MOHOHUTUBA 4 - Alkitab Singog In Mongondow Masa In Tanaa

¹ Onda intua sinaridianku bui in bayongan aid diá moadil inta nobaḻí kon dunia naa. Intau mita inta iroriga nongombaḷ bo diá in moibog motuḷung, popisí in intau mita inta mopororiga tua in kokawasa moḷoben.

² Mointoi in akuoi in mokotorop kon intau mita inta ain noonggot in minatoi sin mosia in mosana-sanang nongkon intau mita inta nobiagpa.

³ Táe inta mosana-sanang totok in intaubí mita inta diápa pinononggadí, sin mosia in diápa nokoontong kon inta moraat inta inaidan kon dunia naa.

⁴ Kinotaauanku doman kon intau in totokbí in moḷongasi mogaid, tongá popisí in mointoi in mokoontong kon bungai in siniḷopían in topodiugnea. Tua komintan diá in mangaḻenea naonda bo moḷongasi modomok kon tompot.

⁵ Táe, tongábí intau bodok in ḻimitú mako mokoyot kon ḻima bo mopomayá mako matoi in gogoy.

⁶ Degá totuu intua, táe maníka bo moyakag in kapunyaan takin gina mosanang bo dika in simiḷopí totok in mopogaid in ḻima doyowa nosimpaḷ bo modomok kon tompot.

⁷ Oyúonpa doman in diá in mangaḻenea kon kobiagan naa.

⁸ Oyúon in intau nobiag sia-sia mita diá kogadí, andeka diá kogutat. Umpaka natua, sia in umuran simiḷopí bo ginanea diá kon dodai in onda moorop in ibog in kapunyaannea. Kon i inebí in inta siniḷopíannea bo doí kon kasanangan? Tua in diá doman in mangaḻenea, bo kobobiag inta mororiga.

⁹ Mopia-piabí kon doyowa dika in tongá bata-batangan. Aka mogaid in mosia, siniḷopíannea in mopia-pia.

¹⁰ Aka tobatú moḷabú dá ibanea in motuḷung kon inia. Táe aka intau tobatú moḷabú, bokaka tongá sia-sia mita, yo mobodito in sia, sin diá in motaau motuḷung kon inia.

¹¹ Kon doḷom inta motumping, intau doyowa inta nosiug noyodiug monginggamá kon tumping, táe aka tongá tobatú yo naonda in koinggamá in tumping?

¹² Intau doyowa inta moyotakin mayá motaaubí monayow kon mononubu, táe aka tongá totobatú yo mogampangbí in monaḷow. Toḷu nougat in tontogot inta iḷubid, mororigabí in bontowon.

^13-14 Intau nomasiking motaaubí in mobaḻí datu, bo intau inta pinonjara motaaubí momamping kon ḷoḻitúan in datu. Táe aka kon kogoguyangandon yo datu tatua in mobodokdon in motarima kon tonggina, dá siadon morori-roriga kon tayow mobiag inta nobogá táe mopandoi.

¹⁵ Iraiku in bayongan intau kon dunia naa, dá nosadardon in akuoi kon naanta kon sigad monia tua in notantúbí kon oyúon in tayowmobiag in momaḷui kon datu.

¹⁶ Rayat inta sinongganutannea diádon koiapan in kobayongnea, táe naonda in sia minayá, diábí in nopoyaput in sukur kon inia sin monorop kon onu inta pinomianea. Totuu, bayongan tua in diábí in mangaḻenea naonda bo modomok kon tompot.

Dika ḷagi modandi

¹⁷ Mokopoingat aka moibog mayá in Baḷoi Tuhan. Mopia-piabí kon mayá intua sin mobalajar dika in moposumba in kuruban, ná inta inaidan in intau mita inta pompuḷong. Mosia tua in diá motaau mopoyoposi kon onu inta noitutui bo onu inta noitaḷá.