MAZMUR 94 - Alkitab Singog In Mongondow Masa In Tanaa

Ki Allah in mohakimbí kon bayongan in intau

¹ O Allah, Ikobí in ki Allah inta motuḻí, poontongdon in tontuḻí-Mu, o Tuhan.

² Sindogdon, o Hakim in sinangkub in dunia, hukumdon in intau mododia podudui in aid monia.

³ O Tuhan, dapotpa in toonu in intau moraat moḷunganga in gina? Modapot in toonu kaasí o Tuhan?

⁴ Mosia in mopoyaput in tosingogon mita inta diá mopia, bo mopoḷoḷatú in aid monia moraat.

⁵ Mosia in mondorot kon umat-Mu, o Tuhan, bo nomutuk kon intau mita inta piniḻí-Mu.

⁶ Mosia in noḻimod kon boba-bobay bo uno-unon bo intau ango-angoi inta nogutun kon butá tanaa.

⁷ Guman monia, “Ki Tuhan in diábí nokoontong kon tua, ki Allah i Yakub in diábí nonaridimai kon tua.”

⁸ Ei bangusaku, dikabí námai tua in kobobodok, balajar paké in akaḷmu!

⁹ Ki Allah in nomia kon bongoḷan, umpaka yo diá in Sia mokodongog? Sia in nomia kon mata, yo umpaka diá in Sia mokoontong?

¹⁰ Sia in notundú kon bangusa mita, yo umpaka yo diá in Sia mohukum? Sia in nobaḻí guru kon bayongan in intau, yo umpaka yo diá in Sia kototaau?

¹¹ Ki Tuhan in mokodoḷopbí kon raian in intau, Kinotaauan-Nea kon bayongan intua diábí in mangaḻenea.

¹² Pia in kamang in intau inta sinundú-Mu, o Tuhan, intau inta sinundúan-Mu in hukum-Mu mita.

¹³ Pinoodom-Mu in sia kon singgai mita in bodito, nodapot in kinaḻi in bubú sin podomokan kon intau moraat.

¹⁴ Sin ki Tuhan in diábí monaḷámai kon umat-Nea; Sia in diábí moḻiong kon kapunyaan-Nea.

¹⁵ Dá hukum in posindogonbí bui kon ponisigan, bayongan in intau motuḻid in moibogbí in natua.

¹⁶ Ki ine in moduḷu kon inakó nongkon intau inta diá mopirisaya? Ki ine in dumotá kon inakó monayow kon intau inta nogaid kon inta moraat?

¹⁷ Aka kuma bo ki Tuhan in diá motuḷung kon inakó, yo gogióbí moibonu in akuoi kon dunia in intau minatoi.

¹⁸ Kon tungkuḷ in akuoi norai kon moḷabú in akuoi, tabi-Mu, Tuhan, nokoporoton kon tosindogku.

¹⁹ Aka ginaku moondok bo moyayow, Iko in moḻipoi bo moposanang in ginaku.

²⁰ Iko in diábí noyopopog in hakim mita inta moraat, inta nonombaḷoi kon inta moraat podudui in hukum.

²¹ Mosia in noyopopog monayow kon intau motuḻid, bo mopoḷabú in hukuman matoi kon intau inta diá kotaḷá.

²² Táe ki Tuhan in mododuḷuku. Ki Allahku in nobaḻí mogogoḻingoiku.

²³ Sia in mohukum kon intau moraat podudui in aidnea inta moraat, bo nomompon kon bibig monia popisí in dosanea. Ki Tuhan Allah naton in momomponbí kon i monia.