MIKHA 5 - Alkitab Singog In Mongondow Masa In Tanaa

Ki Allah nopodandi in mongongawasa tobatú nongkon Betlehem

¹ Ki Tuhan in noguman, “Ei Betlehem Eprata, iko in kotá tobatú inta nointok kon Yohuda! Táe nongkon inimu posindogon-Kubí mangoi in pongawasa kon Israel inta kinobaḻiannea in nongkon dungkuḷpabímai.”

² Dá, ki Tuhan in mopomayádon in umat-Nea kawasaan in musung mita monia modapot in bobay inta ain sinantú mobaḻí ki iná in mongongawasa tatua mopononggadídon kon i-Nia. Mopaḷut mako kon tua intau mita tongobangusanea inta kon pinoḷumbúan in potobatúondon bui in bangusa monia.

³ Aka pongawasa tatua mamangoi, Sia in momarentabí kon umat-Nea podoyon kon ropot bo kawasa nongkon i Tuhan Allahnea tontaní. Umat-Nea in mobiagbí moodom, popisí in bayongan in intau kon dunia naa in mongakubí kon kawasa-Nea,

^4-5 bo Sia in mobogoi in kobiagan modame. Aka tontara in Asyur monubu kon butá naton bo mondangat kon poḷoḷukadan naton, yo itoi mita naton inta moropot totok in potabádon momarang kon i monia. Itoi mita naton tatua in monaḷowdon kon Asyur podoyon kon ropot in pakakat in parang, bo moposaḷamat kon i naton nongkon kawasa monia.

Popoḷuatan bo pohukuman

⁶ Intau in Israel inta ki agatneapa in mobaḻídon naonda bo oḷú moonow nongkon i Tuhan kon mobayong in bangusa, bo naonda bo uyan nomonag kon pinomuḷa. Mosia in umandoḷbí kon i Allah, bo deeman kon intau.

⁷ Intau in Israel inta nogutunpa kon yua-yuak in bangusa mita in mobaḻídon naonda bo singa kon yua-yuak in mahaḷuk mita kon kayuon andeka kon yuak in paanan in domba kon rawang in bonok. Singa tatua in tumuot kon yua-yuak in paanan in domba tatua bo moritak poḷat momera-merak; diábí in mokopomuḻi kon domba mita tatua.

⁸ Israel in monaḷowbí kon musungnea mita poḷat morimumud kon i monia komintan.

⁹ Ki Tuhan in noguman, “Kon tungkuḷ intua Akuoi in monginggamádon kon bayongan in kabaḷomu, bo moyompat kon bayongan in kereta mita in parangmu.

¹⁰ Kotá mita inta oyúon in poḷoḷukadan kon butámu in rimumudon-Ku, bo bayongan in dindingmu umpagon-Ku.

¹¹ Ajimatmu mita inggamáan-Kudon bo bayongan in mononoḻindapmu posíon-Ku.

¹² Rimumudon-Kubí in patongmu mita bo tugu mita karamatmu; moiko in diá bidon bui mosumba kon pakakat mita inta inaidan in ḻimamu tontaní.

¹³ Tugu mita i Dewi Asyera kon butámu in umpagon-Ku, bo kotámu mita inta oyúon in poḷoḷukadan in rimumudon-Ku.

¹⁴ Kon bonu in torú-Ku inta sinumagab tuḻían-Ku in aid moraat in bayongan in bangusa inta diá motoindudui kon i-Nakó.”