MAZMUR 87 - Alkitab Singog In Mongondow Masa In Tanaa

Dodayow kon i Yerusalem

¹ Mazmur in inanakan i Korah, dondong tobatú. Ki Tuhan in noposindog in kotá-Nea kon tudu in tombuḷud inta motusi.

² Nongkon bayongan in kotá kon Israel, Yerusalembí inta totok in kinotabi-Nea.

³ Indongogaidon, ei kotá i Allah, soaḷ mita inta momulia siningog-Nea soaḷ iko:

⁴ “Mesir bo Babel in potuoton-Kubí kon bonu in bangusa mita inta motoindudui kon i-Nakó. Nodapot in Pilistea, Tirus bo Sudan moituot mobaḻí intau in Yerusalem.”

⁵ Kon i Sion singogon in intau nanaa, bayongan in bangusa in noituot kon inia, bo ki Inta Totok in Moḷantud in moporigondon kon inia.

⁶ Ki Tuhan in mopotuot in bangusa mita kon bonu in intau in Yerusalem.

⁷ Mosia in motayok bo mopodondongbí, “Sion in ḻipú kinoḷontaganku!”