MAZMUR 90 - Alkitab Singog In Mongondow Masa In Tanaa

BUK NOGINGGOPAT: MAZMUR 90–106 Ki Allah, pononiungan in intau

¹ Sambayang i Musa, mogogundoi i Allah. O Tuhan, Ikobí in pononiungan nami modapot kon adí bo ompu.

² Kon dodai in buḷud mita diápa binaḻí, kon dodai in butá bo dunia naa diápa pinomia-Mu, Ikobí in ki Allah inta mononoi, diábí in pinomangkoian bo diábí in imbuitnea.

³ Iko in nopotabá kon intau mobui nongkon kinobaḻiannea, mobaḻí ḷobud naonda bo dungkuḷ.

⁴ Kon ini-Mu toribu notaong in naonda bo tosinggai, singgai koḷabung inta ain noitaḻib; naonda bo tongooras kon poyoḻimbanan moḷukad kon dodai in doḷom.

⁵ Iḷomot-Mu in kami; kami naa in naonda bo togoindop, naonda bo bonok inta nonokat;

⁶ doḷo-doḷom mobiag in sia bo ḷumantud, táe moḷaḷow kon dodai in ḷoḷabungnea.

⁷ Kami in noitaḻikokog in torú-Mu, bo nodait minatoi in yaat in gina-Mu.

⁸ Inukat-Mu in taḷá nami kon tayowon-Mu, dosa nami inta noiadop inontong-Mu.

⁹ Kobiagan nami in mopoḷok popisí in torú-Mu, taong mita in kobiagan nami in modait naonda bo tompot poginaan.

¹⁰ Kobiagan nami in tongá pitu nopuḷú notaong, aka kami moropot, yo waḷu nopuḷú notaong. Táe tongábí susa bo roriga in mouḻí nami; naonda in mobiag motoyong, kami in diádon.

¹¹ Ki ine in nonotaau kon kototoyang in torú-Mu, andeka nomangaḻe kon bungai in torú-Mu?

¹² Degá kinotaauandon nami in kinototoyong in kobiagan naa sinbá kami in mobaḻí intau inta mobijaksana.

¹³ O Tuhan, modapot in toonu Iko in tumorú? Pobuidon bo kotabipa in mogogundoi-Mu mita.

¹⁴ Poḻiudon in tabi-Mu kon inami pomuḷoi in doḷo-doḷom, sinbá moḷunganga in gina nami bo tantú modondong kinoouput in kinobiagan nami.

¹⁵ Ogoiaidon in kami in kamang mopia potongkaion in roriga inta binaba nami kon bonu in taong mita inta nororiga.

¹⁶ Poontongdon kon inami inta pinomia-Mu kon inami mogogundoi-Mu mita, bo kawasa-Mu inta mogaga kon buí nami.

¹⁷ O Tuhan Allah nami, barakataipa in kami, sinbá bayongan in oaidan nami oyúon in bungainea.