MAZMUR 79 - Alkitab Singog In Mongondow Masa In Tanaa

Sambayang mokipoḷuat

¹ Mazmur i Asap. O Allah, bangusa inta diá nonotaau kon ini-Mu ain iḻimitú kon butá budel-Mu. Mosia in noponajisdon in Baḷoi-Mu, Yerusalem in binaḻídon apug,

² Mayat in mogogundoi-Mu mita in sinaḷáan monia nobaḻí kokaanon in ḷagapan mita kon ḷangit. Mayat in intau mita inta kinotabi-Mu in pinomayá mako monia nobaḻí kokaanon in mahaḷuk ḻindong.

³ Kon sinangkub in kotá in Yerusalem dugú monia in noibutak naonda bo tubig; diá in moḷobong kon i monia.

⁴ Kami in tororebeg mako in bangusa mita topodiugmai, kinosingan monia bo siningkuḻe monia in kami.

⁵ O Tuhan, degá modapot in mononoi tumorú in Iko, bo intoi-Mu in moborambang naonda bo tuḷú?

⁶ Pobutakdon in torú-Mu kon bangusa mita inta diá nonotaau kon ini-Mu, bo kon dodatuan mita inta diá noibada kon ini-Mu.

⁷ Sin mosia in noyopúdon kon umat-Mu, bo norimumud kon pogogutunan monia.

⁸ Dikabí mohukum kon inami popisí in dosa in mogoguyang nami. Ḷagidon kotabi in kami, sin nodaitdon in kamang nami.

⁹ Tuḷungaipa kaasí in kami o Allah, mopoposaḷamat nami, ampungaipa in dosa mita nami bo poḷuatdon in kami podoyon kon kahoromatan-Mu tontaní.

¹⁰ Dika pomayá mako in bangusa ibanea in moḻibó soaḷ kami, “Kon onda in ki Allah monia?” Biódon mako in kami in mokoontong kon potuḻían kon bangusa mita inta noḻimod kon mogogundoi-Mu mita.

¹¹ Indongogaipa kaasí in ongot in intau mita inta pinonjara; igumon mako intau mita inta ain sinantú matoi in pomayádon mako popisí in kawasa-Mu.

¹² O Tuhan, tuḻíaidon in bangusa mita tatua kopitu noguntuḷ in kororiganea popisí in bayongan in singkuḻe monia kon ini-Mu.

¹³ Dá kami umat-Mu, domba inta iḷukadan-Mu, in mopoyaput in sukur kon ini-Mu modapot in mononoi, bo modayow kon ini-Mu modapot in adí bo ompu.