MIKHA 6 - Alkitab Singog In Mongondow Masa In Tanaa

Tapud i Tuhan kon Israel

¹ Indongogaidon in tosingogon inta pinotaau i Tuhan kon Israel. Sindogdon, o Tuhan, potaaudon in onu mita inta ain inaidan in umat-Mu! Pomayádon mako bá dongogon in buḷud bo tombuḷud onu in poguman-Mu.

² Ei buḷud mita, ei apad mita in butá, indongogaidon in onu pinotaau i Tuhan! Oyúon in pelekara-Nea takin Israel umat-Nea bo tuntuton-Neabí in mosia.

³ Ki Tuhan in noguman, “Ei umat-Ku, onu in inaidan-Ku kon i monimu? Naonda degá in Akuoi noposusamai kon i monimu? Tubagaidon in Akuoi!

⁴ Moiko in dinia-Kudon iḻumuai nongkon Mesir, bo pinoḷuat-Kudon nongkon pinononggataan; Akuoi in nopotabádon kon i Musa, kon i Harun, bo kon i Miryam sin modia kon i monimu.

⁵ Umat-Ku, toropdon onu in sinomayá i Balak datu in Moab kon inimu, bo onu in sinubagan i Bileam ki adí i Beor kon inia. Toropdon onu in nobaḻí kon binayáan kon sigad in ḷoḷaigan kon Sitim bo kon Gilgal. Aka kotoropan monimu komintan intua, yo kotaauandon monimu onu inta ain inaidan-Ku sin moposaḷamat kon i monimu.”

Sosumba inta kinoibog i Tuhan

⁶ Onu degá in musti posumba naton kon i Tuhan, Allah kon soroga, aka mamangoi in kita moibada kon i-Nia? Musti degá in kita modia kon sapi batánea inta totok in moḷomumu sin posumba baḻíon kuruban payongon kon i-Nia?

⁷ Degá mopia in gina i Tuhan aka kita modia poangoi kon i-Nia in ribuan domba andeka mobayong totok in ḷana in zaitun? Musti degá posumba naton kon i-Nia in ki adí naton guya-guyang mobaḻí tontobut in dosa mita naton?

⁸ Diá! Ki Tuhan in noponiatadon kon i naton onu inta mopia. Igum-Nea kon i naton in tongábí mopoaid in inta moadil, umuran moponiata in totabian, bo takin ompá in gina mobiag motobatú takin i Allah naton.

⁹ Totuubí kon mobijaksana aka motoguondok kon i Tuhan. Sia in nomaḷú kon intau inta nogutun kon kotá, “Indongogaika, ei moiko inta noyosipun kon kotá!

¹⁰ Kon baḷoi in intau mita moraat oyúon in kapunyaan inta nouḻí noidoyon kon uboḷ. Mosia in nomaké in pogogukuran inta diá moitutui, aid inta kinodoí-Ku. Intau inta mogaid kon natua in hukumon-Ku.

¹¹ Yo umpaka dá ampungan-Ku in intau inta nopomaké in pononimbangan motombogá?

¹² Intau mita inta nooyúon kon kotámu in mondorot kon intau nobogá, bo moiko komintan in mongopopak.

¹³ Tanaa in pangkoion-Kudon sambokon bo rimumudon in moiko popisí in dosamu mita.

¹⁴ Moiko in mongaanbí, táe diábí mobaḻí mobotug – sedang bo umuranbí gogoyon. Moiko in mogakutbí kon pakakat mita, táe diá mokopotagú. Onukabí in tagúon monimu in rimumudon-Kubí kon bonu in parang.

¹⁵ Moiko in moponimboibí in gandum, táe diábí mokoyut kon bungainea. Moiko in mogaidbí kon ḷana nongkon bungai in zaitun, táe diábí mokopomaké kon ḷananea. Moiko in momugutbí kon anggur, táe diábí moiinum kon tua.

¹⁶ Tua komintan in mobaḻí popisí in moiko dinumudui kon aid moraat i Datu Omri bo i adínea, tuata in ki Datu Ahab. Moiko in dinumudui kon oaid monia. Tuamai in rimumudon-Ku in moiko, bo moiko in poempengon bo singkuḻeon in bayongan in bangusa.”