MAZMUR 92 - Alkitab Singog In Mongondow Masa In Tanaa

Dondong dodayow

¹ Dondong kon singgai in Sabat.

² Totuubí kon mopia in mopoyaput in sukur kon ini-Mu, o Tuhan, bo modayow kon ini-Mu, Allah Inta Totok in moḷantud;

³ Mopotaa-taau mako in tabi-Mu kon dodai in doḷo-doḷom, bo kososatia-Mu kon dodai in doḷom,

⁴ sindaḷan mokuti kon gitar mopuḷú in tali, takinan in gambus bo kecapi.

⁵ Sin aid-Mu in mokoḷunganga totok kon ginaku, akuoi i modondong takin pia in gina popisí in inta pinomia-Mu.

⁶ Totuu moḷoben in bayongan inta inaidan-Mu, o Tuhan, totuu moako in raian-Mu mita!

⁷ Intau bodok in diábí mokodoḷop, intau dondunguḷ in diábí mokotaau kon tua.

⁸ Aka intau diá mopirisaya mobiag moḷumbá naonda bo bonok, bo intau moraat modugang mooyúon bo mobiag moromon; táe mosia in yopúonbí komintan,

⁹ sin Iko, Tuhan, in mongawasa modapot in mononoi.

¹⁰ Kinotaauan nami in musung-Mu in yompatonbí, o Tuhan, bayongan in intau moraat in poraritonbí.

¹¹ Binaḻí-Mu in akuoi noropot naonda bo bantong ḻindong, bo nomarakat kon inakó in kobiagan motompia.

¹² Akuoi in nokoontong kon kinotaḷowan in musung mita, intau mita inta ain sinimindog nonayow kon inakó, tomayá mita monia inta moraat in dinongogkudon.

¹³ Intau motuḻid in monubu naonda bo pangkoi in kurma, bo mobiag moḷumbá naonda bo pangkoi in ḷokuyú in Libanon.

¹⁴ Mosia in naonda bo pangkoi in kayu inta pinomuḷa kon Baḷoi Tuhan, bo mobui kon Baḷoi Allah naton,

¹⁵ pangkoi in kayu inta tantúpa nomungai umpaka nogurangdon, umuran noḷunow bo notompia.

¹⁶ Tuata in noponiata kon ki Tuhan in moadil; Sia in mododuḷuku, diábí in tombogá kon i-Nia.