MAZMUR 93 - Alkitab Singog In Mongondow Masa In Tanaa

Ki Tuhan , Datu inta mononoi

¹ Ki Tuhan in Datu; Sia in nogiḷambung in kamuliaan bo ropot. Dunia in sinimindog notorindog diábí modandú.

² Pomomarentaan-Mu in noroton nongkon pinomangkoianmai, nongkon kinononoian oyúon in Iko.

³ Apad in baḷangon nopodongogdon in singognea, o Tuhan, baḷangon in modugangdon kon singog in gonuaḷnea.

⁴ Táe ki Tuhan inta nongawasa kon soroga, in motoya-toyang kon gonuaḷ in tubig kon baḷangon, moropo-ropot nongkon torú in bokoḷ.

⁵ Tuhan, hukum-Mu in mononoi, Baḷoi-Mu in motusi kinoouput in dunia.