NEHEMIA 11 - Alkitab Singog In Mongondow Masa In Tanaa

Intau mita inta nogutun kon Yerusalem

¹ Itoi mita in nogutun notantú kon Yerusalem bo rayat in nopogonik in undi sin momiḻí kon motoḷuadí nongkon batúan in motoḷuadí mopuḷú inta musti mogutun kon kotá motusi, Yerusalem. Inta diá kinopiḻían in motaaubí mogutun kon kotá mita ibanea.

² Kon sigad monia oyúonbí in takin ḻimbatú in gina mogutun motantú kon Yerusalem bo mosia in dinayow in rayat.

³ Kon kotá mita ibanea, rayat in Israel, imang mita intau mita in Lewi, mogogaid mita kon bonu in Baḷoi Tuhan, bo buí in bobantung mita i Salomo in nogutun kon butá kapunyaan monia bo kon kotá mita monia.

^4-6 Tongonumai in intau nongkon suku in Yohuda bo Benyamin in nogutun kon Yerusalem. Naa in tangoi mita monia. Suku in Yohuda: Ki Ataya ki adí i Uzia, ki ompu i Zakharia. Tongonumai in kon sigad in mogoguyangnea: ki Amarya, ki Sepaca bo ki Mahalaleel, ki Peres, ki Yohuda. Kobayong monia in 468 inta mongotorindog. Ki Maaseya ki adí i Barukh, ki ompu i Kolhoze. Tongonumai in kon sigad in mogoguyang monia: ki Hazaya, ki Adaya, ki Yoyarib, ki Zakharia, ki Syela, ki Yohuda.

^7-8 Suku Benyamin: Ki Salu ki adí i Mesulam, ki ompu i Yoëd. Tongonumai in kon sigad in mogoguyangnea naa: ki Pedaya, ki Kolaya, ki Maaseya, ki Itiel bo ki Yesaya. Ki Gabai bo ki Salai. Mosia in ginaḷum modagin i Salu. Kobayongnea komintan in 928 in sinongganutan i

⁹ Yoël ki adí i Zikhri bo oḻitnea, ki Yohuda ki adí i Hasenua.

^10-11 Imang mita: Ki Yedaya ki adí i Yoyarib bo ki Yakhin. Ki Seraya ki adí i Hilkia, ki ompu i Mesulam. Tongonumai kon sigad in mogoguyangnea in naa: ki Zadok, ki Merayot, ki Ahitub inta nobaḻí Imang Moḷoben.

¹² Kobayongnea in 822 in imang mita inta nopobayá in oaidan monia kon Baḷoi Tuhan. Ki Adaya ki adí i Yeroham, ki ompu i Pelalya. Tongonumai in kon sigad in mogoguyang monia in naa: ki Amzi, ki Zakharia, ki Pasyhur bo ki Malkia.

¹³ Tongguḷu mita in motoḷuadí kon bonu in inanakan tatua kobayongnea in 242 intau. Ki Amasai ki adí i Asareel, ki ompu i Ahzai. Mogoguyangnea ibanea in naa: ki Mesilemot bo ki Imer.

¹⁴ Nongkon inanakan tanaa in 128 intau inta mongotorindog. Itoi monia in ki Zabdiel, ki adí i Gedolim.

^15-18 Intau mita i Lewi: Ki Semaya ki adí i Hasub ki ompu i Azrikam. Mogoguyangnea ibanea inta kon sigadnea in ki Hasabya bo ki Buni. Ki Sabetai bo ki Yosabab, intau mita in Lewi inta moponting inta noḷukad kon oaidan kon ḷuai in Baḷoi Tuhan. Ki Matanya ki adí i Mikha, ki ompu i Zabdi, nongkon buí i Asap. Sia in itoi in mododondong kon dondong mopoyaput in sukur. Ki Bakbukya in simpaḷ i Matanya. Ki Abda ki adí i Samua, ki ompu i Galal, nongkon buí i Yedutun. Kobayongnea komintan in 284 in intau.

¹⁹ Moḷoḷukad mita kon bonawang: Ki Akub, ki Talmon bo totakin mita monia. Kobayongnea komintan in 172 in intau.

²⁰ Rayat in Israel, imang mita bo intau mita in Lewi inta ki agatnea in nogutun kon butá monia kon noyagi-yagimai in kotá kon Yohuda.

²¹ Mogogaid mita kon bonu in Baḷoi Tuhan in nogutun kon kotá in Yerusalem inta Opel in tangoinea. Mosia in nogaid kon bonu in tongganut i Ziha bo Gispa.

²² Moḷoḷukad intau mita in Lewi inta nogutun kon Yerusalem in ki Uzi ki adí i Bani ki ompu i Hasabya. Kon sigad in mogoguyangnea in ki Matanya bo ki Mikha. Sia in noituot kon inanakan i Asap, inta inogoian in oaidan moindoi kon musik kon poibadaan kon Baḷoi Tuhan.

²³ Kasampatan in batúan inanakan in moindoi kon musik kon Baḷoi Tuhan pomuḷoi in singgai in sinantú podudui in atorang i datu.

²⁴ Ki Petahya ki adí i Mesezabeel nongkon inanakan i Zera bo suku Yohuda in nobaḻí oḻit in bangusa Israel kon komaḻig in Persia.

Intau mita inta nogutun kon kotá mita ibanea

^25-30 Nobayong in kon sigad in rayat in nogutun kon kotá mita inta noyodiug in gobá mita monia. Tongonumai in intau nongkon suku in Yohuda in nogutun kon butá inta kon sigad in Bersyeba kon dotá in toḷatan bo Ḷopá in Hinom kon dotá in utuan. Mosia in nogutun kon kotá mita inta noiduduimai naa bo kon ḻipú mita inta kon diugneamai: Kiryat-Arba, kon Dibon, Yekabzeel Yesua, Molada, Bet-Pelet Hazar-Sual, Bersyeba Ziklag, Mekhona En-Rimon, Zora, Yarmut, Zanoah, Adulam, Azeka, Lakhis.

³¹ Tongonumai in intau nongkon suku Benyamin in nogutun kon Geba, Mikhmas, Ai, Betel bo ḻipú mita kon diugnea,

³² kon Anatot, Nob, Ananya,

³³ Hazor, Rama, Gitaim,

³⁴ Hadid, Zeboim, Nebalat,

³⁵ Lod, Ono bo kon Ḷopá in Mogogimok mita.

³⁶ Tongonumai in paanan in intau Lewi inta munadon nogutun kon butá in Yohuda pinoki pogutunandon takin intau mita in Benyamin.