MAZMUR 84 - Alkitab Singog In Mongondow Masa In Tanaa

Mokotanob kon Baḷoi i Allah

¹ Kon i itoi in mododondong. Podudui in dondong: Gitit. Mazmur in inanakan i Korah.

² Totuu mokosanang in tampat pogogutunan-Mu, o Allah Inta Totok in mokawasa!

³ Ginaku in totokbí in mokotanob kon Baḷoi-Mu, dimukud bo awakku monggiow kon i Allah inta nobiag.

⁴ Nodapot in ḷagapan dui-duit nokouḻí kon baḷoi bo ḷagapan tansibí in nokouḻí kon pugad, tampat pogogukatan monia kon i adínea kon diug in mezbah-Mu, o Tuhan Inta Totok in mokawasa, Datuku bo Allahku.

⁵ Totuu mosanang in intau inta nogutun kon Baḷoi-Mu, bo umuran mopodondong in dodayow kon ini-Mu.

⁶ Pia in kamang in intau inta nokouḻí kon ropot nongkon ini-Mu, bo inta koniat mayá mosambayang kon Buḷud in Sion.

⁷ Kon dodai in mosia minayá nongin ḷopá Mononoi, tampat tatua binaḷuian monia nobaḻí bokaká, uyan dungkuḷ nobogoi in barakat totuu mobayong.

⁸ Ropot monia in kodugang-kodugang, kon tungkuḷ in minayá in Sion, kon tampat i Allah bayongan in dimukud nokipogontong.

⁹ Indongogaipa kaasí in sambayangku, o Tuhan Allah Inta Totok in mokawasa, indongogaipa, o Allah Yakub.

¹⁰ Barakataipa kaasí in datu nami, o Allah, ḷukadaidon in intau inta ain piniḻí-Mu.

¹¹ Mopia-piabí kon tosinggai in kon Baḷoi-Mu dika in toribu nosinggai kon tampat ibanea. Piniḻíku in mobaḻí moḷoḷukad kon ngara in Baḷoi i Allahku dika in mogutun kon baḷoi in intau moraat.

¹² Sin ki Tuhan Allah in moḷoḷukad naton bo datu inta moḷantud, inta noponotabi kon inaton in tabi bo kahoromatan. Sia in diábí kon dodai in onda in nondoí kon onuka in mopia kon intau inta kobobiagnea diá in bogit.

¹³ O Tuhan Inta Totok in mokawasa, pia in kamang in intau inta mopirisaya kon ini-Mu.