NAHUM 1 - Alkitab Singog In Mongondow Masa In Tanaa

¹ Naa in koyow i Allah soaḷ Niniwe. Koyow tatua in pinoniata pinongin oontongon inta inogoi kon i Nahum, tobatú nabi inta nongkon Elkos.

Torú i Tuhan kon Niniwe

² Ki Tuhan Allah in doíbí toḻinduaan, intau inta moḷawang kon i-Nia, notantúbí kon mokouḻí kon hukuman. Noidoyon kon torú inta moḷoben Sia in notuḻí kon aid monia.

³ Totuu kon ki Tuhan, in diábí ḷagi tumorú; táe Sia in totokbí doman in mokawasa dá ki ine in mogaid kon moitaḷá diábí poḷuaton-Nea kon hukuman. Kon onda in bayáan i Tuhan, kon tua in momuká in deḷang; kon pinomuntukan in sioḷ-Nea, kon tua in ḷobud mobaḻí goḷom.

⁴ Sia in nongguak kon dagat bo nobaḻí nogiot, bayongan in ongkag iningkagan-Nea komintan. Buḷud in Karmel bo rawang mita kon Basan nobaḻídon noḷogat bo kon Libanon noḷaḷowdon in bayongan bungang.

⁵ Buḷud mita mourot in kon tayowon-Nea; bo tombuḷudpa in notatomdon komintan. Aka ki Tuhan mamangoi, butá in moḷundan, dunia bo bayongan inta nogutun kon bonunea in mourot.

⁶ Ki ine in mokotongod aka ki Tuhan tumorú? Diábí in moipaḷuput nongkon torú-Nea! Sia in moponiata in torú-Nea inta modokot batu in morimumud bo mobaḻí ḷobud kon tayowon-Nea.

⁷ Ki Tuhan tua in mopia, Sia in moḷukad kon umat-Nea kon tungkuḷ in mosia mosusa, Sia in moḷukad kon intau inta mamangoi kon i-Nia.

⁸ Naonda bo ḷunud moḷoben inta mondangat, rimumudon-Nea in musung-Nea mita. Mosia inta mokobaḻí moḷawang kon i-Nia inandur-Nea in popatoi nodapot in noyopú.

⁹ Tomayá onuka in pomiaanmu moḷawang kon i Tuhan, notantúbí kon diá motuoi. Diábí in Sia motuḻí kon yaat in gina-Nea modapot in kodua noguntuḷ kon musung-Nea mita.

¹⁰ Iko in tubáanbí naonda bo wawa inta noingkag naonda bo bonganga inta moyo-moyoguntuḷ.

¹¹ Nongkon inimu, ei Niniwe, noiangoidon in intau tobatú inta nopuḻing in tomayá moraat. Sia in nogaid kon tomayá sin moḷawang kon i Tuhan.

¹² Dá guman i Tuhan kon Israel, umat-Nea, “Umpaka intau mita in Asyur tua moropot bo modamaḷ, táe mosia in rimumudonbí bo moinggamá. Ei bangusa-Ku, baḻíon-Ku in moiko mororiga, táe diá bidon aidan-Ku bui intua.

¹³ Tanaa in pogogaion-Kudon in kawasa in Asyur kon i monimu, bo botowon-Kudon in rante inta pinotogot kon i monimu.”

¹⁴ Naa in bontow in singog i Tuhan soaḷ bangusa in Asyur, “Mosia in kodaitandon in buí mongingguput kon bangusanea. Patong mita berhala inta kon bonu in kuil in dewanea, rimumudon-Kubí. Poḷoḷobongan kon bangusa in Asyur koyogot-Kudon sadiaan, sin mosia in diábí patus in mobiag!”

¹⁵ Indoiaika, in totabá tobatú mamangoi mongin buḷud mita, modia kon habar mopia, habar kountungan. Ei bangusa in Yohuda, ramedon in singgai moḷobenmu bo uboḻiaidon in dandimu kon i Allah. Butámu in diá bidon tonggataan in intau moraat. Mosia in irimumudon komintan.