MOHOHUTUBA 5 - Alkitab Singog In Mongondow Masa In Tanaa

¹ Poraipa muna bo mosingog, bo dika ḻimika-ḻikat in modandi kon i Allah. Sia in kon soroga bo iko in kon butá, dá dika kobaro-barongon in mosingog.

² Mokakit in mohawatir, mokodugang kon tumogoindop kon inta diá mopia. Mokakit in mosingog, mokodugang doman kon tosingogon inta diá in mangaḻenea.

³ Dá, aka iko modandi kon i Allah, yo koḷamemet in mogintompod. Sia in doíbí kon intau inta mogaid kon inta diá moitutui. Tuamai, intompodai in dandimu.

⁴ Mopia-piabí kon diá modandi bo dika in modandi bo diá intompodan.

⁵ Mokopoingat sinbá tosingogonmu in diá mokopopisí kon inimu baradosaan, dá pakisadon in iko moguman kon i imang inta nogundoi kon i Tuhan, kon notoboḻingodon in iko nopoyaput in dandi. Onubí in mangaḻenea mokopomuká kon torú i Allah kon inimu modapot in rimumudon-Nea in bungai in siniḷopíanmu?

⁶ Ná doman togoindop inta mobayong diá in mangaḻenea, yo natua doman in mobayong in singog diá in mangaḻenea. Táe kotoguondokbí kon i Tuhan.

Mobiag tua in diábí in baragunanea

⁷ Dika moherang aka mokoontong kon pongawasa mondorot kon intau bogá, mogagow kon hak monia bo diá mopoaid kon inta moadil kon i monia. Batúan in pogawai ḷukadanbí in itoinea bo taya dua in iḷukadanbí in pojabat inta kon ḻimonikanmai monia.

⁸ Modapot in kobiagan i datu noitogotbí kon bungai in boyó.

⁹ Intau inta moibo-ibog in doit, diábí kon dodai in onda in mokorasa kon tugat in doitnea; intau inta motoboḷok, diábí mokoimontanmai in moorop in kauntungannea. Tua komintan in diábí in mangaḻenea.

¹⁰ Kodugang-kodugang in kaoyúonan in intau dá kodugang-kodugang doman in intau ibanea in musti pokaanonnea. Diábí in kauntungan kon i toginea, tongábí kinotaauannea kon sia in nooyúon.

¹¹ Intau mogogaid modapotbí doman in diá tugat in kaanonnea, táe mokosiugbí doman in sia modapot in moḷoḷot totok. Noyoḷuandon kon tua, intau inta nooyúon kapunyaannea mobayong totok, dá diá in sia mokosiug sin moḻia-ḻiaw in gina.

¹² Kon dunia naa inontongku oyúon in mokoajar kon gina: Oyúon in intau tobatú nosipun kon kapunyaannea sin pogoḷat kon malarat.

¹³ Táe kapunyaan tatua nobuḻi popisí in roriga, dá diábí in motaau ogoi kon i adínea mita.

¹⁴ Kita in pinononggadí diá nogiḷambung; natua doman in kita monaḷámai kon dunia naa, diábí modia kon onu bo onu nongkon bayongan inta siniḷopían naton.

¹⁵ Totuu mokorobonoḷ kon gina intua! Kita in mayá ná kon dodai in kita namangoi tanaa. Kita in simiḷopí in momatuk kon tompot, bo onu in mouḻí?

¹⁶ Kon dodai in mobiagpa, kita in mongokap kon sindip, mosusa in kita, moḻia-ḻiaw, moyaat bo monampot in gina.

¹⁷ Dá kinomangaḻeankudon kon inta totok in mopia kon i naton in mongaanbí, monginum bo mopomaké kon onu inta siniḷopían naton kon bonu in kobiagan inta mopoḷok inta inogoi i Allah kon i naton; tuata in ukur naton.

¹⁸ Aka intau tobatú motarima kon kaoyúonan bo kapunyaan nongkon i Allah, bo sia in inogoian in wakutu mopomaké in kaoyúonan tatua, mustibí in sia moibog mosukur bo mopomaké in bayongan inta siniḷopíannea. Tua in ki Allahbí doman in nobogoi.

¹⁹ Ki Allah in nongawasa kon gina in intau tatua pinongin ḷunganga in gina, dá diábí in sia moḻia-ḻiaw in gina in morai kon kobiagannea inta mopoḷok naa.