MAZMUR 9 - Alkitab Singog In Mongondow Masa In Tanaa

Sambayang sukur sin aid moadil i Tuhan

¹ Kon i itoi in mododondong. Podudui in dondong Mut-Laben. Mazmur i Daud.

² Takin ḻimbatú in gina akuoi moibog mopoyaput in sukur kon ini-Mu o Tuhan, bo mopotaau in oaidan-Mu inta mokoherang.

³ Moibog in akuoi mopoḷunganga bo moposanang in gina popisí in Iko bo modayow kon tangoi-Mu, Tuhan Inta Totok in moḷantud.

⁴ Kon tayowon-Mu musungku in nomurow bo noḷagui; mosia in noḷabú noipintud bo minatoi.

⁵ Sin Iko in nomarenta saḷaku hakim inta moadil; Iko in noduḷudon kon pelekaraku.

⁶ Iko in nohukumdon kon bangusa mita bo noyopú kon intau mita moraat; mosia in iḻiongdon modapot in mononoi.

⁷ Musung nami in nodaitdon iyopú, kotá mita monia irimumud-Mu; diádon in monorop bui kon tua.

⁸ Ki Tuhan in momarenta modapot in mononoi; Sia in noposindog in tampat pomomarentaan-Nea sin monisig kon dunia.

⁹ Sia in nomarenta kon bangusa mita takin moadil bo nonisig kon i monia takin motuḻid.

¹⁰ Ki Tuhan tua in pogogadopan in intau inta dinorot, tampat pononiungan kon dodai in mororiga.

¹¹ Intau inta nonotaau kon ini-Mu mogoḷat mako kon ini-Mu, o Tuhan, intau inta mosumba kon ini-Mu diábí taḷaan-Mu.

¹² Dayowdon in ki Tuhan inta nomarenta kon Sion! Oumandon in onu inta pinomia-Nea kon bangusa mita!

¹³ Sin kotoropan-Nea in intau inta kinoantugan in roriga bo diábí koḻiongan-Nea in kuani monia; intau inta mogaid kon inta moraat in hukumon-Nea.

¹⁴ Indoiaidon kaasí, musung mopororiga kon inakó; kotabipa kaasí in akuoi o Tuhan, popoḷaguipa in akuoi nongkon popatoi,

¹⁵ sinbá akuoi in modayow kon ini-Mu kon tayowon in intau mita in Yerusalem. Akuoi in monggoḷakapbí takin pia in gina sin Iko in noposaḷamat kon inakó.

¹⁶ Bangusa mita inta diá nonotaau kon ini-Mu notopak kon bubú inta kinaḻi monia tontaní; mosia in noibaaḷ kon pukot monia tontaní.

¹⁷ Ki Tuhan in nokipogontongdon tontaní popisí in singog inta sinantú-Nea in moadil. Intau moraat noiḷosok kon aidnea tontaní.

¹⁸ Popatoibí in imbuit in intau mita moraat, bangusa mita inta diá nopandungmai kon i Allah.

¹⁹ Diábí modapot in mononoi intau bogá in ḻiongon; diábí modapot in mononoi intau mororiga kobuḻian in kamang.

²⁰ Sindogdon, o Tuhan, sisigaidon in bangusa mita, dika pomayá mako in intau ḷumoḷatú.

²¹ Biódon mako moondok in mosia, o Tuhan, bo monotaau kon mosia in tongábí intau.