MOHOHUTUBA 12 - Alkitab Singog In Mongondow Masa In Tanaa

¹ Toropbí in ki Inta nomaḻí kon inimu kon tungkuḷ in iko nobagupa, kon dodai in diápa moiangoi in taong mita inta mopuḻing in roriga. Kon tungkuḷ intua iko in moguman, “Kobiaganku in diá mokosanang.”

² Aka tua in moiangoidon yo matamu in diá bidon mosilang, dá mokuyoyowdon in sindar in mata in singgai, buḷan bo tundi. Goḷom morondí in mododia kon uyan, umuranbí kotaki-takinmu naonda bo gogondok.

³ Kokaḷmu mourot bo diádon mokoḷukad. Sioḷmu inta motorindog in mourot diádon in ropot. Bagangmu in diádon motompod in pongokob kon kaanon. Matamu in moyambotdon dá mosindipdon in ontongon.

⁴ Rame kon doḷaag diá mosilang in kodongoganmu. Singog in musik bo pogiḻingan gogió bo diádon kodongogan. Diádon in iko mokosiug moḷoḷot. Tontuoḷ in ḷagapan mokopobangon domandon kon inimu.

⁵ Iko moondok in motakod kon tampat moḷantud bo musti umuran mokopoingat in mayá. Buokmu in ubanandon bo sioḷmu in moipape kon dodai in mayá. Dá mobuḻidon in bayongan gina bo ibog. Kita in mopobayá in tampat pogogutunan naton inta imbuitnea, intau mita mononogumatoi bo mogamui kinoouput in bayáan.

⁶ Rante saḷaka in mobontow bo moyo-moyotondi; togá buḷawan moḷabú bo moḷosi; tontogot in totayuk mobontow bo mogoguyaat; seré morimumud bo moirarit.

⁷ Awak naton in mobuidon, mobaḻí ḷobud kon butá. Tompot kobiagan naton in mobuidon kon i Allah. Sia in nobogoi noponotabi.

⁸ Gumanku, totuu kon tua komintan in diábí in mangaḻenea, komintan parasuma, diá in mangaḻenea.

Imbuit in tosingogon

⁹ Ki Inta Momomikir tua in moarip bo mobijaksana. Tuamai in sinundúnea kon umat in bayongan pongotahuannea. Mobayong in amsal in binalajarnea bodongka tungkuḷannea mongo totuu.

¹⁰ Sia in moḷongasi motayak kon tosingogon poḻipoi, bo tosingogon mita inta pinaisnea in mojujurbí.

¹¹ Tosingogon in intau moarip tua in naonda bo tungkud moruit in gombala tobatú, tungkud inta pinakénea poḷukad kon dombanea. Pinosipunan kon amsal bo tonggina, naonda bo pakú inta noikeket noropot. Tua komintan ki Allahbí doman in nobogoi, gombala naton totobatú tua.

¹² Adíku, kon soaḷ tanaa iko in mustibí mokopoingat. Pomaisan kon buk diábí in imbuitnea, bo moiḻiu in antó mobalajar mokoḷopí kon gina bo awak.

¹³ Naonda intua komintan irai-raikumai, naa in imbuit in tosingogon inta nouḻíku. Kotoguondok kon i Allah bo duduiai in bayongan parenta-Nea, sin tuabí in mangaḻe pinomaḻían-Nea kon intau.

¹⁴ Ki Allah in mongadilbí kon bayongan in oaid naton; inta mopia bo inta moraat, nodapot in inta noibuni doman.