NEHEMIA 12 - Alkitab Singog In Mongondow Masa In Tanaa

Tangoi in imang mita bo in intau mita in Lewi

¹ Naa in tangoi mita in imang mita bo intau mita in Lewi inta nobui nongkon pinoḷumbúan noyotakin i Zerubabel ki adí i Sealtiel bo i Imang Moḷoben ki Yesua:

^2-7 Imang mita: Ki Seraya, ki Yeremia, ki Ezra, Ki Amarya, ki Malukh, ki Hatus, Ki Sekhanya, ki Rehum, ki Meremot, Ki Ido, ki Ginetoi, ki Abia, Ki Miyamin, ki Maaja, ki Bilga, Ki Semaya, ki Yoyarib, ki Yedaya, Ki Salu, ki Amok, ki Hilkia, bo ki Yedaya. Mosia in imang mita tongguḷu kon tungkuḷ in pinomarentaan i Yesua.

⁸ Intau mita in Lewi: Itoi in mopodondong in sukur: ki Yesua, ki Binui, ki Kadmiel, ki Serebya, ki Yohuda bo ki Matanya.

⁹ Mododondong inta mopodondong in dondong totubag: ki Bakbukya, ki Uni bo totakinnea toinanakan.

Buí i Imang Moḷoben ki Yesua

¹⁰ Naa in buí inanakan i Imang Moḷoben ki Yesua: ki Yesua, ki Yoyakim, ki Elyasib, ki Yoyada,

¹¹ Ki Yonatan, ki Yadua.

Imang mita itoi

^12-21 Naa in tangoi in imang mita itoi takin inanakan monia kon tungkuḷ in ki Yoyakin nopobayá in oaidannea nobaḻí Imang Moḷoben: Imang Inanakan Ki Meraya Ki Seraya Ki Hananya Ki Yeremia Ki Mesulam Ki Ezra Ki Yohanan Ki Amarya Ki Yonatan Ki Melikhu Ki Yusup Ki Sebanya Ki Adna Ki Harim Ki Helkai Ki Merayot Ki Zakharia Ki Ido Ki Mesulam Ki Gineton Ki Zikhri Ki Abia … Ki Minyamin Ki Piltai Ki Moaja Ki Samua Ki Bilga Ki Yonatan Ki Semaya Ki Matnai Ki Yoyarib Ki Uzi Ki Yedaya Ki Kalai Ki Salai Ki Heber Ki Amok Ki Hasabya Ki Hilkia Ki Netaneel Ki Yedaya

Imang Inanakan Tangoi mita in motoḷuadí mita in imang bo intau mita in Lewi

²² Tangoi in tongguḷu mita in motoḷuadí in intau mita in Lewi bo motoḷuadí in imang ain pinais kon tungkuḷ in Imang Moḷoben noiduduimai naa: ki Elyasib, ki Yoyada, ki Yohanan bo ki Yadua. Tangoi mita tatua in nopaḷut pinais kon dodai in ki Darius nomarenta nobaḻí datu in Persia.

²³ Táe aka tangoi mita in tongguḷu mita in inanakan in Lewi tongábí pinais noidapot kon tungkuḷ in ki i Yonatan ki ompu i Elyasib.

Pinosilaian kon oaidan kon Baḷoi Tuhan

²⁴ Kon bonu in tongganut i Hasabya, i Serebya, i Yesua, i Binui bo ki Kadmiel, intau mita in Lewi sinilai kon bonu in paanan mita. Pomuḷoi mako doyowa nopaanan in modayow kon i Tuhan bo mopoyaput in sukur kon i-Nia mositubagan, podudui in atorang i Datu Daud, mogogundoi i Allah tua.

²⁵ Intau mita inta moḷoḷukad mita kon ngara mita in Baḷoi Tuhan inta pinoki ḷukadan in gopot mita inta pototagúan kon kaanon kon diug in ngara in Baḷoi Tuhan in ki Matanya, ki Bakbukya, ki Obaja, ki Mesulam, ki Talmon bo ki Akub.

²⁶ Mosia tua in nobiag kon tungkuḷ i Yoyakin ki adí i Yesua ki ompu i Yozadak bo kon tungkuḷ i Gubernur Nehemia bo i Imang Ezra intau nonotaau totok in hukum tua.

Ki Nehemia in nonoguḷapat kon dinding in kotá

²⁷ Naonda in dinding Yerusalem sinoguḷapatandon, intau mita in Lewi in inoiní nongkon bayongan in tampat pinogutunan monia, sinbá dumudui moporame kon tua takin dondong sukur monia mopomaké in musik in gambus bo kecapi.

²⁸ Dá noyosipundon in mododondong mita nongkon motoḷuadí mita in Lewi tua, pinomayá nongkon butá tampat pinogutunannea kon diug in Yerusalem, andeka nongkon kotá mita inta kon diug in Netopa,

²⁹ nongkon Bet-Gilgal, Geba bo Asmawet.

³⁰ Imang mita bo intau mita in Lewi tatua nopobayá in upacara pondaritan kon awak monia onda intua kon i rayat, bo kon ḷoḻingkop mita in moḷoben bo dinding in kotá.

³¹ Bo pinotabákudon in itoi mita in Yohuda moponik kon dinding sin monompia kon doyowa nopaanan inta moḷoben mopipid moḻibu kon kotá sindaḷan mopodondong in dodayow sukur kon i Allah. Paanan inta muna in mopipid kon tudu in dinding, mopobayá ná koḷanan, kon Bonawang Yoyatan.

³² Ki Hosaya in minayá kon tumi in mododondong, sinakinan in tongosilai in itoi mita intau in Yohuda.

^33-35 Imang mita noiduduimai naa in minayá kon tumimai monia sindaḷan mogirup kon torompet: ki Asarya, ki Ezra, ki Mesulam, ki Yohuda, ki Benyamin, ki Semaya bo ki Yeremia. Mosia in sinakinan i Zakharia ki adí i Yonatan ki ompu i Semaya. Tongonumai nongkon mogoguyangnea in ki Matanya, ki Mikha, ki Zakur, nongkon inanakan i Asap.

³⁶ Kon tuminea dumuduianmai in agat mita nongkon inanakannea, ki Semaya, ki Azareel, ki Milalai, ki Gilalai, ki Maai, ki Netaneel, ki Yohuda bo ki Hanani. Mosia komintan in nodia kon pakakat mita in musik notongkai ná inta pinogogitog i Datu Daud, mogogundoi i Allah tua. Ki Imang Ezra inta nonotaau totok in Hukum i Allah tua, in minayá kon muna in pipidan tatua.

³⁷ Noiyaputmai in Ngara Bonawang in Tubig Noitampurang mosia in nomurow bo nonakod kon tukad in Kotá i Daud, nongin komaḻig i Daud, bo nobui kon dinding kon Bonawang in Tubig kon dotá in pomukaan kon kotá.

³⁸ Paanan mododondong inta tobatú in mopipid kon tudu in dinding mopobayá ná koḷoigi bo dinuduianku noyotakin in tongosilai in rayat. Kami in nopipid nongin ḷangkeang Pononontuḷúan noidapot in Dinding Mooḷad.

³⁹ Bo kami in nongin Bonawang Epraim, Bonawang Koyongan, Bonawang Toyá, Ḷangkeang Hananeel bo Ḷangkeang Mea noidapot kon Bonawang Domba. Pipidan nami in nogogai kon diug in Bonawang Poḷoḷukadan kon diug in Baḷoi Tuhan.

⁴⁰ Dá noiyaputdon in doyowa nopaanan mododondong tatua kon diug in Baḷoi Tuhan. Koḻikud in itoi mita kon bonu in paananku,

⁴¹ dinumudui doman in imang mita inta nogirup kon torompet. Mosia tua in ki Elyakim, ki Maaseya, ki Minyamin, ki Mikha, ki Elyoënai, ki Zakharia bo ki Hananya;

⁴² kon tumi monia dumuduianmai in ki Maaseya, ki Semaya, ki Eleazar, ki Uzi, ki Yohanan, ki Malkia, ki Elam bo ki Ezer. Mododondong nodondong kon bonu in tongganut i Yizrahya.

⁴³ Kon singgai tatua nobayong in kuruban inta pinosumba kon i Tuhan. Rayat noḷunganga in gina sin binaḻídon i Allah in mosia nopia in gina. Bobay mita bo mongo adí mita in sinumakin doman norame, bo singog monia inta moḷunganga tua in kinodongogan noidapot in moyayú.

Sumbangan motantú kon ibada kon Baḷoi Tuhan

⁴⁴ Kon dodai intua tongonumai intau in pinoki ḷukadan in gopot mita inta pinotagúan kon tongkaaḷ tampat pototagúan kon sumbangan mita ogoi kon Baḷoi Tuhan, noitakin doman in sosumba mopuḷú noporosen bo bungai in boyó inta dungkuḷ kon pomuḷoi in taong. Moḷoḷukad mita tatua in kitogi totaau mosipun kon sumbangan mita tatua nongkon gobá mita kon diugmai in kotá mita. Sumbangan mita tatua in ogoi monia kon imang mita bo intau mita i Lewi, podudui in atorang in Hukum. Intau mita in Yohuda mohoromatbí kon imang mita bo intau mita in Lewi tatua,

⁴⁵ sin mosiabí tua inta nopobayá in upacara pondaritan bo upacara mita ibanea inta ain pinarenta i Allah. Intau mita inta mopogogitog in musik bo moḷoḷukad kon ngara in Baḷoi Tuhan in mopobayá doman in oaidan mita monia, podudui in atorang i Datu Daud bo i Salomo, ki adínea ḷoḷaki.

⁴⁶ Pinangkoi kon i Datu Daud bo ki Asap inta monotaau totok kon musik, intau mita mododondong ain nopodondong in dondong dodayow sukur kon i Allah.

⁴⁷ Kon tungkuḷ i Zerubabel bo kon tungkuḷ doman i Nehemia, bayongan in rayat Israel in nobogoi in sosumba sin pobantung pakéon muḷoi in singgai in mododondong mita bo moḷoḷukad mita kon ngara in Baḷoi Tuhan. Rayat in mobogoi in sosumba inta sinantú kon intau mita in Lewi bo intau mita in Lewi in mobogoi doman kon imang mita in tonsilai inta ain sinantú.