NEHEMIA 8 - Alkitab Singog In Mongondow Masa In Tanaa

Ki Ezra nobaca kon Hukum kon tayowon in rayat

¹ Kon buḷan noginpitu intau in Israel aindon nogutun kon kotánea-kotánea. Kon singgai imitánea kon buḷan tatua mosia komintan noyosipun kon Yerusalem, kon bosínea inta kon tayowon in Bonawang Tubig. Mosia in nopoigum sinbá Buk Hukum in gamáan i Imang Ezra, intau inta totok in nonotaau in Hukum inta inogoi i Tuhan kon Israel pinongin i Musa.

² Bo dinia i Ezra in buk tatua kon tayowon in bayongan intau inta sinimindog, ḷoḷaki, bobay bo adí mita inta momangaḻedon.

³ Onda intua, nongkon doḷo-doḷom noidapot in noutu in singgai, ki Ezra in nobaca kon Hukum tatua kon i monia. Mosia komintan in nokidongog poḷat nopoḻimbonu kon gina.

⁴ Ki Ezra in sinimindog kon mimbar kayu inta ain pinomia sin pakéon kon poyodungkuḷan tatua. Kon dotá in koḷanannea sinimindog in intau mita tanaa: ki Matica, ki Sema, ki Anaya, ki Uria, ki Hilkia bo ki Maaseya; bo kon dotá in koḷoiginea: ki Pedaya, ki Misael, ki Malkia, ki Hasum, ki Hasbadana, ki Zakharia bo ki Mesulam.

⁵ Panggung inta sinindogan i Ezra tua in moḷantu-ḷantud nongkon intau mita tatua, dá komintanbí nokoontong in mosia kon inia. Nobukádon in sia kon buk tatua, bo mosia in sinimindog komintan.

⁶ Ki Ezra in noguman, “Dinayo-dayowdon in ki Tuhan, Allah inta moḷoben!” Bayongan in rayat notonggó kon ḻima kinoḷantud bo notubag, “Amin, amin!” Bo mosia in sinumungkud nosumba kon i Allah.

⁷ Nopaḷut mako kon tua nobuat in mosia bo sinimindog kon tampat monia tontaní, bo tongonumai in intau mita in Lewi noginsilang kon Hukum tatua kon i monia. Naa in intau mita in Lewi tatua: ki Yesua, ki Bani, ki Serebya, ki Yamin, ki Akub, ki Sabetai, ki Hodia, ki Maaseya, ki Kelita, ki Azarya, ki Yozabad, ki Hanan bo ki Pelaya.

⁸ Mosia in nonerjemah kon Hukum i Allah tua kon batúan in tonsilainea bo insilangan dá komangaḻeandon in rayat.

⁹ Nokodongogmai kon pinobacaan kon Hukum tatua, pinongoibu in rayat bo poḷat nongombaḷ. Dá ki gubernur Nehemia bo ki Imang Ezra inta nonotaau totok in Hukum tatua bo intau mita in Lewi inta noginsilang kon Hukum tatua, noguman kon bayongan in rayat nanaa, “Singgai naa in singgai inta mokudus kon i Tuhan Allahmu, dá dikadon pongoibúon andeka mongombaḷ.

¹⁰ Pobuidon in tanaa; pongaan bo ponginumdon takin ḷunganga in gina. Ogoidon in tongosilai in kaanon bo anggurmu kon i monia inta diá in kaanon bo inumon. Singgai in naa in singgai inta mokudus kon i Tuhan naton, dá dikadon mokoposusa. Ḷunganga inta inogoi i Tuhan kon i monimu in moginropotbí kon i monimu.”

¹¹ Bo intau mita in Lewi in nopoonow domandon kon rayat bo nobui-buimai in noguman, “Dika morobonoḷ in gina in kon singgai inta mokudus naa.”

¹² Dá nobuidon in rayat sin mongaan bo monginum poḷat mosila-silai mako kon kaanon kon intau mita ibanea. Noḷungangadon in gina monia sin kinomangaḻeandon monia in onu inta ain binaca bo dinongog monia tatua.

Rame in Singgai Moḷoben Ḷuḷung Daun

¹³ Nopoikoḷomai kon singgai bayongan tongguḷu in inanakan, imang mita bo intau mita in Lewi, minayá kon i Ezra sin mobalajar kon totundú mita in Hukum i Tuhan.

¹⁴ Nouḻí doman monia kon bonu in Hukum inta inogoi i Tuhan pinongin i Musa, ki Tuhan in nopotabá doman kon umat in Israel in mogutun kon bonu in ḷuḷung mita kon bonu in porameanpa kon Singgai Moḷoben in Ḷuḷung Daun.

¹⁵ Tuamai in kon sinangkup in Yerusalem kon kotá mita bo kon ḻipú mita, mosia in nopotaau in parenta tanaa, “Bayádon kon buḷud bo pogamá kon tanga mita in ḷokuyú, in zaitun, pangkoi in kayu ḷana, in palem bo pangkoi in kayu mita ibanea sin aidan ḷuḷung podudui in atorang kon bonu in Buk in Hukum.”

¹⁶ Bo minayádon in rayat nogamá kon tanga mita tatua. Mosia komintan in nomia kon ḷuḷung mita kon tudu mita in baḷoi monia inta notondodai, kon bosí in baḷoinea, kon bosí dotá in muna in Baḷoi Tuhan, kon lapangan kon diug in Bonawang Tubig bo kon lapangan kon diug in Bonawang Epraim.

¹⁷ Bayongan in rayat inta ain nobui nongkon pinoḷumbúan tatua in nogaid kon ḷuḷung mita tatua, bo nogutunpa kon tua. Naadon in dungkuḷ totok pinogaidan kon ná tatua pinangkoipamai kon i Yosua ki adí i Nun, dá komintandon nopia in gina bo noḷunganga.

¹⁸ Pitu nosinggai koonggotnea in mosia norame. Pomuḷoi in singgai tongonumai nosilai in buk Hukum i Allah in bacaanmai i Ezra. Kon singgai inwaḷunea inaidandon in upacara pinomaḷutan, podudui in atorang in Hukum.