NAHUM 2 - Alkitab Singog In Mongondow Masa In Tanaa

Kinoḷabúan in Niniwe

¹ Ei Niniwe, Indongogaidon! Inta momoguyaat kon inimu noiangoidon! Ḷukadaidon in benteng mita poḷoḷukadan! Umuran tarap mako in daḷan! Posadiadon moparang. (

² Totuu, ki Tuhan in mopoguḻitbí bui in kogogaga in Israel, sinbá mobaḻí bui ná dungkuḷmai, kon tungkuḷ in diápa pinogagowan in musungnea mita.)

³ Kaḻeaw in musung nopura in batangannea, bo soragamnea in naonda bo dugú. Musung in nosadiadon modakop. Naonda bo tuḷú, uatoi in keretanea mopouḻi-uḻinag. Bayongan in kabaḷonea ḷumangka-ḷangkad.

⁴ Kon daḷan, kereta mita mayá diá in ḷambo-ḷamboinea. Kon lapangan, mosia in mogogaḷowan. Koontongan naonda bo poḷombow inta nodokot moḷoben, mogogaḷowan noḻikat totok naonda bo gotup.

⁵ Porwira mita inoiní kon muna; mosia in moipintud magí-mako kon dodai in monubu. Iḻimika-ḻikat in mosia in nopobayá ná dinding in kotá, pakakat pododumpak ḷagidon binaog.

⁶ Dimpot in ongkag mita nodaitdon binukatan, dá nodoḻiokdon in sinangkub in komaḻig!

⁷ Kinodomokandon in bokí, dayang-dayangnea mita in kumarak bo mogamui, mosia in mogamui naonda bo ḷagapan tarangkuku, bo morukimai kon dodob popisí in morobonoḷ in gina.

⁸ Rayat in Niniwe noḷagui noirangkap, naonda bo tubig inta iḻumuai nongkon tepel inta nobokat. Oyúon in karak, “Pogogai, pogogai!” táe diábí in moibog mobui mangoi.

⁹ Agowdon in bayongan in buḷawan bo saḷakanea! Kapunyaan kon kotá tanaa totuu mobarong!

¹⁰ Niniwe in norimumudon, moingongow bo noḷogat. Gina in noḻia-ḻiawdon sin moondok. Duḷud in moḻemédon bo mourot. Pogot in bayongan in intau nongobilaidon totok.

¹¹ Kon onda degá in kotá tatua in tanaa? Kotá inta ná angob ponondumunan in singa? Tampat popokaanan in ki adí mita in singa, tampat bobayáan in singa koḷakian bo kobaayan, tampat inta moaman kon i adínea mita?

¹² Dungkuḷmai kon tua singa in modomok kon onu in kaanonnea, bo iyabi sin ogoinea kon kobaayan bo kon i adínea. Bonuannea kopuḻingon in dumunnea in tapú mita in mahaḷuk inta dinomoknea bo inta ain iyabi-yabinea.

¹³ “Akuoi naa in musungmu,” guman i Tuhan Inta Totok in mokawasa. “Keretamu mita in tubáan-Ku komintan. Prajuritmu in matoi kon poparangan, bo gamáan-Kubí in bayongan yagi-yagi inta ain ginamámu nongkon intau ibanea. Onu in sinuntut mita in intau pinotabámu in diá bidon kodongogan.”