MIKHA 2 - Alkitab Singog In Mongondow Masa In Tanaa

Ukur in intau mita inta mondorot kon intau bogá

¹ Moboditodon in intau mita inta monomayá kon inta moraat kon dodai in mosiug mako kon tosiugan kon tungkuḷ in doḷom, bo mogaid kon tua kon dodai in doḷo-doḷom popisí in oyúon in ropot monia mogaid kon tua.

² Aka mosia moibog in gobá, yo agowon monia. Aka moibog in mosia in baḷoi tobatú, yo tuoton monia. Pinomayá kapunyaan andeka motoḷuadí, diábí in moaman.

³ Manangka intua ki Tuhan in noguman, “Akuoi in nonomayádon kon mokobodito poḷabú kon i monimu, dá moiko in diábí moipaḷuput. Kon tungkuḷ nahat tatua moiko in diábí mokobayá takin ḷumoḷatúpa bui.

⁴ Ukurmu in pakéondon in intau mobaḻí posigidan, bo mosia in momiadon kon dondong ponogumatoian nanaa, ‘Ki Tuhan in norimumudon kon butá nami tanaa bo mobogoi kon i monia inta nodakop kon inami. Kami in norimumudon komintan.’ ”

⁵ Tuamai, aka moiangoidon in wakutunea butá tatua pobuiondon kon i umat i Tuhan, diábí tobatúmai nongkon i monimu in motarima kon tonsilainea.

⁶ Intau mita in mohutuba kon i nakó, kainia, “Dika mohutuba kon i nami. Dika mohutuba kon soaḷ mita tatua. Kami in diábí angoian in oyá.

⁷ Dika morai kon umat in Israel in kinutukdon i Tuhan! Ki Tuhan in diábí mogaid kon natua mita. Sia in diábí mokoimontanmai in koinggamáan in sabar-Nea. Sia in mosingogbí takin pia-pia mako kon intau mita inta mogaid kon inta moitutui?”

⁸ Ki Tuhan in notubag, “Moikobí inta monubu kon umat-Ku naonda bo musung. Intau in mobui nongkon pinoparangan takin kamang mokorasa kon moaman kon baḷoinea, bokaka kon tua moiko in modapotbí in mogoḷat mako sin mogagow kon baḷoinea.

⁹ Bobay mita kon sigad in umat-Ku pinoguntun monimu nongkon baḷoi inta kinotabinea, bo umuran agowon monimu in barakat inta inogoi-Ku kon i adí mita monia.

¹⁰ Sindogdon bo bayá; kon naa in diádon moaman. Dosamu mita in nokopoangoidon kon anib inta mokokoningkim kon tudu in tampat tanaa.

¹¹ Koibog monimu in nabi inta moibog monguboḷ bo mongakaḷ poḷat monoḷanow kon moiko in mokouḻíbí kon anggur bo oinumon inta mokoḷoḷangu inta mobayong totok.”

Dandi soaḷ kasaḷamatan

¹² Ki Tuhan in noguman bui, “Ei umat in Israel inta ki agatneapa! Moiko in notantúbí kon sipunon-Ku bo tobatúon naonda bo domba inta mobui mangoi kon ḷantungnea. Naonda bo rawang in bonok inta nopuḻing in domba, natua doman in butámu in mopuḻingdon bui in intau mobayong.

¹³ Bukáan-Kubí in daḷan bo modia kon i monimu ḷumuai nongkon pinoḷumbúan. Moiko in mondangatbí kon bonawang mita bo mayá takin diá in ḷambo-ḷamboinea. Akuoi, ki Tuhan tontaní, in Datumu, bo Akuoi in modia kon i monimu ḷumuai.”