OMBAḶ 3 - Alkitab Singog In Mongondow Masa In Tanaa

Hukuman, pinotobatan, bo kamang

¹ Akuoibí in intau inta ain nokonanam kon roriga, popisí in kinoantugan in torú i Allah.

² Koyayú-koyayúdon in popogambatan-Nea kon inakó kon bonu in tampat inta totok in mosindip.

³ Akuoi in sinambok nopobui-buimai, takin diábí in tabi kinoouput in singgai.

⁴ Pinopomukaan-Nea in kinekeban modaḷom in awakku, bo tuḷanku mita in nongoputoḷ.

⁵ Binakut-Nea in akuoi in ajar bo nakit in gina.

⁶ Akuoi in pinakisa nogutun kon bonu in sindip naonda bo intau inta minatoi dungkuḷmai.

⁷ Akuoi in inumantungan-Nea kinoropot, dá diádon mokopongonu in akuoi.

⁸ Akuoi in kinumarak mopoigum in totuḷung, táe ki Allah in doíbí mokidongogmai.

⁹ Iḷonggaian-Nea in daḷan bayáanku in dinding mita batu.

¹⁰ Naonda bo beruang nogoḷat in Sia, naonda bo singa in Sia noḷabot kon inakó.

¹¹ Dinuduran-Nea in akuoi nodapot in sinumabat kon daḷan, bo binera-berak in akuoi bodongka sinaḷáan.

¹² Sia in nomadangdon kon puḷu in piot-Nea bo akuoi in pinopotanaan-Nea mako in piot-Nea.

¹³ Piot-Nea in noiḷambai kon awakku noiturak kon putúku.

¹⁴ Kinoouputbí in singgai akuoi kinosingan in bayongan in intau, bo umuran sigidon.

¹⁵ Tongábí inta mopait in inogoi-Nea kon inakó nobaḻí kaanon bo oinumonku.

¹⁶ Pogotku in pinoporadatnea kon butá, ingiponku in pinopo datong-Nea kon batu nodapot in noputoḷ.

¹⁷ Noonggotdon in akuoi in diá nokorasa kon kobiagan mopia; kinoḻiongankudon mongo naonda in porasaan moḷunganga.

¹⁸ Diádon in kinotonsimboróanku, noinggamádon in kamangku kon i Tuhan.

¹⁹ Morai kon binayáan bo rorigaku nádon onda bo nokaan kon rasum inta pait.

²⁰ Tantúkudon raion in tua, dá ginaku naonda bo dinorot.

²¹ Umpaka natua táe kamangku in buidon noiangoi, kon dodai in sinoropku in naa:

²² Tabi i Tuhan in umur mononoi, totabi-Nea in diábí modai-dait,

²³ umuranbí mobagu pomuḷoi in doḷo-doḷom totuu, ki Tuhan in totokbí in motoḷutui!

²⁴ Ki Tuhan in kapunyaankubí totobatú tua. Tuamai, umandoḷ in akuoi kon i-Nia.

Kamang in Israel

²⁵ Ki Tuhan tua in mopiabí kon intau inta umandoḷ mako kon i-Nia, bo kon intau inta motayak kon i-Nia.

²⁶ Dá, biódon mako mogoḷat in kita takin gina moodom modapot in ki Tuhan mamangoi motuḷung;

²⁷ biódon mako kita in mobalajar mobaḻí motaba kon dodai in moguodpa.

²⁸ Kon tungkuḷ in ki Tuhan mobogoi in roriga, yo koḻigai in kita ḻimitú bata-batangan bo kibio-biómai.

²⁹ Biódon mako kita in tumonsiup bo tumamad sin dika-dika bo oyúonpabí in kamang.

³⁰ Umpakabí sinokap bo ginosil, yo tua komintan in tarimaandon naton.

³¹ Sin, ki Tuhan in diábí inta diá motarima kon i naton modapot in mononoi.

³² Mopaḷut mako in Sia mobogoi in roriga Sia in monotabibí doman, sin Sia in umuranbí motabi kon i naton pongin tabi inta diábí in sigadnea.

³³ Diábí mopia in gina-Nea in mopomayá mako kon i naton in mororiga bo moajar in gina.

³⁴ Aka dimukud naton bo moajar in kon bonu in ponjara,

³⁵ aka kita bo kobuḻian in hak inta inogoi i Tuhan ,

³⁶ popisí in inta moadil sinuui, yo notantúbí kon ki Tuhan in nonotaaubí bo noindoi mako.

³⁷ Aka oyúon in kinodoí i Tuhan, yo notantúbí kon intau in diábí mokopongonu kon tua.

³⁸ Mopia bo moraat pinobayá tongábí moidoyon kon parenta i Tuhan.

³⁹ Nongonu sin intau in mustibí mongombaḷ aka hukumon in sia popisí in dosanea mita?

^40-41 Biódon mako kita in monaridi kon kobobiag naton, bo mobui kon i Tuhan Allah kon soroga. Igai bukatan naton in gina bo mosambayang,

⁴² “Kami in binaradosa bo nomarontak kon ini-Mu, o Tuhan, bo diábí iko mongampung.

⁴³ Kami in dinuduran-Mu bo iḻimod-Mu, totabi-Mu in noibuni kon torú-Mu.

⁴⁴ Torú-Mu in naonda bo goḷom inta mobunod totok dá diá koḷambaian in sambayang mita nami.

⁴⁵ Kami in binaḻí-Mudon naonda bo apat kon mata in bayongan in intau.

⁴⁶ Kami in siningkuḻe in bayongan in musung nami bo kinosingan;

⁴⁷ kami in kinoantugan in bodito bo kinorimumudan, bo nobiag kon bonu in anib bo ondok.

⁴⁸ Ḷuáku in moiḻig naonda bo ongkag popisí in bangusaku in norimumudon.

⁴⁹ Akuoi in mongombaḷbí diá mopodona-doná,

⁵⁰ modapot in Iko, kaasí Tuhan kon soroga, moindoimai kon inami.

⁵¹ Ginaku in noajardon in nokoontong kon ukur in bobay mita kon kotá nami.

⁵² Naonda bo ḷagapan, akuoi in dinuduran in musung inta diábí in kinodoyonannea moyaat in gina kon inakó.

⁵³ Akuoi in iḷumbú monia kobia-biag kon bonu in parigí inta noingkag bodongka binumbunan monia in batu.

⁵⁴ Tubig in noponik nodapot kon uḷuku, bo kon raianku, – ‘Dapotdon in naa in kobiaganku!’

⁵⁵ Oo Tuhan, akuoi in nokuani kon ini-Mu, nongkon anor in parigí inta moonag tua.

^56-57 Totok in poigumonku kaasí dikapa momompon kon bongoḷan-Mu kon onu inta poigumonku sinbá Iko in motuḷung kon inakó. Dá sambayangku in inindongogan-Mudon, bo Iko in namangoi dinimiug; iko in noguman, ‘Dika moondok.’

⁵⁸ Iko in namangoi noḷongasi noduḷu kon pelekaraku, o Tuhan, nyawaku in pinosaḷamat-Mudon.

^59-60 Iko in nokoontong kon aid moraat inta ain pinopoaid kon inakó tomayá moraat in musung inta mondoí kon inakó. Tuamai, o Tuhan, duḷuaidon in pelekaraku.

⁶¹ Iko, Tuhan, in nokodongog kon akuoi siningkuḻe; Kinotaauan-Mu in bayongan in tomayá monia.

⁶² Mosia in mongonguman kon soaḷ akuoi kinoouput in singgai. Sinbá mobodito in akuoi dá nomia in mosia tomayá moraat.

⁶³ Nongkon doḷo-doḷom nodapot in doḷom, akuoi in binaḻíbí intau inta kosingan mangoi.

⁶⁴ Hukumdon in mosia podudui in aid monia, o Tuhan.

⁶⁵ Kutukdon in mosia, bo biódon mako in mosia in mobiag kon bonu in diádon in kamang.

⁶⁶ Duduraidon bo yopúdon in mosia komintan modapot in mosia modait komintan kon dunia.”