MAZMUR 88 - Alkitab Singog In Mongondow Masa In Tanaa

Sambayang mokituḷung

¹ Dondong. Mazmur in inanakan i Korah. Kon i itoi in mododondong. Podudui in dondong: Mahalat Leanot. Dondong topotundú i Heman, intau in Ezrahi.

² O Tuhan, Allah inta noposaḷamat kon inakó, kon dodai in singgai akuoi nokuani kon ini-Mu, kon dodai in doḷom akuoi namangoi in tayowon-Mu.

³ Igumon mako sambayangku moiyaput kon ini-Mu, indongogaipa kaasí in kuaniku.

⁴ Akuoi naa in kinoantugan in susa mobayong; popatoi in kon ngaradon in ḷoḻingkop.

⁵ Akuoi in naondadon bo intau inta moponagdon kon bubú in poḷobongan, intau inta kinodaitandon in ropot

⁶ Akuoi in sinaḷáan kon yua-yuak in intau minatoi, naonda bo intau kinoḻimodan, noiuḻid mako kon bonu in poḷoḷobongan, naonda bo intau inta totokdon in kinoḻiongan-Mu, intau inta diádon sinuḷungan-Mu bui.

⁷ Pinogambat-Mu in akuoi kon bonu in bubú inta moonag, kon bonu in bubú poḷoḷobongan inta moonag bo sindip.

⁸ Torú-Mu nondorot kon inakó, akuoi in norimumud kinodorotan in torú-Mu.

⁹ Pinoyayú-Mu kon inakó in intau mita inta nogogintaauanku, bo binaḻí-Mu in akuoi mokobú kon i monia. Akuoi kinokurungan bo diá mokoḷuai,

¹⁰ mataku in nokuḷoḷowdon popisí in roriga. Pomuḷoi in singgai akuoi in mokuani kon ini-Mu, Tuhan, bo nosambayang takin ḻima noiyopa.

¹¹ Degá Iko in momia kon inta mokoherang kon intau minatoi? Degá simindog in mosia bo modayow kon ini-Mu?

¹² Degá tabi-Mu potaau kon bonu in poḷoḷobongan, bo kososatia-Mu kon tampat koyopúan?

¹³ Oyúon degá in nonotaau kon inta mokoherang inaidan-Mu kon bonu in sindip, andeka kopopia-Mu kon butá inta intau mita iḻiong?

¹⁴ Táe akuoi in mokituḷung kon ini-Mu, o Tuhan, pomuḷoi in doḷo-doḷom poyaputku in sambayang kon ini-Mu.

¹⁵ O Tuhan, nongonu sin dinoí-Mubí in akuoi? Nongonu sin pinomiḷagui-Mubí in pogot-Mu kon inakó?

¹⁶ Nongkon nointokanpamai akuoi nororiga bo sinarap mako in popatoi, moyoyigadon totok in akuoi mobaba kon hukuman-Mu.

¹⁷ Torú-Mu inta motoyang nokorimumud kon inakó; pinonubuan-Mu inta motoyang nokoyompat kon inakó.

¹⁸ Kinoouput in singgai torú-Mu naonda bo ḷunud noiḻibu kon inakó, noḻipung kon inakó nongkon bayongan tampat.

¹⁹ Yobayatku mita inta modagin pinoyayú-Mu kon inakó, dongkadon sindip in noyotakinku.