MAZMUR 98 - Alkitab Singog In Mongondow Masa In Tanaa

Ki Allah mongongawasa in dunia

¹ Mazmur. Podondongdon in dondong mobagu kon i Tuhan, sin aid-Nea mita inta mokotongaw! Pinongin kawasa bo ropot-Nea tontaní Sia in nokountungdon.

² Ki Tuhan in nopotaau in kinountungan-Nea; Sia in noponiata kon kooadil-Nea kon bangusa mita.

³ Kinotoropan-Nea in tabi bo kososatia-Nea kon Israel, umat-Nea. Bayongan in bangusa kon sinangkub in butá ain nokoontong kon kinountungan i Allah naton.

⁴ Poronggiowdon kon i Tuhan, ei sinangkub in butá! Dayowdon in ki Tuhan pongin dondong bo giow pia in gina.

⁵ Podondongdon in dodayow kon i Tuhan, takin mokuti kon kecapi.

⁶ Irupdon in torompet bo sangkakala, porogiowdon kon i Tuhan, Datu naton.

⁷ Ponggonuaḷdon ei dagat bo bayongan in tombonunea butá bo bayongan inta nogutun kon bonunea.

⁸ Biódon mako in ongkag mita monggoḷokap, bo tombuḷud mita moronggiow kon tayowon i Tuhan.

⁹ Sin Sia in mamangoi sin mohakim kon dunia; bangusa mita in hakimon-Neabí podoyon kon inta moadil bo mobanar.