayongan intau inta mopirisaya kon i Yesus, komintan ampungan in dosanea takin kawasa inta nongkon i Yesus.”

Intau mita inta deeman Yahudi nokouḻí kon Roho i Allah

⁴⁴ Koyogotpa in nongonguman in ki Petrus, indoianmai noponagdon in Roho i Allah kon bayongan intau kon tua inta mongindongogmai kon onu in pinoyaputnea tatua.

⁴⁵ Dá intau mita in Yahudi nongkon Yope inta nopirisayadon kon i Yesus inta dinumudui kon i Petrus, komintan nongoherang in nokoontong kon ki Allah in nobogoibí doman in Roho-Nea kon intau mita inta deeman Yahudi.

⁴⁶ Sin inontong bo dinongogdon monia tontaní, onu in siningog in intau mita tatua kon bonu in bahasa noyagi-yagimai bo mosia in totok domandon modayow kon i Allah. Dá ki Petrus in nosingog nanaa,

⁴⁷ “Indoiaika, intau mita tanaa in kinawasa domandon in Roho i Allah naonda doman bo kita. Dá motaaupa degá intau moḷamboi kon i monia in baptison tubig?”

⁴⁸ Dá pinoki baptis i Petrus in mosia kon bonu in tangoi i Yesus Kristus. Onda intua mosia in nopoigum sinbá ki Petrus in mogutunpa takin i monia tongonumai nosinggai.