MOHOHUTUBA 3 - Alkitab Singog In Mongondow Masa In Tanaa

Bayongan in yagi-yagi oyúon in wakutunea

¹ Bayongan in yagi-yagi kon dunia naa nobaḻí kon wakutu inta ain sinantú i Allah.

² Ki Allah in nonantú kon wakutu mononggadí bo wakutu matoi, wakutu momuḷa bo wakutu morabut kon inta pinomuḷa,

³ wakutu moḻimod bo wakutu mongundam, wakutu mongokai bo wakutu moposindog.

⁴ Ki Allah in nonantú kon wakutu mongombaḷ bo wakutu kumosing, wakutu mogamui bo wakutu motayok,

⁵ wakutu mosiug moyotakin, bo wakutu moyoguat kon tosiugan, wakutu monggakap bo wakutu monahang kon gina.

⁶ Ki Allah in nonantú kon wakutu mokodungkuḷ bo wakutu kobuḻian, wakutu motagú bo wakutu kinotaḷu-taḷuinea,

⁷ wakutu momerak bo wakutu modagum, wakutu kibio-biómai bo wakutu mosingog.

⁸ Ki Allah in nonantú kon wakutu motabi bo wakutu mondoí, wakutu moparang bo wakutu moyodame.

⁹ Onu in mangaḻe in siniḷopían naton?

¹⁰ Kinotaauanku kon ki Allah in nobogoi in oaidan inta mobogat kon inaton.

¹¹ Pinomianea in bayongan yagi-yagi mopia kon wakutunea. Inogoian-Nea in ibog in kita monotaau kon onu in mobaḻí kon singgai moiduduimai, táe diá mokosanggup in kita monotaau kon aid i Allah nongkon pinomangkoianmai modapot in imbuitnea.

¹² Kinotaauanku kon i naton in diábí in moiḻiu in pia koḻikudbí in moḷunganga in gina bo motarima kon onu in oyúon kinoouput in kinobiagan naton.

¹³ Mopia-piabí kon kita komintan mongaan bo monginum poḷat mokaan kon onu in siniḷopían naton. Tua in ki Allahbí in nobogoi.

¹⁴ Kinotaauanku kon bayongan inta inaidan i Allah in tantúbí mononoi. Intau in diábí motaau modugang andeka monggaat kon tua. Tua in inaidan i Allah sinbá kita in motoguondok kon i-Nia.

¹⁵ Inta tanaaya nobaḻí, in nobaḻídon koḻipod. Inta bain oyúon, noonggotdon in oyúon. Sinantúdon i Allah sinbá inta ain nokoimontan nobaḻí, in mobaḻí bui.

Aid diá moadil kon dunia

¹⁶ Oyúonpa doman in inontongku kon dunia naa: kon onda in musti oyúon in koadilan bo kopiaan, yo kon tua doman oyúon in aid moraat.

¹⁷ Iraiku, ki Allah in monisigbí kon intau inta mopia bo inta moraat, sin pomuḷoi in soaḷ bo pomuḷoi in aid inta mobaḻí kon wakutu inta ain sinantú i Allah.

¹⁸ Aka kon inakó yo nanaa: Ki Allah in monungkuḷ kon inaton sin mopoontong kon ukur naton naa in diábí noyoposi in ukur in mahaḷuk.

¹⁹ Naondaka, ukur in intau bo in mahaḷuk in notongkaibí. Inta tobatú in matoibí, natua doman in ibanea. Doyowa tua in tumpaḷabí mahaḷuk. Dá, intau in diábí mountu-untung nongkon mahaḷuk, sin kon inayadua tua kobiagan naa in diábí in mangaḻenea.

²⁰ Mosia in tumpaḷabí mayá in tampat inta notongkai. Mosia in nongkon ḷobudbí bo buibí mobaḻí ḷobud.

²¹ Diábí kinotaauan naton, mongo roho in intau in mamonik bo roho in mahaḷuk tumuot in butá.

²² Tuamai in kinotaauankudon kon diábí in mopia-pia kon intau koḻikudbí in momaké kon onu inta siniḷopíannea. Koḻikud intua diábí in motaau aidannea. Diábí doman inta kotaauannea mongo onu in mobaḻí naonda in sia matoi.