MAZMUR 83 - Alkitab Singog In Mongondow Masa In Tanaa

Sambayang mokituḷung tumayow kon musung

¹ Mazmur i Asap: Tobatú dondong.

² O Allah, dikabí tumon bobó, dikabí kaasí mokoyot kon dodob bo tongá kibio-biómai.

³ Indoiaika, musung-Mu norosadiadon, intau mita inta nondoí kon ini-Mu nomarontak.

⁴ Mosia in nonomayá kon diá mopia monayow kon umat-Mu; bo noyosingogdon kon monayow kon intau mita inta iḷukadan-Mu.

⁵ Guman monia, “Igai rimumudon naton in bangusa in Israel, sinbá tangoi monia in diádon toropon bui.”

⁶ Bangusa mita in notobatúdon, bo noyopakat monayow kon ini-Mu:

⁷ bangusa in Edom bo Ismael, intau mita in Moab bo Hagar;

⁸ bangusa in Gebal, Amon bo Amalek, bangusa in Pilistea takin intau in Tirus.

⁹ Asyur in dinumugang domandon kon i monia, nobaḻí intau inta pinirisaya in buí i Lot.

¹⁰ Pomiadon in mosia naonda bo intau in Midian, naonda bo ki Sisera bo ki Yabin kon Ongkag in Kison,

¹¹ inta ain iyopú kon Endor, bo nobaḻí pupuk in butá.

¹² Pomiadon in itoi monia naonda bo ki Oreb bo ki Zeeb, pokuyungdon in mongongawasa monia naonda bo ki Zebah bo ki Salmuna,

¹³ popisí in mosia in nogumandon, “Igai ḻitúandon naton in butá pinogutunan i Allah.”

¹⁴ O Allah, potabudon in mosia naonda bo ḷobud, naonda bo baḻeká inta inirup in tompot.

¹⁵ Naonda bo tuḷú inta nomokak kon kayuon, dokot in tuḷú inta nomagong kon buḷud mita.

¹⁶ Duduraidon in mosia in deḷang-Mu, taḻikokogaidon i mosia in tompot moropot-Mu.

¹⁷ O Tuhan, biódon mako in mosia singkuḻeon, sinbá akúon monia in kinokokawasa-Mu.

¹⁸ Biódon mako in mosia modapot in mononoi pokopooyáanmai bo angoian in ondok, biódon mako in mosia matoi kon bonu in empeng.

¹⁹ Igumon mako kotaauandon monia kon tongábí Iko in Inta Totok in moḷantud, ki Tuhan, inta nongawasa kon sinangkub in dunia.