MAZMUR 82 - Alkitab Singog In Mongondow Masa In Tanaa

Ki Allah, Datu Momulia

¹ Mazmur i Asap. Ki Allah in nodia kon sidang ilahi kon soroga, bo Sia in nobogoi kon simpod in singog:

² “Dika bidon monisig takin tombogá, bo dika dumotá kon intau moraat.

³ Duḷuaidon in adí uno-unon bo intau moyangkó, poaidon in moadil kon intau nobogá bo nororiga.

⁴ Poḷuatdon in intau inta moyangkó bo diá mokopongonu, poḷaguidon in mosia nongkon kawasa in intau moraat.

⁵ Moiko in diábí nonotaau in onu bo onu, bodok bo noiḷaḻe, popisí in moiko, diá notampuimai in atorang kon intau mobayong.

⁶ Akuoi in noguman kon moiko in ilahi moiko takin ki adímu mita in ki adí mita i Allah Inta Totok in moḷantud.

⁷ Táe moiko in matoibí naonda bo intau, naonda bo bayongan in intau moḷoben, moiko in matoibí doman.”

⁸ Angoidon o Allah, sisigaidon in dunia, sin bayongan in bangusa Ikobí in kitogi.