MOHOHUTUBA 7 - Alkitab Singog In Mongondow Masa In Tanaa

Raian kon kobobiag

¹ Tangoibí mopia in mopia-pia in ḷana inta momahaḷ; bo singgaibí kopatoian in mopia-pia in singgai kinobaḻian.

² Maníka bo mayá in pinatoian bo dika in mayá in rame. Sin kita in mustibí tantú monanob kon popatoi in mogoḷatbí mako kon batúan in intau.

³ Robonoḷbí in dodob in mopia-pia in kosing. Umpaka molamurú mako, asaḷ bo gina in mosanang.

⁴ Intau bodok in tantú momatuk kon kasanangan; intau mopandoi in umuran morai kon popatoi.

⁵ Maníka bo sinoboḷow in intau inta mopia, bo dika in dinayow in intau bodok.

⁶ Kosing in intau bodok diá in mangaḻenea, naonda bo doradak in pinotubáan kon dugi.

⁷ Aka intau mopandoi bo monguboḷ, yo nobodokdon in aidnea; aka intau bo motarima kon sogó in pelekara, yo nogoguyaatdon in raiannea.

⁸ Mopia-piabí kon imbuit in pelekara tobatú in pangkoi in pelekara tatua; mopia-piabí kon mosabar bo dika in moiḻiu in yunggagá.

⁹ Dika baḷú tumorú totok; tongábí intau bodok in motagú kon gina.

¹⁰ Dikabí in moḻibó nanaa, “Nongonu sin dungkuḷmaibí in mopia-pia in masai in naa?” Tongábí intau dondunguḷ in moḻibó natua.

¹¹ Intau nobiag mustibí oyúon in hikmat; hikmat naa in notongkai in budel;

¹² notongkai doman in doit inta mobogoi in porasaan moaman. Apa doman totaau soaḷ hikmat! Ki ine in oyúon intua yo mosaḷamat.

¹³ Tondudutka in oaidan i Allah. Ki ine in mokotuḻid kon onu inta binelung i Allah?

¹⁴ Dá, kosanangdon aka iko bo nokouḻí kon inta sinayakmu. Táe aka iko bo kinoantugan in bodito, yo dika koḻiongan kon ki Allahbí in nobogoi doyowa tatua. Diábí kotaauan naton mongo onu in mobaḻí moiduduimai.

¹⁵ Kobiaganku in diábí in mangaḻenea, táe kon bonu in akuoi nobiag inontongku in naa: Moiḷanuimai in intau mopia moyopú, umpakabí in sia motoindudui. Moiḷanuimai doman in intau moraat moumur in kobiagannea, umpakabí in sia umuran mogaid kon dosa.

¹⁶ Dika moiḻiu in pia bo dika doman moiḻiu in pandoi. Onubí in mangaḻenea in simimpatoi?

¹⁷ Dika doman moiḻiu in raat andeka moiḻiu in bodok. Onubí in mangaḻe in matoi aka deemanpa wakutunea?

¹⁸ Pokoyayú kon doyowa inta koina. Aka kita motoguondok kon i Allah, yo notantú bidon kon kodapotan naton in onu inta sinayak.

¹⁹ Hikmat in mokodugang kon itoginea moropot moiḻiu kon pongawasa mopuḷú kon kotá tobatú.

²⁰ Kon dunia naa in diábí in intau diá in bogit; diábí in umuran mogaid kon inta mopia bo diá kon dodai in onda in noiḷaut noiaid kon dosa.

²¹ Dika moibog umuran mokidongog kon ouman diá totuu, sin dikabo iko in koyogotbí inodi-odian in bobantung tobatú.

²² Kinotaauanmubí doman kon intau ibanea in nokoimontanbí doman in inodi-odianmu.

²³ Tua komintan in sinungkuḷankudon in hikmatku. Táe aka aḷowanku in pandoi tatua, modugang moyayú in sia kon inakó.

²⁴ Ki ine in mokodungkuḷ kon mangaḻe in kobiagan naa? Moiḻiu in ako komangaḻean!

²⁵ Táe akuoi in tantúbí mobalajar bo motayak kon totaau, sinbá mokouḻí kon pandoi bo tubag in bayongan inta ḻibóon. Tungkuḷanku tomangaḻean kon dosa tua in kabodokanbí, bo aid moraat in ibogbí ná noiḷoḷongon.

²⁶ Nouḻíku kon naanta yo bobaybí in mopai-pait in popatoi. Ibog in bobay tua in naonda bo pukot bo poyogaḷap inta ain sinaan mako. Koyotnea in naonda bo kayu pinoumantungan. Intau inta dinumudui kon ibog i Allah in moiyayúbí kon poyogaḷapnea, táe intau baradosa in notantú bidon kon kodomokannea.

²⁷ Indoiai, guman i Intau Kohikmat: Tua komintan in nouḻíku, kon dodai in akuoi tantú motayak kon tontubag.

²⁸ Tantúpa doman in akuoi motayak kon tontubag mita ibanea, táe diádon nokouḻí. Kon sigad in intau toribu, nouḻíku in ḷoḷaki tobatú inta ihoromatku. Táe kon sigad monia diá in bobay inta motaau horomatonku.

²⁹ Tongábí naa in nouḻíku: Pinomia i Allah in kita diá noiḻiu bo biasabímai. Táe kitabí tontaní in mopororigamai bo mopoyagi-yagimai.