MAZMUR 89 - Alkitab Singog In Mongondow Masa In Tanaa

Dondong kon tungkuḷ in kinoantugan in bodito

¹ Dondong topotundú i Etan, intau in Ezrahi.

Kososatia i Tuhan Inta Totok in mokawasa

² Totabi-Mu, Tuhan, in popodondongku modapot in mononoi, kososatia-Mu in umurankubí potaa-taau mako modapot kon adí bo ompu.

³ Sin kinotaauanku kon tabi-Mu in mononoi, kososatia-Mu in motorindog naonda bo ḷangit.

⁴ Iko in noguman, “Akuoi in nogaidon kon dodandian takin intau inta piniḻí-Ku; Akuoi in nongibotdon kon i Daud, mogogundoi-Ku:

⁵ ‘Ḷoḻitúan pomomarentaanmu in ḷukadan-Ku modapot in mononoi, modapot in ki adí bo ki ompumu in ḻimitú kon tua.’ ”

⁶ Mogogutun mita kon soroga modayow kon aid-Mu mita inta mokoherang, bo mopodondong in kososatia-Mu, Tuhan.

⁷ Kon ḷangit diábí in ná Iko, o Tuhan, diábí in mahaḷuk in soroga in mokotongkai kon ini-Mu.

⁸ Iko in ihoromat kon yua-yuak in inta motusi mita, kinoondok noiḻiu kon bayongan inta kon ḻibu-Mu mita.

⁹ Tuhan, Allah Inta Totok in mokawasa, ki ine in ná koropot-Mu? Tuhan, Iko in mosatia kon bayongan in yagi-yagi.

¹⁰ Iko in nongawasa kon dagat inta mondoḷodokmai, bo nopooyong kon bokoḷnea inta motoyang.

¹¹ Ki Rahab, naga in dagat, binutuk-Mu bo iḻimod-Mu, takin ḻima inta moropot sinaḷow-Mu in musung-Mu mita.

¹² Ḷangit bo butá Iko in kitogi, dunia bo bayongan in tombonunea Iko in nomaḻí.

¹³ Ikobí in nomaḻí kon utuan bo toḷatan, Buḷud in Tabor bo Hermon moronggiow kon ini-Mu.

¹⁴ Totuu moḷoben in kawasa-Mu, bo totuu motoyang in ropot-Mu!

¹⁵ Kooadil bo hukum in nobaḻí dodoyonan in dodatuan-Mu, tabi bo kososatia in noniata kon bayongan aid-Mu.

¹⁶ Pia in kamang in bangusa inta noibada takin pia in gina, inta nobiag kon bonu in sindar kinoangoian-Mu, Tuhan.

¹⁷ Kinoouput in singgai mosia iḷungangaan in gina bo umuran notoguyoton, popisí in kopopia-Mu.

¹⁸ Iko in nopountung kon inami nádomai tua, popisíbí in kopopia-Mu tua dá nountung in kami.

¹⁹ Sin mogogoḻingoi nami in intau inta piniḻí-Mu, o Tuhan; datu nami in ki Allah Mokudus in Israel in kitogi.

Dandi i Allah kon i Daud

²⁰ Dungkuḷmai kon bonu in oontongon tobatú, Iko in noguman kon mogogundoi-Mu inta motoḷutui, “Akuoi ain notuḷung kon pahlawan tobatú, intau tobatú inta piniḻí-Ku nongkon rayat inta ain pinoḷantud-Ku.

²¹ Nouḻí-Kudon in ki Daud, mogogundoi-Ku, bo dinuí-Ku in sia takin ininggúan in ḷana in upacara.

²² Ropot-Ku in umuranbí moḷukad kon inia, kawasa-Ku in moginropotbí kon inia.

²³ Sia in diá taḷowon in musung, bo diábí doroton in intau moraat.

²⁴ Bayongan in musungnea daiton-Kubí yompaton, ḻimodon-Ku ki inekabí in mondoí kon inia.

²⁵ Akuoi in umuranbí motabi kon inia bo mosatia kon inia, bo baḻíon-Ku in sia kodugang-kodugang in kawasanea.

²⁶ Dodatuannea in pooḷadon-Kubí, nongkon Dagat Toyuak nodapot kon Ongkag in Eprat.

²⁷ Sia in mogumanbí kon i-Nakó, ‘Ikobí in ki Amáku, ki Allahku, mogogoḻingoiku bo mopoposaḷamatku.’

²⁸ Baḻíon-Kubí in sia ki adí-Ku ḷoḷaki guya-guyang, inta moiḻiu in ḷantud nongkon bayongan in datu.

²⁹ Sia in tantúbí kotabi-Ku modapot in mononoi, dodandian-Ku takinnea in umuranbí morigon.

³⁰ Ḷoḻitúannea in umuran-Kubí ḷukadan kon bonu in ḷangit tantúpa kon ḻimonik in butá, modapot in adí bo ompunea in mongawasa kon tua.

³¹ Táe aka buínea bo ḻimimpat kon hukum-Ku, bo diá mobiag podudui in parenta-Ku,

³² aka mosia in diá mopandungmai kon inta ain sinantú-Ku bo monaḷámai kon atorang-Ku,

³³ yo mosia in hukumon-Ku in sambok popisí in iḻimimpatdon, bo popoumaan-Ku in bodito popisí in dosanea mita.

³⁴ Táe Akuoi in umuranbí motabi kon i Daud, bo diábí monaḷámai kon kososatia-Ku.

³⁵ Dodandian-Ku takinnea in diábí inggamáan-Ku, nongkon bayongan in dandi-Ku yo diábí tobatúmai in gamáan-Ku bui.

³⁶ Kokomintan tua modapot in mononoi Akuoi in mongibot podoyon kon tangoi-Ku inta motusi; Akuoi in diábí monguboḷ kon i Daud.

³⁷ Ḷoḻitúannea in umuranbí oyúon kon bonu in oyúonpa in mata in singgai, modapot in adí bo ompu in mongawasa kon tua.

³⁸ Dodatuannea in umuranbí oyúon naonda bo buḷan, sakusi mosatia in kon goḷom mita.”

Amui kon kinotaḷowan in datu

³⁹ Táe tanaa in Iko tumorú kon i datu, Iko in noḷumbú bo nondoí kon intau inta piniḻí-Mu.

⁴⁰ Pinilat-Mudon in dodandian-Mu takin in mogogundoi-Mu, mahkotanea in pinogambat-Mu kon bonu in yoná.

⁴¹ Inumpag-Mu in dinding mita in kotánea, benteng mita in binaḻí-Mudon apug.

⁴² Bayongan in intau inta moitaḻib in mogagow kon kapunyaannea, sia in tososingkuḻe mako in topodiugneamai.

⁴³ Pinountung-Mu in musungnea mita, bo bayongan in ḷawang pinoḷunganga in ginanea.

⁴⁴ Nodapot in pakakat in parangnea binaḻí-Mu diá in mangaḻenea, Diábí sinuḷungan-Mu in sia kon bonu in parang.

⁴⁵ Inimbuitan-Mu in kawasanea inta ponango-nangoian, ḷoḻitúannea in pinogonag-Mu kon butá.

⁴⁶ Inimpoḷokan-Mu in kinotayowmobiagannea, bo sia in pinopokoḷoban in oyá.

Sambayang mopoigum poḷuaton

⁴⁷ Modapot in toonu Iko in mogadop, o Tuhan? Modapot in toonu in torú-Mu tumagab naonda bo tuḷú?

⁴⁸ Toropdon in akuoi totuubí mopoḷok in kobiaganku naa, binaḻí-Mu in intau saḷaku mahaḷuk inta mato-matoi.

⁴⁹ Ki inebí in motaau umuran mobiag bo diá mato-matoi? Ki ine in mokoḷagui nongkon poḷoḷobongan?

⁵⁰ O Tuhan, kon ondadon degá in tomponuot in tabi-Mu inta dungkuḷ, inta pinodandi-Mu kon i Daud pinodoyon kon kososatia-Mu?

⁵¹ Toropdon kaasí o Tuhan, naonda in pinongongempeng kon mogogundoi-Mu naa, akuoi in nobaba kon singkuḻe in nobayong in bangusa.

⁵² Musung-Mu mita in noningkuḻe kon datu inta piniḻí-Mu, o Tuhan, norebeg kon inia kon ondakabí in bayáannea.

⁵³ Dayowdon in ki Tuhan modapot in mononoi. Kobaḻídon natua! Amin!