MIKHA 4 - Alkitab Singog In Mongondow Masa In Tanaa

Ki Tuhan in momarenta kon dunia takin dame

¹ Kon singgai mita moiduduimai tombuḷud, tampat in Baḷoi Tuhan, in moisindogbí motorindog moipagor moḷantud moiḻiu kon buḷud mita bo tombuḷud mita. Bayongan in bangusa diá moobo-obot in mayá intua

² mosia komintan in mogumanbí, “Igai in kita motakod kon tombuḷud i Tuhan mayá in Baḷoi i Allah in Israel! Sia in motundúbí kon i naton onu in musti pomiaan naton. Kita in dumuduibí kon daḷan-Nea sin totundú i Tuhan in mamangoibí nongkon Yerusalem; nongkon Sion Sia in mosingog kon umat-Nea.”

³ Ki Tuhan in monantúdon kon pelekara kon sigad in bangusa mita, kon sigad in negara mita inta moropot, inta moyayú andeka modiug. Mosia in monontaḷ bidon kon kedang mita monia baḻíon pajeko bo pandong mita monia baḻíon tosilad pororatab. Bangusa mita in diá bidon mositubuan, diábí domandon mosadia moparang.

⁴ Pomuḷoi in intau in mobiag bidon moaman bo motomoman kon yuak in gobá in anggur bo gobá in aranea; diá bidon in mopogogondokmai kon inia, tuata in dandi i Tuhan Inta Totok in mokawasa.

⁵ Bayongan in bangusa kon dunia naa in mosumba bo motoindudui kon dewanea tontaní. Táe kita in motoinduduibí kon i Tuhan Allah naton bo mosumba kon i-Nia modapot in mononoi.

Israel in mobuidon nongkon pinoḷumbúan

⁶ Ki Tuhan in noguman, “Moiangoibí in wakutunea Akuoi mosipun kon intau mita inta ihukum-Ku, mosia tuata inta nororiga kon pinoḷumbúan.

⁷ Mosia in pinotungkudon bo noyayúdon nongkon ḻipúnea tontaní. Táe, nongkon intau mita inta kiagatnea tatua baḻíon-Kudon in buí inta mobagu. Mosia in mobaḻídon bangusa inta moḷoben bo moropot. Akuoi in momarentabí kon i monia kon Tombuḷud in Sion modapot in mononoi.”

⁸ Bo iko Yerusalem, tampat pinoḷukadan i Allah kon umat-Nea naonda bo gombala noḷukad kon paanan in dombanea, iko in buibí mobaḻí ki iná in kotá in dodatuanmu ná dungkuḷmai.

⁹ Nongonu sin iko in mongombaḷbí totok in moropot? Nongonu sin iko in mororigabí naonda bo bobay inta mononggadí? Eta degá popisí in iko diádon in datu, bo mononongginamu aindon minatoi?

¹⁰ Ei intau mita in Yerusalem, pomaḻikotadon bo karakdon naonda bo bobay inta mononggadí! Sin, tanaa moiko in mustibí monaḷámai kon kotá bo mogutun kon rawang. Moiko in mustibí mayá in Babel, táe kon tua poḷuatonbí i Tuhan in moiko nongkon musungmu mita.

¹¹ Nobayong in bangusa in nosipundon sin monubu kon inimu, ei Yerusalem! Mosia in noguman, “Yerusalem in mustibí rimumudon! Kami in mokoontongbí kon kotá tatua in mobaḻídon apug!”

¹² Táe bangusa mita tatua in diábí nonotaau kon onu inta sinomayá i Tuhan. Diábí kinotaauan monia kon mosia tua in sinipun-Neadon sin hukumon, notongkai in gandum sinipun sin ḻintogon.

¹³ Ki Tuhan in noguman, “Ei intau in Yerusalem, bayádon bo ritakaidon in musungmu mita! Baḻíon-Kubí moropot in moiko naonda bo sapi inta tungoinea uatoi bo konukunea in bitú. Moiko in morimumudbí kon mobayong in bangusa, bo kaoyúonan inta nouḻí monia kon pinogagowan in posumbabí monimu kon i-Nakó, ki Tuhan in dunia naa.”

¹⁴ Ei intau in Yerusalem, totokdon in poigum sinbá ki Tuhan in motuḷung kon inimu! Kita in kinopungdon! Musung in koyogotdon monubu kon itoi in Israel!