OMBAḶ 5 - Alkitab Singog In Mongondow Masa In Tanaa

Sambayang mopoigum in totabi

¹ Toropdon, kaasí Tuhan, onu inta nobaḻí kon inami. Bobuidon in kami, bo indoiaika in kohohina nami.

² Kapunyaan budel nami in noiḷabú kon ḻima in intau ibanea, baḷoi mita nami in inutunan in intau ango-angoi.

³ Ki amá nami in iḻimodon in musung; tanaa in ki iná nami in dongkadon boba-bobay, bo kami in uno-unon.

⁴ Tubig inumon bo kayu pondungú musti taḷuion nami.

⁵ Naonda bo bobiagon, kami in pinakisa mogaid kon oaidan mobogat, moḷopí in kami, táe diá ogoi mogogai.

⁶ Kami in minayá noigu-igum mako kon Mesir, kami in noigum kon kaanon kon Asyur.

⁷ Mogoguyang nami in binaradosa, tanaa in diádon in mosia; táe kami in mustibí motarima kon roriga popisí in dosa mita monia.

⁸ Kami in pinarenta in intau mita inta diá noiḻiu kon bobantung; diá in kokawasa mopoḷuat kon inami nongkon i monia.

⁹ Kon ḷuai in kotá, moḷoḻimod nodondaḷoi magí mako; diá kodimu-dimukud in kami kon dodai in motayak kon kaanon.

¹⁰ Kami in inaput in gogoy, nodapot in kuḻit nami monombaga naonda bo kon doḷuong.

¹¹ Bobay mita kon Sion dinomok, mongodeaga mita in pinomia ibo-ibog kon ḻipú mita kon Yohuda.

¹² Itoi mita nami in dinomok bo binambé, guyanga mita nami in diádon sinompuri.

¹³ Tayowmobiag mita nami in pinakisa nogaid kon pogogiḻingan, mongoadí mita ḷoḷaki in kinodantugan in kayu inta pinotaan monia nodapot in sinogopuḷong.

¹⁴ Guyanga in diá bidon moyosipun kon bonawang in kotá, musik in diá bidon kodongogan kon tayowmobiag mita.

¹⁵ Kami in kinobuḻiandon in ḷunganga in gina; tayok mita in nobaḷuidon pinonogumatoian.

¹⁶ Onu inta nokoyunggagá kon inami in diádon, kami in nobodito popisí in binaradosadon.

^17-18 Buḷud in Sion noingongowdon bo sinaḷáan; kon tua ungkú in kayuon nodondaḷoi magí-mako. Manangka intua gina nami nádon poropatoian, mongombaḷ in kami modapot in diádon motarang in mata nami.

¹⁹ Táe Iko, Tuhan, umuranbí mongawasa, Iko in momarentabí modapot in mononoi.

²⁰ Umpaka dá taḷaan-Mu in kami modapot in námai tua in koonggotnea? Degá koḻiongan-Mudon in kami modapot in dunia naa modait?

²¹ Oo Tuhan, diádon in kami mobui mangoi kon ini-Mu; kami in mobuibí mangoi kon ini-Mu! Popobuidon in kaadaan nami ná dungkuḷmai.

²² Andeka degá iḷumbú-Mudon totu-totuu in kami? Diádon degá in imbuit in torú-Mu kon inami?