MAZMUR 97 - Alkitab Singog In Mongondow Masa In Tanaa

Ki Allah, mongongawasa inta moḷantud

¹ Ki Tuhan in Datu! Biódon mako in butá mokoposanang, bo ḻibuton mita in moḷunganga.

² Sia in iḻipung in goḷom bo sindip; kooadil bo hukum in nobaḻí dodoyonan in pomarentaan-Nea.

³ Tuḷú in iḷumekep kon tayowon-Nea, nomokak kon musung kon ḻibu-Neamai.

⁴ Kilat-Nea in nonimbayag kon dunia, butá nogugur in nokoontong kon i-Nia.

⁵ Buḷud mita in iḷumoḷayat naonda bo lilin kon tayowon i Tuhan, kon tayowon i Tuhan, mongongawasa in sinangkub in butá.

⁶ Ḷangit in mopotaau in kooadil-Nea, bo bayongan in bangusa nokoontong kon kamuliaan-Nea.

⁷ Bayongan in intau inta mosumba kon berhala in pokopooyáanbímai, inta nopoyunggaga kon pakakat mita inta diá in mangaḻenea; bayongan in dewa in dumokóbí kon tayowon i Tuhan.

⁸ Intau mita inta nogutun kon Sion bo kon kotá mita in Yohuda in nosanang naonda in nokodongog kon onu inta sinantú i Tuhan.

⁹ Sin Iko, o Tuhan, mongongawasa in sinangkub in butá; Iko in moḷantud noiḻiu kon bayongan in dewa.

¹⁰ Ei moiko inta moibog kon i Tuhan, kodoídon in inta moraat! Sin ki Tuhan in noḷukad kon kobiagan in umat-Nea, Sia in nopoḷuat kon i monia nongkon kawasa in intau inta diá mopirisaya.

¹¹ Bayag ain nomuká kon intau inta motuḻid in gina, bo ḷunganga in gina kon intau inta mojujur.

¹² Pokosanangdon, ei intau mita inta motuḻid in gina popisí in onu inta ain inaidan i Tuhan, bo posukurdon kon i Allah inta motusi.