MAZMUR 91 - Alkitab Singog In Mongondow Masa In Tanaa

Iḷukadan i Allah

¹ Intau inta nokiḷukad kon i Inta Totok in Moḷantud, bo inta nogutun kon bonu in oḻiung i Inta Totok in Mokawasa,

² in motaaubí in moguman kon i Tuhan, “Ikobí in mododuḷu bo mogogoḻingoiku, Allahku, Ikobí in pirisayaanku.”

³ Sia in mopoḷuatbí kon inimu nongkon anib inta noiadop, bo nongkon takit inta mokopatoi.

⁴ Iko in koḷoban-Neabí in koḻikip-Nea, dá moodombí in iko kon bonu in oḻiung-Nea; kososatia-Nea in naonda bo kaḻeaw inta noḷukad kon inimu.

⁵ Iko in dika moondok kon anib kon dodai in doḷom, andeka daḻí tubuon kon dodai in singgai;

⁶ kon bodito inta namangoi nongkon sindip, andeka korimumudan inta moidantug kon tungkuḷ in moutu in singgai.

⁷ Umpaka toribu in intau matoi kon símumai bo mopuḷú noribu in kon dotá in koḷananmu, táe iko tontaní in diábí tompaḻían.

⁸ Aka iko mobobui magí-mako kon ḻibumumai, yo koontonganmubí in intau moraat kotugatan in tontuḻínea.

⁹ Sin ki Tuhan in binaḻímu mododuḷumu, ki Inta Totok in moḷantud binaḻímu mogogoḻingoimu.

¹⁰ Dá iko in diábí kotugatan in bodito, baḷoimu in diábí kotugatan in anib.

¹¹ Ki Allah in mopotabábí in malaekat-Nea moḷukad kon inimu, sin mogoḻingoi kon inimu kon ondakabí in bayáanmu.

¹² Tamadonbí monia in iko, sinbá sioḷmu in diá moidatong kon batu.

¹³ Ḷampanganmubí in uḷag bo singa, moritak kon singa batánea bo uḷag mobisa.

¹⁴ Guman i Tuhan, “Intau inta moibog kon i-Nakó in posaḷamaton-Kubí, inta mopirisaya kon i-Nakó in ḷukadan-Kubí.

¹⁵ Aka sia bo mokuani kon i-Nakó, Tubagan-Kubí. Kon tungkuḷ in koantugan in susa, tuḷungan-Kubí in sia; sia in popaḷuputon-Kubí bo ogoian-Ku in kahoromatan.

¹⁶ Sia in pooropon-Kubí in umur moḷanggó, bo posaḷamaton-Ku.”