OUMAN IN RASUL MITA 1 - Alkitab Singog In Mongondow Masa In Tanaa

¹ Tuang Teopilus inta mobijaksana. Kon bonu in bukku inta muna, pinaiskudon in bayongan inta inaidan bo inta sinundú i Yesus pinangkoipamai kon dodai in Sia nomangkoi nogaid

² noidapot in singgai kinobingkatan-Nea kon soroga. Kon wakutu in Sia diápa namonik in soroga, takin kawasa in Roho i Allah, Sia in nobogoidon muna in parenta-Nea kon rasuḷ mita inta piniḻí-Nea.

³ Naonda in Sia buidon nobiag nongkon kinopatoian-Nea, opat nopuḷú nosinggai Sia nopoontong in oaidan-Nea kon rasul mita sinbá moniata kon i monia kon Sia tua in totu-totuubí nobiag. Mosia in nokoontong kon i-Nia, bo Sia in nongonguman kon i monia kon naonda in ki Allah momarenta saḷaku Datu.

⁴ Bo kon wakutu in Sia noyosipun noyotakin monia, Sia in noguman kon i monia nanaa, “Dikapa in moiko monaḷámai kon Yerusalem. Oḷatdon kon tua modapot in ki Amá mobogoidon kon onu inta pinodandi-Nea, inta ain pinotaau-Ku kon i monimu koḻipod.

⁵ Sin ki Yohanes in nopobaptis in tubig, táe diádon moonggot in moiko baptison in Roho i Allah.”

Ki Yesus biningkat namonik in soroga

⁶ Mosia inta noyosipun kon tua in noḻibó kon i Yesus, “Tuhan, degá moibogdon in Iko masa in tanaa moposindog bui in dodatuan kon intau Israel?”

⁷ Ki Yesus in notubag, “Diábí paraḷu kotaauanmu in sempo andeka wakutunea, sin tua in ki Amá-Kubí in monantú podudui in kawasa-Nea.

⁸ Tongá moiko in mokouḻíbí kon kawasa, aka Roho i Allah mamangoidon kon i monimu bo moikodon nion in mobaḻí sakusi-Ku kon Yerusalem, kon bayongan butá in Yudea, kon Samaria, bo modapot in popod in dunia.”

⁹ Naonda in nosingog mako kon tua in Sia, Sia in biningkatdon namonik in soroga koonto-ontongpa mako monia tua. Bo kinooḻingoiandon in goḷom in Sia dá diádon inontong monia.

¹⁰ Bo ḷumangagpa mako in mosia sin moindoi kon kinoonikan i Yesus, yo indoianmai doyowa intau inta nogiḷambung nobudó noisindogbí magí kon diug monia,

¹¹ bo noguman kon i monia, “Ei, intau mita in Galilea, nongonu sin moiko in simindogbí mako kon nion bo ḷumangag mako kon ḷangit? Ki Yesus inta inontong monimu nobingkat namonik in soroga tua in mamangoibí bui. Bo koangoi-Nea bui in notongkaibí ná inta inontong monimu tanaa.”

Intau inta pinomaḷui kon i Yudas

¹² Onda intua rasul mita tatua in nobuidon kon Yerusalem sin mosia in nongkon buḷud in Zaitun. Buḷud tatua degá toribumai nometer in koyayúnea nongkon Yerusalem.

¹³ Kon Yerusalem in mosia minayá in baḷoi inta pinogutunan monia. Mosia namonik in yuang inta pinongaanan monia wakutu in Singgai Moḷoben Paska. Naa in tangoi monia tua: Ki Petrus, ki Yohanes, ki Yakobus, ki Andreas, ki Pilipus, ki Tomas, ki Bartolomeus, ki Matius, ki Yakobus inta ki adí i Alpeus, ki Simon intau in Zelot bo ki Yudas adí i Yakobus;

¹⁴ mosia in umuran notobatú kon gina moyosipun sin mosambayang. Mosia in nosambayang takin tongonumai in bobay ná ki Maria inta ki iná i Yesus, bo ki utat mita i Yesus.

¹⁵ Kon singgai tobatú wakutu in mosia noyosipun, degá mogatutmai bodoyowá nopuḷú in intau, dá ki Petrus in sinimindog kon yua-yuak monia tua bo nosingog, kainia,

¹⁶ “Utatku mita! Onu inta pinais kon bonu in Buk Motusi in mustibí mobaḻí. Tungkuḷ intua Roho i Allah in nomaké kon i Daud bo noguman muna kon ki Yudas in mobaḻí itoi mita in intau inta modomok kon i Yesus tua.

¹⁷ Koḻipod sia tua in noyotakinbí nami bo poḷatpa doman noyotakin nami nogaid nanaa.” (

¹⁸ Ki Yudas naa in aindon nokouḻí kon butá pinoḷobongan kon inia, butá boḻi in oaidnea inta moraat. Sia in noḷabú noitongkob bo siannea in nobotak, dá bayongan bonu in siannea noiḷuai komintan.

¹⁹ Bayongan in intau kon Yerusalem in nonotaau kon bayongan tua, tuamai in butá tatua sinangoian monia inta kon bonu singog monia tontaní ‘Akeldama’, mangaḻenea ‘Butá in dugú’.)

²⁰ “Sin kon buk in Mazmur oyúon pinais nanaa, ‘Pomayádon mako sin ḻipú monia tua in moingongowbí; dikadon in tobatúmai in mogutun kon bonunea’ Oyúon doman in pinais nanaa, ‘Pomayádon mako in ḷoḻitúannea in gamáan in intau.’

^21-22 Manangka intua musti oyúon in intau in kotaki-takin nami in mobaḻí sakusi kon ki Yesus tua in totu-totuubí bui nobiag nongkon kinopatoian-Nea. Intau tatua in musti intau inta umuran dinumudu-dudui mako kon i naton kon wakutu in ki Tuhan Yesus minaya-mayá mako, tuata in wakutu inta mulai kon pinobaptisan i Yohanes nodapot kon singgai ki Yesus nobingkat namonik in soroga nonaḷámai kon i naton.”

²³ Dá intau mita kon tua noponuot doyowa in tangoi intau. Tangoi nayadua tua in ki Yusup inta dinonoi ki Barsabas (sia in dinonoi doman ki Yustus), tangoi induanea ki Matias.

^24-25 Mosia komintan nosambayang nanaa, “Tuhan, Ikobí inta nonotaau kon bonu in gina in bayongan intau, tundúdon mongo ki ine in koibog-Mu kon sigad inayadua naa, inta motarima kon oaidan inta pinoki aid-Mu táe inta ain sinaḷáanmai i Yudas inta ain notarima kon hukuman pinodudui in oaidnea.”

²⁶ Onda intua mosia nopogonik in undi, bo ki Matias in kinopiḻían. Dá sia in binaḻí rasul pinodugang kon rasul inta mopuḷú bo mita tua.