MAZMUR 96 - Alkitab Singog In Mongondow Masa In TanaaKi Allah, Datu inta moḷantud ( Taw.1. 16:23-33 ) 1 Podondongdon in dondong mobagu kon i Tuhan! Podondongdon kon i Tuhan, ei sinangkub in dunia! 2 Podondongdon kon i Tuhan bo dayowdon in Sia; pomuḷoi in singgai potaa-taaudon mako in habar mokosanang kon Sia in noposaḷamatdon kon inaton. 3 Oumandon in koḷoḷantud-Nea kon bangusa mita, bo aid-Nea mita inta motoyang kon umat intau. 4 Sin Moḷobenbí in ki Tuhan, bo totokbí in dinayow, mustibí koondok moiḻiu kon bayongan in dewa. 5 Dewa mita in bangusa ibanea in tongábí patong berhala, táe ki Tuhan in nomaḻí kon baḷangon. 6 Sia in iḻibubí in koagungan bo kamuliaan, Baḷoi-Nea in nopuḻingbí in kawasa bo kogogaga. 7 Dayowdon in ki Tuhan, ei umat intau, dayowdon in koḷoḷantud bo kororopot-Nea! 8 Dayow in tangoi-Nea inta moḷantud, bo diádon in kuruban kon bonu in Baḷoi-Nea. 9 Sumbadon in ki Tuhan takin mogiḷambung in ḷambung ibada! Kourotdon kon tayowon-Nea, ei bayongan in dunia! 10 Potaa-taaudon mako kon bangusa mita, “Ki Tuhan tua in Datu! Butá morigon diábí kodandúan; Sia in mohakimbí kon bangusa mita takin moadil.” 11 Koḷungangadon, ei ḷangit bo butá! Ponggonuaḷdon ei dagat bo bayongan in tombonunea! 12 Pokosanangdon, ei rawang bo bayongan in pinomuḷanea! Pangkoi mita in kayu kon kayuon in morogiowbí. 13 Sin ki Tuhan in mamangoi momarenta kon butá, Sia in mohakimbí kon bangusa mita takin moadil bo mojujur. |
Alkitab Singog In Mongondow Masa In Tanaa © Indonesian Bible Society, 2016.
Indonesian Bible Society