MAZMUR 85 - Alkitab Singog In Mongondow Masa In Tanaa

Sambayang mopoigum in kobiagan motompia in bangusa

¹ Kon i itoi in mododondong. Mazmur i inanakan i Korah.

² Kinoibog-Mu in butá-Mu, o Tuhan, kaadaan in Israel ain sinompia-Mu bui.

³ Inampungan-Mudon in dosa mita in umat-Mu; imaapan-Mudon in bayongan in taḷánea.

⁴ Mosia in diá bidon sinorúan-Mu; torú-Mu inta motoyang in ginamá-Mudon bui.

⁵ Tompiadon bui in kami, o Allah mopoposaḷamat nami, dikadon tumorú kon inami.

⁶ Modapot degá in mononoi Iko in tumorú kon inami, bo umuran tumorú modapot in adí bo ompu?

⁷ Iropotaidon bui in kami sinbá kami umat-Mu in moḷunganga popisí in totuḷung-Mu.

⁸ Poontongdon kon Iko in tantúbí monotabi, o Tuhan, ogoiaidon in kami in kasaḷamatan nongkon ini-Mu.

⁹ Akuoi in moibog mokidongog kon tosingogon i Tuhan Allah; Sia in nopodandi in kobiagan motompia kon inaton, umat-Nea, asaḷ bo kita in diá bui mogaid kon dosa.

¹⁰ Totuu, Sia in moibogbí moposaḷamat kon intau inta modagin kon i-Nia, ki Allah inta moḷantud in mogutunbí kon butá naton.

¹¹ Tabi bo kososatia in moyodungkuḷbí, kooadil bo dame in mokokoyotanbí.

¹² Kososatia in intau in mobiagbí nongkon butá, bo kooadil i Tuhan in moḷongowbí monag nongkon ḷangit.

¹³ Ki Tuhan in mobogoi kon inta mopia, dá butá naton in mobogoibí in bungainea.

¹⁴ Kooadil in umuranbí kon i Tuhan, bo moposadia kon daḷan bayáan-Nea.