MAZMUR 99 - Alkitab Singog In Mongondow Masa In TanaaKi Allah, Datu inta moḷantud 1 Ki Tuhan in Datu; bangusa mita in mourotbí. Sia in nomarenta kon tudu in kerub, butá in nodandú. 2 Ki Tuhan in totok in nongawasa kon Sion; Sia in moḷantud nonigad kon bayongan in bangusa. 3 Biódon mako in mosia modayow kon tangoi-Nea inta moḷoben bo momulia. Mokudusbí in Sia! 4 Kawasa in kon ini-Mu, datu inta motabi kon hukum; Iko in noposindogdon in inta mobanar; Iko in nopobayá in hukum bo kooadil kon Israel. 5 Poḷantudon in ki Tuhan Allah naton, dokódon kon tayowon in pomomarentaan-Nea. Mokudusbí in Sia! 6 Ki Musa bo ki Harun noitakin doman in imang-Nea mita, ki Samuel in intau tobatú inta nosambayang kon i-Nia. Mosia in nokuani kon i Tuhan, bo sinubagan-Nea. 7 Nongkon oigi goḷom nosingog in Sia kon i monia, mosia in notoḷutui kon bayongan in hukum bo parenta-Nea. 8 O Tuhan Allah nami, Iko in notubag kon umat-Mu; aka kon i monia yo Iko in ki Allah inta moibog mongampung, umpaka mosia ihukum-Mu popisí in taḷá monia. 9 Poḷantudon in ki Tuhan Allah naton, bo sumbadon in Sia kon buḷud-Nea inta motusi, sin mokudusbí in ki Tuhan Allah naton. |
Alkitab Singog In Mongondow Masa In Tanaa © Indonesian Bible Society, 2016.
Indonesian Bible Society