NEHEMIA 5 - Alkitab Singog In Mongondow Masa In Tanaa

Ki Nehemia notuḷung kon intau bogá

¹ Diá noonggot kon tua nobayong in intau in Yahudi, pinomayá ḷoḷaki andeka bobay, nomangkoidon mogamui kon oaid in intau mita inta tobangusanea.

² Oyúon in noguman, “Ki adíku in nobayong. Moparaḷu in kami kon gandum sin kaanon kon kobiagan.”

³ Oyúon doman in moguman, “Takin pakisa in akuoi nopotomoyó in gobá, gobá in anggur bo baḷoi nami sin potaḷui kon gandum sinbá diá matoi in gogoy.”

⁴ Bo oyúon doman in moguman, “Kami in noḷuandon kon doit sin poguboḻi kon pajak inta ain sinantú i datu kon pajak in gobá in tudunea bo gobá in anggur nami.

⁵ Kami naa in intaubí doman in Yahudi! Ki adí nami in notongkaibí doman in adí mita in Yahudi inta ibanea! Umpaka natua táe nopakisadon in kami mopomayá mako kon i adí mita nami mobaḻí ata. Nodapot in oyúon in ki adí nami bobay in pinotaḷuidon nobaḻí ata. Kami in diá kodaya sin gobá in tudunea bo gobá in anggur nami in pinotomoyódon nami.”

⁶ Nokodongogmai kon amui monia tatua, sinumorú totok in akuoi

⁷ bo nonantúdon kon oyúon in aidanku. Bo sinoboḷowku in guyanga mita in ḻipú bo itoi mita in rayat. Gumanku, “Moiko in mondorotbí kon i utatmu mita tontaní!” Onda intua nomia in akuoi kon bakid noyotakin sin momaḷut kon soaḷ tatua,

⁸ bo noguman, “Takin ḻimbatú in ropot kita in notobutdon kon i utat mita naton intau in Yahudi inta pakisa nopotaḷui in awaknea kon bangusa ibanea. Táe tanaa in moikodon in momakisa kon i monia mopotaḷui in awaknea kon i monimu, bokaka moiko doman in intau Yahudi!” Itoi mita tatua in diá nokotubag umpaka tongá totontagá.

⁹ Bo Gumanku bui, “Aidmu tua in diábí mopia! Mustibí in moiko mobiag takin motoguondok kon i Allah. Dá musung naton inta diá ko Tuhan tua in diá ogoian monimu in kasampatan moningkuḻe kon inaton.

¹⁰ Akuoi tontaní ki utatku mita bo topotakinku mita ain nopoḷuan in doit bo gandum kon rayat. Kami in diábí moigum bui kon tua.

¹¹ Dá moiko in mustibí doman momopat kon boḻi mita in rayat kon inimu tua, pinomayá doit andeka gandum, andeka anggur andeka ḷana in zaitun. Ḷagidon pobui in gobá monia tudunea, gobá in anggur, gobá in zaitun bo baḷoi monia!”

¹² Itoi mita tatua in notubag, “Tonggina tatua in duduianbí nami. Pobuionbí nami in tua komintan bo diábí moigum kon tondan in onu bo onu nongkon i monia.” Bo inoiníku in imang mita bo pinotabáku in itoi mita koina nongibot kon tayowon in imang mita tatua, kon onu inta ain siningog monia tatua, totu-totuubí aidan monia.

¹³ Onda intua iḷongkutku in aḷuang bo pinoḷuatkudon poḷat noguman, “Igumon mako nanaadon in ki Allah mopomisik kon intau mita inta diá mogintompod kon dandinea. Intau tatua in mobaḻídon diá koonu bo onu, baḷoi bo bayongan in kapunyaannea in gamáandon i Allah!” Bayongan in intau kon sidang tatua in notubag, “Amin!” bo nodayow kon i Tuhan. Dá itoi mita tatua nogintompod kon dandi monia.

Ki Nehemia in mopia in gina

¹⁴ Akuoi in nobaḻídon gubernur in Yohuda mopuḷú bodoyowá notaong in koonggotnea, pinangkoi nongkon taong indoyowa nopuḷú noidapot in taong intoḷu nopuḷú bodoyowá kon pinomarentaan i Datu Artahsasta. Kon dodai intua akuoi bo ki utatku mita in diábí kon dodai in onda in nogamá kon doit tondan in ḷopíku saḷaku gubernur.

¹⁵ Gubernur mita inta noiuna kon inakó in nokodugangdon kon roriga in rayat sin mosia in monuntut kon opat nopuḷú in doit saḷaka in tosinggai sin pakéon kon pongaanan bo anggur. Moidapot doman in pogawai mita monia in mondorot kon rayat. Táe akuoi in doíbí mogaid kon natua sin moondok in akuoi kon i Allah.

¹⁶ Bayongan in ropotku pinakéku mogaid bui kon dinding bo akuoi in diábí nokouḻí kon butá topiḻikmai nobaḻí tontuḻí, umpaka komintan bobantungku in sinumakin nogaid kon pinogaidan kon dinding tatua.

¹⁷ Mogatut bo ḻima nopuḷú in intau Yahudi bo guhanga mita in ḻipú, mosia in biasabí pokaanonku kon baḷoiku, diápabí pinoyoiap in mokokiangoi mita nongkon bangusa mita topodiugmai nami.

¹⁸ Pomuḷoi in singgai komintanbí doitku tontaní in potaḷui kon sapi, onom in domba inta moḷomumu bo mobayong in manuk. Koḻikud intua, pomuḷoi in mopuḷú nosinggai impuḻinganku in tampat in anggurku. Umpaka natuata akuoi in doíbí monuntut kon tondan pinogaidanku saḷaku gubernur, sin kinotaauanku kon beban in rayat mobogatdon.

¹⁹ Poigumonku o Allah, toropdon in bayongan inta pinomiaku kon bangusa tanaa bo barakataipa in akuoi.