MOHOHUTUBA 1 - Alkitab Singog In Mongondow Masa In Tanaa

¹ Singog mita kon bonu in buk tanaa in nongkon i Intau inta Mopandoi, ki adí ḷoḷaki i Daud, inta nomaḷui kon i Daud nobaḻí datu kon Yerusalem.

² Ki Inta Mopandoi tua in noguman: Bayongan yagi-yagi diá in mangaḻenea bo diá in baragunanea! Mobiag tua in parasumabí, komintanbí diá in mangaḻenea.

³ Kinoouputbí in kobiagan mogaid in kita, mononggouḷat. Táe onu in nouḻí inta mokosanang kon inaton?

⁴ Buí inta tobatú in mamangoi bo buí inta ibanea in moinggamá, táe dunia naa in umuranbí notongkai mako.

⁵ Mata in singgai umuranbí mako momuká bo umuranpa doman tumoyop. Takin ḷopí mobui in sia kon tampatnea dungkuḷ, bo momuká bui.

⁶ Tompot mogirup ná toḷatan, bodongka mogirup ná utuan; momurow magí-mako in sia bo bui mayá intua.

⁷ Bayongan in ongkag moiḻig kon dagat, táe dagat in diábí doman mopuḻi-puḻing. Tubignea in buibí doman mayá in uḷuan ongkag bo moiḻig bui.

⁸ Bayongan tua in mokobú bo diá bidon kosingogan in mokobú tatua. Mata naton in diábí kon dodai in onda in mobú in moindoi; bongoḷan naton in diábí doman mooro-orop in mokidongog.

⁹ Onu inta nokoimontan nobaḻí, mobaḻíbí bui. Onu inta nokoimontandon inaidan, aidanbí doman bui. Diábí in tobatúmai nobagu kon dunia naa.

¹⁰ Oyúon in noguman, “Indoiai, nobagu in naa!” Táe, tua in oyúon bidon kon tungkuḷ in diápa in kita.

¹¹ Intau in diá bidon mokotorop kon onu inta nobaḻí koḻipod. Natuabí doman inta nobaḻí tanaaya bo kon singgai moiduduimai, diá bidon toro-toropon in intau moiduduimai.

Inta kinobayáan i Intau kohikmat

¹² Akuoi, Intau kohikmat, nomarenta kon Yerusalem saḷaku datu kon Israel.

¹³ Akuoi in moniat monaridi bo mobalajar pinongin bijaksana in bayongan inta nobaḻí kon dunia naa. Ukur inta sinadia i Allah kon inaton totokbí in mokorobonoḷ kon gina.

¹⁴ Akuoi in nokoontongdon kon bayongan aid in intau kon dunia naa. Pirisayabí, bayongan tua diábí in mangaḻenea, naonda bo moḷongasi modomok kon tompot.

¹⁵ Inta nobelung diábí motaau tuḻidon, bo inta diá in diábí motaau iapon.

¹⁶ Iraiku, “Akuoi naa in nobaḻídon intau moḷoben bo moarip, noiḻiu kon arip kon bayongan intau inta nomarenta kon Yerusalem noiuna kon inakó. Akuoi in nosipun kon nobayong in totaau bo ilimu.”

¹⁷ Dá niatonkubí totaauon in yoposi in pandoi bo in bodok, kon sigad in kopandoian bo kabodokan. Táe noniata magí akuoi naa in naonda bo nodomok kon tompot.

¹⁸ Sin kodugang-kodugang in hikmat naton, kodugang-kodugang domandon in mokoondok kon inaton. Kodugang-kodugang in pongotahuan naton, kodugang-kodugang domandon in roriga naton.