MOHOHUTUBA 6 - Alkitab Singog In Mongondow Masa In Tanaa

¹ Inontong doman kon inta diá moadil inta totok in mondorot kon intau kon dunia naa.

² Moiḷanuimai ogoian i Allah in kaoyúonan, kahoromatan bo kapunyaan kon intau tobatú, modapot in diádon in koibognea. Táe diá inogoian i Allah in wakutu in sia mopomaké in bayongan inta inogoi tatua. Tompobuinea, intau inta diá kinotaauan-Nea mopomaké in kaoyúonan tatua. Dá tua komintan diá in mangaḻenea bo mokonakit kon gina.

³ Umpaka intau tobatú kogadí kon adí mogatut bo moonggot in kinobiagannea nodapot in mogoguyang, táe aka sia bo diá mokorasa kon sanang in gina bo diá doman nokouḻí kon poḷobongan inta patus kon inia, dá podudui in raianku, adíbí mointok inta minatoi pinononggadí monag in mopia-pia in ukurnea nongkon intau tatua.

⁴ Sin kon adí mointok tatua in diá nobaḻí soaḷ pinononggadí in sia andeka diá; minayá in sia kon bonu in sindip, bo baḷúdon kinoḻiongan.

⁵ Diápa kon dodai in onda in sia in nokoontong kon sindar in mata in singgai, bo diápa doman komangaḻeannea onu in mangaḻe in kobiagan naa, dá umuḻidbí in sia takin pia-pia mako.

⁶ Bo tuabí in mopia-pia nongkon intau inta nobiag doyowa nogatut notaong, táe diá kon dodai in onda nosanang. Taya dua tua tumpaḷabí minayá in tampat inta notongkai!

⁷ Intau naa in mogaid tongábí bá oyúon in kaanon, táe diábí kon dodai in onda moorop in sia.

⁸ Dá onu in kauntungan in intau moarip aka poyotongkaionmai in intau nobodok? Onu doman in mangaḻenea intau nobogá bo mopia in kon sigad in intau mobarong?

⁹ Tua komintan in diábí in mangaḻenea naonda bo mogaḷow kon tompot. Maníka bo moorop in ibog naton kon onu inta oyúon kon i naton bo dika in tantú moibog sinbá modugang mooyúon.

¹⁰ Bayongan inta oyúon, koyongan bidon noonggot in oyúon. Kinotaauanbí naton kon intau in diábí mokobayow kon intau inta moropo-ropot nongkon inia.

¹¹ Koonggot-koonggot in pomayowannea, modugangdon diá in mangaḻe in tosingogonnea, nodapotbí in sia diá mokouḻí kon kauntungan onu bo onu.

¹² Naonda in kototaau in intau kon onu inta totok in mopia kon inia kon bonu in kobiagannea inta motoyong bo diá in baragunanea, bo inta moitaḻib naonda bo oḻinow? Naonda in komomangaḻe in intau kon onu in mobaḻí kon dunia naa naonda in sia diádon?