MIKHA 7 - Alkitab Singog In Mongondow Masa In Tanaa

Dodia in Israel diádon mopia

¹ Mobodito in akuoi! Akuoi in nádon intau ginogoi inta minayá nosipú naonda in nopaḷut mako in sempo in pinosipúan. Diá bidon in bungai in ayop kon pangkoinea. Bungai in anggur bo bungai in ara inta mongopia nodaitdon komintan sinipú.

² Intau motuḻid diádon in kon butá, intau inta motoindudui kon i Allah diádon mouḻí. Batúan in intau komintandon mogoḷat kon kasampatan moḻimod. Kon batúannea motaan kon poyogaḷap kon tumpaḷa intau.

³ Komintandon mopandoi in mogaid kon inta moraat. Pojabat bo hakim moigum kon doit pompon in bibig, bo tongguḷu in intau mobayong in momakisadon kon koibognea, natuata in yopopog monia moyotakin.

⁴ Inta totok in mopia bo inta totok in motuḻid nongkon i monia naonda bo bonganga inta diá in mangaḻenea. Noidapotdon in wakutunea ki Allah in mohukum kon i umat-Nea ná inta ain pinotoingat-Nea kon i monia pinongin in nabi-Nea mita. Tanaa in nomukádon in kinotombaukan kon sigad monia.

⁵ Dikadon mopirisaya kon topodiugmumai, dikadon umandoḷ kon yobayat. Mokopoingatdon in mosingog umpakabí ki buḷoimu tontaní in mokodongog.

⁶ Sin, kon wakutu ná tanaa tombonu in motoḷuadí mosisaturuan: adí ḷoḷaki moningkuḻe kon i amánea, adí bobay monayow kon i inánea, bo mototaka bobay mobobayowan i guyánea.

⁷ Táe kita in mongamang mako kon i Tuhan; pinodoyon kon koyakinan moḻimbatú kita in mogoḷat mako kon i Allah naton. Sia in mokidongogbí kon sambayang naton bo moposaḷamat kon i naton.

Ki Tuhan in moposaḷamat

⁸ Diábí in kinodoyonan in musung mita naton in moḷunganga in gina sin kon kinorimumudan naton. Sin umpakabí noḷabú in kita, yo kita in bui mobangon. Tanaa kita in kon bonu in sindip, táe ki Tuhan in monimbayagbí kon i naton.

⁹ Kita in binaradosadon kon i Tuhan, tuamai in tanaa kita in mustibí motarima kon torú-Nea. Táe diá bidon moonggot Sia in moduḷu kon i naton bo mobogoi kon onu inta moadil kon i naton. Sia in modiabí kon i naton ḷumuai mamangoi in mobayag; korasaanbí naton tontaní kon Sia in moposaḷamat kon i naton.

¹⁰ Dungkuḷmai musung in moningkuḻe kon i naton takin mosingog, “Kon onda degá in ki Tuhan, Allahmu tatua?” Táe tanaa mosia in mokoontongbí kon onu in aidan i Tuhan kon i naton, bo mobaḻíbí mooyá in mosia. Kita in moindoibí kon musung mita naton tatua in taḷowon bo rita-ritakan mako naonda bo yoná kon daḷan.

¹¹ Ei Yerusalem! Wakutumudon bui moposindog in dinding mita in kotámu. Kon singgai tatua butámu in dugangandon in kooḷadnea.

¹² Intaumu mita in mobuibí mangoi kon inimu nongkon ondakabí – nongkon Asyur kon dotá in pomukaan, nongkon Mesir kon dotá in Toḷatan, nongkon butá kon Ongkag in Eprat, nongkon ḷoḷan in dagat bo nongkon buḷud mita inta moyayú.

¹³ Táe butá in moḷogatbí popisí in aid moraat in intaunea mita.

Sambayang mopoigum in totabi i Tuhan kon Israel

¹⁴ O Tuhan, ḷukadaidon in umat-Mu, umat inta piniḻí-Mu. Mosia in nogutun noitontaní kon kayuon mai-maí, kon yuak in butá inta mopia. Biódon mako in mosia mokouḻí kon kaanon kon rawang bonok in Basan bo kon Gilead ná dungkuḷmai.

¹⁵ Pomiadon in inta mokoherang kon inami, o Tuhan, ná inta pinomia-Mu dungkuḷmai kon dodai in Iko nodia kon inami iḻumuai nongkon Mesir.

¹⁶ Bangusa mita in mokoontongbí kon tua bo angoian in oyá sin kotaauandon monia kon bayongan in ropot monia diábí in mangaḻenea. Mosia in kobuḻianbí in akaḷ dá diádon mokosingog andeka mokodongog.

¹⁷ Mosia in kumuábí kon butá naonda bo uḷag. Takin ondok bo urot mosia in ḷumuaidon nongkon poḷoḷukadan monia, bodongka mamangoi kon ini-Mu, o Tuhan Allah nami.

¹⁸ Diábí in Allah ná Iko, o Tuhan, inta mongampung kon dosa in umat inta piniḻí-Mu inta ki agatneapa. Diábí modapot in mononoi tumorú in Iko; táe, mopiabí in gina-Mu in moponiata in tabi-Mu inta diá in obotnea tatua.

¹⁹ Iko in buibí angoian in tabi kon inami bo mongampung kon inami. Dosa mita nami in rita-ritakan-Mubí magí-mako bo pogambat-Mu kon apad in dagat!

²⁰ Kon umat-Mu, buí i Abraham bo i Yakub, poontong-Mubí in kososatia-Mu bo tabi-Mu inta diá in obotnea tua ná inta pinodandi-Mu kon mogoguyang nami dungkuḷmai.