MAZMUR 8 - Alkitab Singog In Mongondow Masa In Tanaa

Kamuliaan i Allah bo kamuliaan in intau

¹ Kon itoi in mododondong. Podudui in dondong Gitit. Mazmur i Daud.

² Oo Tuhan, Allah nami, kawasa-Mu ponango-nangoian kon sinangkub in butá! Kamuliaan-Mu inta nonigad kon ḷangit

³ podondong in mongoadí mita bo adí mita mointok. Pomarentaan-Mu in moroton bo diá motundan sin momompon kon bibig in musung bo saturu.

⁴ Aka indoianku in ḷangit inta pinomia-Mu, buḷan bo tundi inta pinoukat-Mu,

⁵ yo onubí degá in intau tua, nodapot in sinorop-Mu in sia, ki ine in sia, dá iḷukadan-Mu?

⁶ Táe dinuí-Mu in sia gogió bo notongkai i Allah, Pinopoḷutudan-Mu in sia in kamuliaan bo kahoromatan.

⁷ Inogoian-Mu in sia in kawasa kon dunia naa, bayongan in inta pinomia-Mu pinotungkud-Mu kon inia:

⁸ domba, sapi bo bayongan in biag, takin doman mahaḷuk mita kon kayuon;

⁹ ḷagapan mita bo toyá mita, bayongan in mahaḷuk kon bonu in dagat.

¹⁰ Oo Tuhan, Tuhan nami, kamuliaan-Mu ponango-nangoiandon kon sinangkub in butá naa!