MAZMUR 77 - Alkitab Singog In Mongondow Masa In Tanaa

Ḷoḻipoi kon tungkuḷ in susa

¹ Kon i itoi in mododondong. Podudui in: Yedutan. Mazmur i Asap.

² Noḷangon in pinokokuaniku kon i Allah; noḷangon in kuaniku, bo inindongogan-Nea in akuoi.

³ Kon tungkuḷ in mororiga totok akuoi in nosambayang kon i Tuhan; kinoouput in doḷom tonggóonku in ḻimaku kon i-Nia takin diá angoian in bú, táe ginaku in doíbí ḻipoion.

⁴ Aka kotoropanku in ki Allah, mogamui in akuoi, aka tano-tano bo ku, ginaku modugang moḻemé.

⁵ Binaḻí i Tuhan in akuoi diá mokosiug kon dodai in doḷom, moḻia-ḻiaw in ginaku dá diádon mokosingog.

⁶ Iraiku kon singgai mita inta ain kinotaḻiban, toro-toroponku bo tano-tanobonku in taong mita inta ain kinotaḻiban.

⁷ Kon dodai in doḷom akuoi in moporai-raimai, bo mopoḻibo-ḻibómai kon bonu in gina,

⁸ “Degá dapot in mononoi ki Tuhan in mondoí bo diádon angoian pia in gina bui?

⁹ Degá nogogaidon in Sia motabi kon inami? Degá diádon intompodan-Nea in dandi-Nea bui?

¹⁰ Degá kinoḻiongandon i Allah in monotabi? Sinumorúdon degá in Sia, nodapot in Sia diádon in tabi-Nea?”

¹¹ Bo akuoi in noguman, “Naabí in mokonakit kon ginaku, kon ki Inta Totok in moḷantud diádon nongawasa bui.”

¹² Akuoi in moibog monorop kon inta inaidan-Mu mita o Tuhan, monanob kon inta mokoherang mita inta inaidan-Mu dungkuḷmai.

¹³ Akuoi in moibogbí monano-nanob kon bayongan inta pinomia-Mu, bo umuran morai kon bayongan inta binaḻí-Mu inta motoyang.

¹⁴ O Allah, bayongan in aid-Mu in motusi, ki inebí in ná koḷoben i Allah nami?

¹⁵ Ikobí in ki Allah inta nomia kon inta mokoherang, kawasa-Mu ain pinoniata-Mu kon yuak in bangusa mita.

¹⁶ Pinongin ropot-Mu pinoḷuat-Mu in umat-Mu, buí i Yakub bo i Yusup.

¹⁷ Mokoontong kon ini-Mu, o Allah, tubig moondok, nodapot in apad in dagat mourot.

¹⁸ Goḷom mopoḷabú in uyan, gotup mondoradá; kilat monampí magí mako.

¹⁹ Gotup mondoradá, kilat in moburiang mako, butá modandú bo mourot.

²⁰ Iko in mayá nongin bokoḷ, iḷumoḷan kon dagat, táe ḻiod-Mu diá koontongan.

²¹ Naonda bo gombala Iko in nodia kon umat-Mu, pinotonsigad kon i Musa bo kon i Harun.