NEHEMIA 3 - Alkitab Singog In Mongondow Masa In Tanaa

Pinonompiaan kon dinding in Yerusalem

¹ Naa in boba-bobayánea kon pinonompiaan kon dinding in Yerusalem. Imang Moḷoben ki Elyasib bo totakinnea mita noposindog bui in Bonawang Domba, nopoguḻit in ḷoḻingkopnea mita bo sinondídon kon i Tuhan. Sinompia monia bo nonondí kon dinding noidapot kon Ḷangkeang Mogatut bo noidapot kon Ḷangkeang Hananeel.

^2-16 Koḻikud in imang mita tatua, intau mita tanaa in nonompia kon dinding in kotá bo ḷoḻingkop mita moḷoben bo ḷangkeangnea mita kon bonu in pipidan noiduduimai naa: Intau mita in Yerikho, Ki Zakur ki adí i Imri Inanakan i Senaa: Bonawang Toyá bo saḷabaku mita, ḷoḻingkop mita, sikurup mita bonoboinea mita. Ki Meremot ki adí i Uria ki ompu i Hakos. Ki Mesulam ki adí i Berekhya ki ompu i Mesezabeel. Ki Zadok ki adí i Baana Intau in kotá in Tekoa (itoi mita in kotá tatua doí mogaid kon oaidan mobogat). Ki Yoyada ki adí i Paseah bo ki Mesulam ki adí i Besoja: Bonawang in Yesyana takin saḷabaku mita, ḷoḻingkop mita, bout mita bonoboinea mita. Ki Melaca nongkon Gibeon bo ki Yadon nongkon Meronot. Intau mita in Gibeon bo intau mita in Mizpa: dinding noidapot in komaḻig i gubernur Eprat Toyopan. Ki Uziel, mononontaḷ kon buḷawan, ki adí i Harhaya. Ki Hananya, intau inta momomia kon ḷana mobondu; noidapot kon Dinding Mooḷad. Ki Repaya ki adí i Hur, inta nongawasa kon tongobotak in Yerusalem. Ki Yedaya ki adí i Harumap: dinding inta noyodiug in baḷoinea tontaní. Ki Hatus ki adí i Hasabneya Ki Malkia ki adí i Harim bo ki Hasub ki adí i Pahat-Moab: dinding noiduduimai bo Ḷangkeang Pononontuḷúan. Ki Salum ki adí i Halohes, inta nongawasa kon tongo botak in Yerusalem, dinuḷuan i adínea mita bobay. Ki Hanun bo intau mita in Zanoah: Bonawang in Ḷopá takin ḷoḻingkop mita, sikurup mita bonoboinea mita. Bo dinding doman 440 nometer noidapot kon Bonawang Yoyatan. Ki Malkia ki adí i Rekhab, inta nongawasa in Bet-Kerem: Bonawang Yoyatan takin ḷoḻingkop mita, bout mita bonoboinea mita. Ki Salum ki adí i Kolhoze, nongawasa in Mizpa: Bonawang Bokaká takin atop, ḷoḻingkop mita, bout mita bonoboinea mita. Bo dinding doman in Tabang Selah kon diug in taman komaḻig noidapot in tukadnea mita inta mosiḻig nongkon kotá i Daud. Ki Nehemia ki adí i Azbuk, inta nongawasa kon tongobotak in Bet-Zur: dinding moidapot kon poḷoḷobongan kon motoḷuadí i Daud, tabang inta pinomia bo baḷoi in pahlawan.

Intau mita in Lewi inta noitakin nonompia kon dinding

^17-21 Moiduduimai doman naa in dinding ibanea inta pinosindog in intau in Lewi: Ki Rehum ki adí i Bani Ki Hasabya, inta nongawasa kon tongo botak in Kehila. Dinding inta kon bonu in pomarentaannea tontaní. Ki Binui ki adí i Henadad, inta nongawasa in tongo botak in Kehila Ki Ezer ki adí Yesua, inta nongawasa kon Mizpa: dinding kon sikumai in daḷan kon tayowon in baḷoi in sonjata. Ki Barukh ki adí i Zabai: dinding nongkon siku in daḷan noidapot kon ngara in Baḷoi i Imang Moḷoben ki Elyasib. Ki Meremot ki adí i Uria ki ompu i Hakos: dotá in dinding nongkon ngara in baḷoi i Elyasib noidapot kon popod in baḷoi tatua.

Imang mita inta dinumudui nonompia kon dinding

^22-26 Tongonumai nosilai in dinding noiduduimai in sinompia in imang mita kon bonu in pipidan noiduduimai naa: Imang mita inta nogutun diá noyayú nongkon Yerusalem. Ki Benyamin bo ki Hasub: dinding kon muna in baḷoi monia. Ki Azarya ki adí i Maaseya inta ki adí i Ananya: dinding kon diug in baḷoinea. Ki Binui ki adí i Henadad: dinding nongkon baḷoi i Azarya noidapot kon siku in dinding. Ki Palal ki adí i Uzai: dinding nongkon siku in dinding bo ḷangkeang in komaḻig kon dotá in ḻimonikannea, kon diug in dangkuḷon in poḷoḷukadan. Ki Pedaya ki adí i Paros: dinding noidapot in kon muna in Bonawang Tubig kon dotá in pomukaan bo ḷangkeang poḷoḷukadan kon Baḷoi Tuhan. (Diá noyayú nongkon tua oyúon in butá inta tangoinea in Opel, pogogutunan in intau mita inta mogogundoi kon Baḷoi Tuhan.)

Mogogaid mita ibanea

^27-32 Tongonumai nosilai in dinding noiduduimai in sinompia in intau mita tanaa kon bonu in pipidan noiduduimai naa: Intau mita in kotá in Tekoa: dinding nongkon muna in ḷangkeang poḷoḷukadan kon Baḷoi Tuhan noidapot kon dinding in butá in Opel. Imang mita inta nogutun kon diug in Bonawang Kabaḷo: dinding inta noyogintayow in baḷoi monia kon batúannea nongkon bonawang tatua nopobayá ná utuan. Ki Zadok ki adí i Imer: dinding inta noyogintayow in baḷoinea. Ki Semaya ki adí i Sekhanya, moḷoḷukad kon Bonawang kon dotá in pomukaan: dinding inta noyogintayow in baḷoinea. Ki Hananya ki adí i Selemya bo ki Hanun ki adí Zalap inta inggonomnea. Ki Mesulam ki adí i Berkhya: dinding inta noyogintayow in baḷoinea. Ki Malkia, mogogaid kon buḷawan: dinding inta noyogintayow noidapot kon asrama in intau mita inta mogaidmai kon Baḷoi Tuhan bo baḷoi mita in mododagang kon muna in Bonawang Mipkad bo noidapot kon diug in gopot kon ḻimonik kon siku in dinding kon dotá in timur laut. Mogogaid mita kon buḷawan bo mododagang: kon dinding inta imbuitnea pinangkoi kon gopot kon ḷundukan kon siku in dinding noidapot kon Bonawang Domba.