NEHEMIA 4 - Alkitab Singog In Mongondow Masa In Tanaa

Aid i Nehemia kon musung in intau Yahudi

¹ Naonda in ki Sanbalat nokodongog kon kami intau in Yahudi koyogot in monompia kon dinding in kotá sinumorú totok in sia bo nomangkoidon nokopoonagmai kon inami.

² Kon tayowon in totakinnea mita bo tontara in Samaria, sia in noguman, “Onu in koyogot aidan in intau Yahudi nobodito inta diá mokopongonu tua? Degá mosia in moibog moposindog bui in kotá tanaa? Kai monia kamai oaidan tatua in moḷapatbí tosinggai, tongá pongin moposumba in kuruban? Degá apat inta nádon buḷud inta ain nopokak tua in motaau baḻíon batu mita podinding?”

³ Bo ki Tobia inta sinimindog kon diugneamai in noguman doman, “Indoiai in dinding inta pinosindog monia! Tongákabí ungkú in kayuon yo mokoumpagbí kon tua!”

⁴ Dá nosambayangdon in akuoi, “Oo Allah, indongogaipa kaasí in naonda in pinononingkuḻe kon inami! Popountudon bui kon uḷu monia tontaní in singkuḻe monia tatua. Biódon mako in bayongan kapunyaan monia in agowon bo mosia tontaní in akuton nobaḻí intau inta dinakop pobayá in butá ibanea.

⁵ Dika ampungan in aid monia inta moraat bo dika ḻiongon in dosa monia, sin mosia in noningkuḻedon kon inami inta koyogot noposindog bui tanaa.”

⁶ Kon dodai intua kami in umuranbí doman nonompia kon dinding tatua, bo diá noonggot kon tua bayongan in dinding tatua nodaitdon sinompia bui noidapot in tongobotak in koḷantudnea, sin rayat in nogaid takin ibog moḷoben.

⁷ Naonda in ki Sanbalat, ki Tobia bo intau mita nongkon Amon bo Asdod bo intau mita in Arab nokodongog kon pinonompiaan kon dinding in Yerusalem tatua in totuu motoyong bo bubú mita kon dinding in nomangkoidon pinaḷonan, sinumorúdon totok in mosia.

⁸ Mosia in noyopakat monubu kon Yerusalem sin mopotombauk.

⁹ Tuamai in nosambayang in kami kon i Allah nami bo noḷukad kon kotá tatua doḷom bo singgai.

¹⁰ Táe intau in Yohuda nomangkoidon nopodondong in dondong amui tanaa: “Ropot naton in nodait sin mogakut kon datog, bokaka apat in nobayongpa totok. Nádon diá mokotongod in kita mogaid nanaa moposindog in dinding in kotá tanaa.”

¹¹ Kon tungkuḷ intua musung nami monomayá kon monubu kon inami dumaḻí-daḻí, bo moḻimod kon inami dá oaidan nami in moigogai.

¹² Táe intau in Yahudi inta nogutun kon diug monia, nopobui-buimaidon in namangoi kon inami sin mopotaau in tomayá in musung tatua.

¹³ Tuamai in akuoi nosilai magí-mako kon pitow, pandong bo piot kon rayat, bo sinampatku in mosia pinodudui kon batúan in inanakannea kon ḻikudmai in dinding, kon tampat mita inta diápa noḷapat sinompia.

¹⁴ Naonda in inontongku kon rayat in moondok, noguman in akuoi kon i monia, bo kon mototundú mita bo itoi mita, “Dika moondok kon musung! Toropdon in ki Tuhan inta moropot bo inta motoyang, bo poḷongasidon moyotakin sin kopontingan i utatmu mita, bo kon adí mita bo kon i buḷoi bo baḷoimu!”

¹⁵ Musung mita nami in nokodongog kon tomayá monia in kinotaauandon nami. Dá nosadardon kon ki Allah ain nonongkuḷabot kon tomayá monia tatua. Onda intua kami komintan in bui nogaid nonompia kon dinding tatua.

¹⁶ Táe pinangkoi kon singgai tatua tongá tongobotak nongkon intauku in nogaid, bo inta tongobotakpa doman in noḷukad takin nogiḷambung in ḷambung parang bo nokadai kon pandong, kaḻeaw bo piot. Itoi mita in rayat in notuḷung domandon totu-totuu kon bayongan in rayat

¹⁷ inta koyogot in monompiamai kon dinding tatua. Intau mita inta momotaan kon bahan in bangunan nopobayá in oaidan tatua tongá nomaké in ḻima tosimpaḷ, bo ḻima tosimpaḷ in kokada-kadai in pakakat in parang.

¹⁸ Mogogaid mita kon pondasi in nogaid takin doman koguma-gumá in pitow. Mogogirup kon torompet tomponuot in bahaya, umuran kon diugkumai.

¹⁹ Bo akuoi in noguman kon rayat, intau mita inta doduduianmai bo itoi mita, “Oaidan tanaa in noibaya-bayádon mako noyayú, dá noibaya-bayádon mako in kita kon kinoouput in dinding tanaa, intau mita tobatú noyogiyayúandon in intau ibanea.

²⁰ Dá aka moiko mokodongog kon singog in torompet, ḷagidon poyosipun kon ḻibumai nami kon naa. Ki Allah naton in moparangbí sin kopontingan naton.”

²¹ Kami in nogaid pinangkoi kon subupa noidapot in koontongandon in tundi mita kon ḷangit. Tongobotak in nongkon rayat in nonompia kon dinding, bo ibanea mako in moḷukad takin kokada-kadai in pandong.

²² Kon dodai intua bayongan in mogogaid takin intau mobobantung monia, pinoki gogaianku kon Yerusalem. Takin natua kon dodai in doḷom motaaudon in kami moḷukad kon kotá bo mobayag monik monompia bui kon dinding.

²³ Akuoi tontaní, topotakinku mita, intauku mita bo moḷoḷukadku mita tantú mogiḷambung in ḷambung pogogaid, pinomayá singgai andeka doḷom. Kami in umuranbí moḷukad, takin kokada-kadai in pakakat in parang.