MAZMUR 86 - Alkitab Singog In Mongondow Masa In Tanaa

Sambayang mokituḷung

¹ Sambayang i Daud. Indongogaipa in sambayangku, o Tuhan, bo tubagaipa in akuoi, sin akuoi nobogá bo moyangkó.

² Ḷukadaipa in kobiaganku, sin Iko in motabi kon inakó, posaḷamatpa in mogogundoi-Mu inta mopirisaya kon ini-Mu.

³ Ikobí in ki Allahku, kotabipa kaasí in akuoi o Tuhan, sin kinoouput in singgai akuoi mosambayang kon ini-Mu.

⁴ Tuhan, poḷungangadon in gina in mogogundoi-Mu, sin ginaku in popotayowku kon ini-Mu.

⁵ Iko in mopia, o Tuhan, bo moibog mongampung, intau inta mosambayang kon ini-Mu umuranbí kotabi-Mu takin tabi inta moiḻiu.

⁶ Taridiaipa in sambayangku, o Tuhan, indongogaipa in kuaniku mopoigum in totuḷung.

⁷ Kon tungkuḷ nororiga akuoi in nosambayang kon ini-Mu, sin Iko in notubag kon inakó.

⁸ O Tuhan, diábí in ilah in ná Iko, diábí in nokoaid kon ná inta inaidan-Mu.

⁹ Bayongan in bangusa inta pinomia-Mu in mamangoibí, o Tuhan, sin mosumba kon ini-Mu bo mopoḷantud kon ini-Mu.

¹⁰ Sin Iko in motorindog bo nogaid kon inta mokoherang mita, tongábí Iko in Allah.

¹¹ Tundúpa in koibog-Mu kon inakó, o Tuhan, sinbá akuoi in dumudui tumoḷutui; baḻídon in akuoi motoguondok totu-totuu kon ini-Mu.

¹² Akuoi in mopoyaput in sukur kon ini-Mu takin ḻimbatú in gina, o Tuhan Allahku; akuoi in modayow kon kawasa-Mu moḷoben modapot in mononoi.

¹³ Sin Iko in tantúbí notabi kon inakó takin tabi moḷoben; Iko in noposaḷamatdon kon nyawaku nongkon bubú in poḷoḷobongan.

¹⁴ O Allah, intau moḷoḷatú in simindog monubu kon inakó, tongopaanan in intau moḻingá moibog moḻimod kon inakó; mosia in diábí mopandungmai kon ini-Mu.

¹⁵ Táe Iko, o Tuhan, ki Allah inta motabi bo mopia in gina, mosabar, nopuḻing in tabi bo mosatia.

¹⁶ Taridiaipa kaasí bo kotabipa in akuoi, iropotaidon bo posaḷamatpa in akuoi, sin naonda bo ki ináku, akuoi in nosumba doman kon ini-Mu.

¹⁷ Ogoiaidon in akuoi in tomponuot in kopopia-Mu, o Tuhan, sinbá intau inta mondoí kon inakó angoian in oyá, aka mosia in mokoontong kon ini-Mu motuḷung bo moḻipoi kon inakó.