MAZMUR 95 - Alkitab Singog In Mongondow Masa In Tanaa

Dondong dodayow

¹ Koḻigai in kita modondong kon i Tuhan, moronggiow kon i Mopoposaḷamat naton!

² Koḻigai in kita mayá in tayowon-Nea takin dondong sukur, moronggiow kon i-Nia takin dondong dodayow.

³ Sin ki Tuhan in ki Allah inta moḷantud, Datu inta motorindog inta nonigad kon bayongan in dewa.

⁴ Sia in nongawasa nodapot kon bayongan in inta moonag kon butá, nodapot in tudu mita in buḷud Siabí in kitogi.

⁵ Sia in nongawasa kon dagat, sin Sia in nomia kon tua, toba doman Siabí in kitogi mia.

⁶ Koḻigai in kita dumokó mosumba kon i-Nia, tumungkud kon tayowon i Tuhan, inta nomaḻí kon inaton.

⁷ Sin Siabí in ki Allah naton, kita naa in umat inta biniag-Nea, naonda bo domba gombalaan-Nea. Singgai in naa indongogaidon in singog-Nea:

⁸ “Dika tumontogat naonda bo mogoguyangmu kon Meriba, naonda kon tungkuḷ in mosia kon Masa, kon padang gurun.

⁹ Kon tua mosia in nonungkuḷ kon i-Nakó, umpaka ain nokoontong kon onu in inaidan-Ku.

¹⁰ Opat nopuḷú notaong in koonggotnea mobú in Akuoi kon i monia; guman-Ku: Totuu, bangusa tatua in diá motoḷutui! Mosia in diá nopandungmai kon parenta-Ku mita.

¹¹ Dá Akuoi in nongibot kon bonu in torú-Ku, mosia in diábí tumuot kon butá tatua bo mokouḻí kon pogogaian takin-Ku.”